Varoma 4
4
Sihonena saAbirahamu
1Ngapi nye omu natu uyunga? Abirahamu, zinyakurwetu goparutu, yinke nani ga gwene moyirugana yendi? 2Ano Abirahamu nsenesi kwa mu hungamekesere koyirugana yendi, eyi kwa vhulire kuyilinenepekera, nye kapisi kosipara saKarunga. 3Matjangwa kutanta asi, “Abirahamu kwa pulire Karunga, makura epuro lyendi kwa li mu varwilire uhungami.” 4Ano muntu ogu a rugana yirugana, mfuto zendi kapi ava zi varura ngouhwi, nye zokuliruganena. 5Ano ogu ga pira yirugana, nye ta pura Karunga ogu a hungamekesesa gokudira kuyavara Karunga kepuro lyendi, Karunga kulimuvarwilira uhungami. 6Yiyo yooyo ga tambere Ndafita mokupanda erago lyomuntu ogu ga hungameka Karunga age ga hana yirugana, ngesi asi:
7“Verago vaava ana dongwenene po Karunga
mataguruko gawo,
ano di kare nonzo dawo yiyo a di kudumike.
8Gerago googu a dili kuvarwira Hompa nonzo dendi.”
9Ee, nani, erago eli ga uyunga Ndafita, kwa hamena ava va rugana yovamba velike tupu ndi? Nani kapisi nava va dira kurugana yovamba nawo? Ose kuresa sa metjangwa asi: “Epuro lyaAbirahamu Karunga kwa li mu varwilire uhungami.” 10Siruwoke va varwilire Abirahamu epuro lyendi uhungami? Age va mu rugana nare yovamba ndi age simpe nokumurugana si yovamba? Kapisi paapa ana pu kumurugana yovamba, hawe, age simpe nokumurugana si yovamba. 11Abirahamu kwa mu rugene yovamba mouhura, asi vamba zi kare sidiviso sokuhorora asi, epuro lyendi Karunga ana li mu varwilire uhungami, age simpe nokumurugana si yovamba. Yipo nye ga kerera Abirahamu guhyanavenye ava ava pura oku ta va hungameke Karunga, nampili ngomu va dira kuvarugana yovamba. 12Abirahamu age hena guhya zava va rugana yovamba, nye kapisi morwakuvarugana yovamba tupu, nani nye morwakukara mepuro eli ga kere nalyo zinyakurwetu Abirahamu, age simpe nokumurugana si yovamba.
Matumbwidiro gaKarunga kugatambura mepuro
13Karunga kwa tumbwidilire Abirahamu asi nga pinga uzuni mudima kumwe noruvharo rwendi. Matumbwidiro aga kapi ga tundilira mesikisomo lyoVeta, kwa tundilira mepuro eli ga varwilire Karunga Abirahamu uhungami. 14Ano nsenesi ava ava limburukwa koVeta, yiwo nye velike wokupinga uzuni, makura epuro tali kara lyomawoko‐woko, netumbwidiro lyaKarunga nalyo kutupu sirugana. 15Yeeyi Veta kureta ehandu lyaKarunga, nye oku kwa dira kukara Veta, kapi kwa kara hena mataguruko gazo.
16Matumbwidiro kwa ga tameka kepuro mokuninka asi ga kare uhwi waKarunga. Matumbwidiro kuna ga korekere navenye womoruvharo rwaAbirahamu. Kapisi vaava velike ava sikisa mo Veta, hawe, navaava va kara mepuro eli ga kere nalyo Abirahamu. Yeeyi Abirahamu age guhyetu gopampepo natuvenye, 17moomu va tjanga asi, “Ame kwa ku tura po o kare guhyanomuhoko dononzi.” Abirahamu kwa tambura matumbwidiro kosipara saKarunga ogu ga pulire. Karunga ogu kutura mwenyo wokufa. Age hena kupanga eyi ya dilire kukara po, makura nare yina kara po. 18Abirahamu kwa pulire oku ta huguvara, nampili ngomu lya kere ehuguvaro lyendi ngwendi lyomawoko‐woko. Yiyo nye ga kerera guhyanomuhoko dononzi, moomu va yi tjanga asi, “Ruvharo roge yimo nye ngaru vhuka ngorooro.” 19Abirahamu kwa kere pepi nonomvhura efere limwe. Nye nampili ngesi, kapi lya nkundipire epuro lyendi mokuteda rutu rwendi oru rwa pilire nonkondo, ndi oru rwaSara ogu ga divire asi ana ke. 20Abirahamu kapi ya mu tanganesere yetumbwidiro lyaKarunga, a dire ngano kulihuguvara. Hawe, epuro lyendi kwa korere, makura ta fumadeke Karunga. 21Abirahamu kwa yi divire nawa‐nawa asi, eyi ga tumbwidira Karunga, nga yi sikisa mo hena. 22Yiyo nye ga li mu varwililire Karunga Abirahamu epuro lyendi uhungami. 23Nye kapisi mwarwendi gelike va tjangera asi: “Vana li mu varwilire uhungami.” 24Hawe, kwa di tjangera mwarwetu hena. Nose epuro lyetu kulituvarwilira uhungami, nsene tu pura ogu ga vhumbura Jesus, Hompa gwetu koufe. 25Karunga kwa gava Jesus, va mu dipage morwamaunzoni getu, yiyo ga mu vhumbura koufe asi tu hungamene mwendi.
Currently Selected:
Varoma 4: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003