MAPISAROME 139
139
Ediwo nepakerombili lyaKarunga lyokusikilira mo
Komupitisilidimbisi: Episarome lyaNdafita.
1 Hompa, ove kwa kona‐kona nge,
yiyo wa diva nge!
2Wa diva nkenye eyi ani rugana;
ure‐ure o divire magazaro gange nagenye.
3Ove kumona nge apa ani rugana
ndi kuna rara;
yirugana yange nayinye wa yi diva.
4Nampili kapi na uyunga simpe,
ove nare ono diva eyi na hara kutanta.
5Ove kwa kundurukida nge nakunye;
ove kupopera nge nononkondo doge.
6Ediwo eli wa diva nge
lya pitakanena;
ame nokuvhura si kulikwata egano.
7Kupi oku ngani za ni henduke
mpepo zoge?
Kupi oku ngani vyuka asi ni ku pire momeho?
8Nsene ni ronda keguru, ove nyove ogu;
ni ka rare mosirongo sovafe,
namo mouli!
9Nampili kuna tuka ni ze kesinya
kwina koUpumezuva,
ndi ni tunge ure‐ure koUtokero oko,
10nako kouli to pitisire nge,
kouli to kwafa nge.
11Kuvhura ni hundire asi:
“Mundema gu kudumike nge,”
ndi asi: “Mutenya gu lisitunuke masiku,”
12ano koge ove nomundema googu
kapi gwa sovagana,
ga kare masiku, ngwendi mutenya.
Mundema nouzera koge ove
yiyo tupu.
13Ove nyove wa sita maruha gange nagenye;
nyove wa tura nge kumwe mezimo lyonane.
14Tani ku hamberere, yeeyi ove nyove
gokutjira po;
nayinye eyi o rugana yinene‐nene,
ayo yitetu!
Ame kwa yi diva nomwenyo gwange nagunye.
15Yisupa yange wa yi mwene
omu yina kukara po,
omu yina kugwanekera nawa‐nawa
mezimo lyonane,
16apa wa mwene nge ame simpe
nokuhampuruka nge si.
Mazuva gokuunga nge
ove nare wa ga tura mobuke zoge,
ago ga hana kukara po simpe.
17Karunga, magazaro goge yireru
omu ga digopa kwange;
nani omu ga vhuka yireru!
18Nsene ni ga vara, kuvhura
ga pitakane nondanda domuheke.
Nsene na pinduka nyame tupu hena noge.
19Karunga, omu na hara asi o dipage
vadinikarunga yireru!
Yireru omu na hara asi
varudipagavantu va lipore nge!
20Awo kuuyunga yokukudina;
edina lyoge kuliuyunga momudona.
21 Hompa, ee, yireru omu na nyenga
ava va ku nyenga!
Yireru omu na tonda
ava ava ku vyuka!
22Ame kwa va nyengerera nuunu;
kuvatara ame, awo nonkore dange.
23Konakona nge Karunga,
o dive mutjima gwange;
tara nge, o koneke magazaro gange.
24Tara, nsene asi monzira zezumbano
na kara,
ove o gendese nge hena monzira zanarunye.
Currently Selected:
MAPISAROME 139: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
