Varoma 5
5
Mbili naKarunga
1Ano moomu ga tu hungamekesa Karunga kepuro, yiyo nye tuna karere nombili naKarunga mwaHompa gwetu Jesus Kristusa. 2MwaJesus yimo tuna gwanene mpito zokuza monkenda, omu twa kara. Makura yiyo tuna kuhafera mendindiro lyouyerere waKarunga, asi nose ngava tu yererepeka. 3Nhi, kapisi yeeyi yelike, nye ose kuhafera hena maudigu, yeeyi twa diva asi maudigu kureta edidimiko, 4ano edidimiko kureta ukoli womwenyo, ano ukoli womwenyo kureta ehuguvaro. 5Ehuguvaro eli kapi ali tu fisa nomuga. Yeeyi Karunga kwa tulisa eharo lyendi monomutjima detu koMpepo zoKupongoka ezi ga tu pa.
6Apa twa kere twa hana nonkondo, yipo ga fililire Kristusa vadinikarunga poruveze oru ga pangere Karunga. 7Yokufira muntu gomuhungami, yidigu komuntu. Kufira muntu gomuwa mpamwe kuvhura kukulitokwera. 8Nye Karunga kwa tu likida asi kwa tu hara unene mwangesi asi, apa twa kere tu vananzo, Kristusa yipo ga tu fililire. 9Moomu za tu hungameka honde zaKristusa, unene po ngazi tu yoworora mo mehandu lyaKarunga. 10Ose kwa kere nonkore daKarunga. Nye nampili ngomu ya kere ngesi, Karunga kwa tu gwanekedesesa kumwe nendi konomfa daMuzowoli. Ano ntaantani ngomu vana tu gwanekedesa ngesi naKarunga, unene ko tava tu parwire nye mwaKristusa ogu ga kara nomwenyo. 11Nye kapisi yeeyi yelike, hawe. Ose kuhamberera hena Karunga morwaHompa gwetu Jesus Kristusa, ogu ana tu gwanekedesa ntaantani naKarunga.
Adamu naKristusa
12Nzo, muntu gumwe tupu ga zi reta mouzuni. Ano nzo zendi kwa reta mo nomfa. Nomfa yiyo da lihanena movantu mudima, morwa vantu navenye kwa zona. 13Nzo yimo za kere mouzuni, azo Veta simpe patupu. Ano nzo kapi ava zi varura, nsene zi pira po Veta. 14Nye kutunda kwaAdamu dogoro nokwaMosesa, nomfa ngadi pangere vantu navenye, navaava va dilire kuzona moomu ga zonene Adamu pokudira kulimburukwa mpango zaKarunga.
Adamu kwa kere efano lyogu nga wiza. 15Nye uhwi waKarunga wonkenda kapi wa lifana nonzo zaAdamu. Nzo zagumwe tupu yizo za retera nomfa vantu navenye, nonkenda zaKarunga nazo yiyo za nenepa unene. Ano nouhwi wendi nawo ngosikwawo momuntu gumwe Jesus Kristusa, ogu ga retera vantu wovanzi etungiko lyenene. 16Uhwi waKarunga kapi wa lifana nonzo neyi za reta nzo zomuntu gumwe. Apa ga zona gumwe, yipo pwa tunda epanguro lyokonomfa. Mouhwi waKarunga wokudongonona po nonzo dononzi, yimo mwa tunda mbili naKarunga. 17Nsene asi morwanzo zomuntu gumwe yiyo adi pangerere nomfa mouzuni morwogo gumwe, ngapi nye omu ngava pangera unene momwenyo ava va gwana unzi wonkenda nouhwi wouhungami momuntu gumwe, Jesus Kristusa.
18Ano moomu za retera nzo zomuntu gumwe vantu navenye epanguro, nosirugana simwe sokuhungama somuntu gumwe yimo sa retera vantu navenye ehungamo nomwenyo. 19Moomu va karera navenye vananzo morwakudira kulimburukwa komuntu gumwe, nemelimburuko lyomomuntu gumwe namo ngamu tunda vahungami wovanzi.
20Veta kwa wizira asi nonzo di vhuke. Ano apa pa vhuka nonzo, nonkenda zaKarunga nazo yipo azi vhuka unene nye. 21Ano moomu da pangera nonzo uzuni, di twaredese vantu konomfa, noufenkenda waKarunga yimo au pangere pwantaantani, u va twaredese kouhungami nokomwenyo gwanarunye mwaJesus Kristusa, Hompa gwetu.
Currently Selected:
Varoma 5: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003