MAPISAROME 141
141
Ekanderero lyongurova
Episarome lyaNdafita.
1Koge nina kukuga Hompa;
kwafa nge nye.
Purakena nge, nsene tani ku kugu.
2Tambura ekanderero lyange
ngwendi nzambo zedumba lyewa,
ano ezeruko lyomutjima gwange
ngwendi nzambo zongurova.
3 Hompa, tura ko mutakamesi kokana kange,
mukungi pevero lyomarungu gange.
4Kava nge kokurugana udona,
ndi kokulipakerera novantu
wovadona moudinikarunga wawo.
Ngano tani nyoka kuvadanesa ko
moyipito yawo!
5Muntu gomuwa kuvhura
a toone nge
ndi a tugumukire nge momuwa,
nye ame kapi ngani tarerera
muntu gomudona
a gwaveke mutwe gwange,
yeeyi ame kurwanesa nkenye apa
yirugana yendi yoyidona
mekanderero lyange.
6Vapangeli vawo apa ngava va
zugumina momakero gomamanya,
vantu ntani ngava sika po asi
nonkango dange dosili.
7Ngwendi yitji vana kutavagura
va yi tetagure,
noyisupa yawo yimo va yi rundaika ngorooro
pomakero gonontoko.
8Nye ame ko, Hompa Karunga,
nyove na huguvara;
ame epopero lyoge ani papara;
wa ha sigilira nge ni fe!
9Popera nge koyiraha eyi va tega nge,
konomugodi dovarugani woudona.
10Vadinikarunga ngano tayi va kwata
yiraha yavene,
ano ame ko ngano tani yoworoka mo.
Currently Selected:
MAPISAROME 141: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
