Varoma 3
3
1Eyi va pitakana po Vajuda vapeke, yipi yo po nye? Ndi zene vamba mulyo gwazo musinke nye? 2Mulyo gwazo munene unene. Somuhoverera, Vajuda kwa va huguvarera nonkango daKarunga. 3Ee ngapi nye, ngano asi vamwe kapi va pulire? Makura asi uhapuli wawo u dimise po nye ulimburukwi waKarunga ndi? 4Nampili kuna manga! Nye Karunga yige tupu munasili, nampili vantu navenye va kare woyimpempa. Moomu va tjanga asi:
“Ntani va ku diva asi ove Muhungami mononkango,
ove hena o funde ntene tava ku pangura.”
5Yirugana yetu yoyidona sene yi horora uhungami waKarunga, ngapi nye opo ose? Tu tante nye asi Karunga kupuka, ntene a tu handukira ndi? Apa ame kuna kuuyunga pantu. 6Nampili kuna manga! Nsene asi yimo no, Karunga omu na pangura‐pangura uzuni ngapi?
7Ano nsene asi yimpempa yange kuhorora nawa unasili waKarunga asi a yererepere po, yinke hena eyi nava kandwilira nge kounzoni? 8Ndi tu rugane nye moomu ava tu swaura oku tava rundire vamwe asi, ose kutanta asi, “Atu ruganeni udona, uwa ntani ngau horoka po?” Wokuuyunga yininke yangesi ngava va pangura mouhunga, moomu va fira.
Kutupu muntu ogu ga hungama
9Nani ngapi nani? Ose Vajuda nyose nye hasa, twa pitakana vapagani ndi? Nampili kuna manga! Ame na yi tanta nare asi, a kare Mujuda ndi a kare Mugereka, navenye nonzo adi va pangere. 10Moomu va tjanga asi:
“Kutupu oku muhungami, nampili gonzambo.
11Kutupu ogu a kwata eyano ndi asi a papare Karunga.
12Navenye va tunda ko kwaKarunga, navenye kwa lipuka.
Nagumwe si a rugana uwa, nagumwe si mpili gonzambo.
13Nomuliu dawo kwa lifana
ngwendi nontoko dokuzahama.
Yimpempa kwa kara komaraka gawo.
Ano nomurungu dawo kwa kara nouhungu
ngwendi wombaroka.
14Motuna twawo yigo sa matuka, nompava da lipwira.
15Nompadi dawo kwa hwanga mokukwata mohonde.
Awo kapi ava likata‐kata kurwadeka nokudipaga.
16Nkenye apa vana vyuka
awo ehanaguro noyimpagwa yelike ava sigi po.
17Awo kapi va diva nzira zompora.
18Awo kapi va paka etjirokarunga momeho gawo.”
19Twa diva asi eyi za tanta Veta, kwa yi tantera ava va kara konhi zoVeta, va hagese po malipopero govantu navenye, makura Karunga nga pangure navenye. 20Kutupu muntu ogu a hungama kosipara saKarunga morwakusikisa mo Veta. Eyi azi rugana Veta, yokuhorwera muntu unzoni wendi.
Karunga kuhungameka vantu morwepuro
21Nye ntaantani nzira zaKarunga ezi a hungamekesa vantu, kwa zi horora, nye azo kapi za lihamena noVeta. NoVeta novaporofete nawo va yi tanta: 22Karunga kuhungamekesesa vantu kepuro lyawo mwaJesus Kristusa. Karunga kwa yi ruganena eyi navenye ava va pura Kristusa, pwa hana malisigo. 23Yeeyi navenye kwa zona, makura uyerere waKarunga yiyo va u pira. 24Karunga kuvahungameka mawoko‐woko morwankenda zendi mwaJesus Kristusa ogu ga va zowora. 25Karunga kwa mu gavera asi, monomfa dendi a vhure kufundira mo edongonono lyononzo ava va mu pura. Yimo ngesi ga horora Karunga uhungami wendi. Pwanare kwa sigililire vantu nonzo dawo ga hana kudihandukira moudidimiki wendi wouKarunga. 26Eyi kuyihepa poruveze oru rwantaantani asi Karunga a horore uhungami wendi. Age mwene ko kwa hungama, makura a hungameke hena nkenye ogu a pura Jesus.
27Eyi natu linenepekera yipi po nye? Kutupu! Mokonda zipi? Yeeyi atu sikisa mo Veta ndi? Ani hawe, ntudi yeeyi twa pura no. 28Ose tuna litezere nye katji asi, epuro yilyo ali hungamekesa muntu naKarunga. Epuro kapi ali lizuku mundiro nesikisomo lyoVeta. 29Ndi Karunga koVajuda velike ga hamena? Nani kapisi Karunga govapagani hena? Nhi, age kuhamena nokovapagani nawo. 30Karunga gumwe tupu a huru. Age, epuro yilyo a li ruganesesa Vajuda yovamba. Mepuro tupu lyoolyo, yilyo a hungamekesesa ava va dira kurugana yovamba. Nye navenye ava mouvali wawo Karunga kuvahungamekesesa kepuro lyawo. 31E, nani ezi Veta tatu zi dongwenesa po nye kepuro? Ndangose! Ose kukorekesa Veta kepuro.
Currently Selected:
Varoma 3: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003