MAPISAROME 144
144
Hompa ta pandwire Karunga efundo
Episarome lyaNdafita.
1Tangeni Hompa,
mupopeli gwange;
age kuronga nge yirwa,
ta yomberesa nge yita.
2Age yige mupopeli nomugameni gwange,
rugumbo nomuparuli gwange,
age yige silikandwiso
esi na huguvara,
age yige a fundire nge nomuhoko.
3 Hompa, muntu koge yinke,
o ka mu dive; munwamuntu,
o ka mu pakere mbili?
4Age kwa lifana nomunku;
mazuva gendi moomu agu gendi mundwire.
5 Hompa, nyongeka eguru,
o hegumuke;
guma nondundu, di tutumuke musi!
6Tuma nombadi di haraganese
nonkore doge;
ponya yikutji yoge yi sweme!
7Gonona kuwoko koge oko keguru,
o koke nge mo metondo lyomema,
o parure nge;
parura nge kononkondo dovageni,
8ava va dira kuuyunga rumwe usili,
yimpempa yawo
nampili kuna manga.
9Ame kuna hara ni ku dimbire
rusumo rorupe, ove Karunga;
kuna hara ni sike simburumbumba
sonongeya murongo ni ku dimbire.
10Ove kugava efundo kohompa,
yiyo o yoworora mukereli goge Ndafita.
11Parura nge kononkore dange donondona,
yoworora nge kononkondo dovanayirongo,
ava va dira kuuyunga rumwe usili,
yimpempa yawo
nampili kuna manga.
12Vana vetu wovagara mousesu wawo
ngano tava fana yimeno eyi ayi kuru
ayo yina pama.
Vana vetu wovakadi ngano tava fana
nongundi dourenga dontembeli.
13Yihete yetu ngano tayi zura
muzangu gwankenye eyi.
Nonzwi momazana getu
ngano tadi vhara
mayovi nomurongo.
14Yimuna yetu ngano tayi livhara unene,
pa ha kara udona ndi evindwiro pokuvhara.
Mononzira detu ngano tamu pili
nomutaku neguwo!
15Gerago muhoko ogu gwa kara ngesi;
gerago muhoko ogu gwa kara
naKarunga Hompa!
Currently Selected:
MAPISAROME 144: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
