MAPISAROME 143
143
Ekandererero lyekwafo
Episarome lyaNdafita.
1 Hompa, zuvha ekanderero lyange,
purakena malikwambero gange!
Ove Muhungami noMulimburukwi,
zuvha nge!
2Wa ha pangura nge, ame mukereli goge;
kutupu ogu ga hungama kosipara soge.
3Nkore zange za hepeka nge,
za toona nge pevhu.
Azo kwa tura nge modorongo zomundema,
yiyo na fana ngwendi vava
va fa nare.
4Ano ame tagu hara nye kupwa mo;
mutjima guna pata mo monturo.
5Ame kuna kudiworoka mazuva aga
ga ka pita;
kuna kugazara nayinye
eyi wa rugana,
kuna kuligazurura yirugana yoge nayinye.
6Ame kuna kugonwena mawoko
gange koge mekanderero;
ngwendi evhu lyekukutu
nomutjima gwange yimo
guna kunotwera.
7Zuvha nge nye, Hompa!
Ame na roroka nye!
Wa ha horama nge,
neisi ngani ka kara mokatji kava
va hegumukira mosirongo sovafe.
8Ame kwa ku huguvara;
o diworokese nge ngurangura
ehafo lyoge lyenene.
Makanderero ngano taga rondo
ga ka ku gwane;
likida nge nzira ezi nani genda.
9 Hompa, koge na vyuka, o ya popera nge;
yoworora nge kononkore dange.
10Ove nyove Karunga gwange;
ronga nge mpango zoge!
Mpepo zoge zongwa ngano
tazi gendesa nge monzira zongwa.
11Parura nge Hompa,
moomu wa yi tanta;
yoworora nge moudigu wange,
morwauwa woge!
12Dipaga nonkore dange, morwaeharo
eli wa hara nge,
hanagura vahepeki vange navenye,
morwa ame ni mukereli goge.
Currently Selected:
MAPISAROME 143: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
