YISEWE 3

Evyukiso lyovadinkantu

1Nokudivara si eyi nina kukuronga, munwange gomugara. Nkenye apa o diworoke eyi ani ku tantere asi yiyo o rugana. 2Erongo lyange ngali ku pa ukaro woure werago. 3Eharo noulimburukwi nokuyisiga si nampili rumwe. Yi limanga monsingo; yi tjangera momutjima goge. 4Nsene o yi rugana eyi, ngano Karunga novantu ngava ku hafera.

5Huguvara Hompa nomutjima goge nagunye. Wa ha hama konondunge danyamoge. 6O diworoke Hompa mwanayinye eyi ono kurugana, makura age ta ku likida nzira zouhunga. 7Nokanunu si o ligazare asi ove o munongo nye unene; siwa po limburukwa kwaHompa o nyoke kurugana udona. 8Nsene o yi rugana, ngano ngayi kara ngwendi mutji gomuwa, gokuverura yironda yoge gu mweneke kukora koge. 9O fumadeke Hompa pokumupa nzambo zeyi yoyiwa po yosipe sanayinye eyi ayi yimi mepya lyoge. 10Nsene o yi rugana, ngano yihete yoge ngayi tenduka nombuto, ano vhinyu zoge ngano ngazi kara zonzi unene, zimwe to pungura ko.

11Nsene ta ku pukurura Hompa, munwange, yi purakena unene, ove o yi tare asi erondoro. 12Hompa kupukurura ava ga hara, moomu a pukurura guhya munwendi ogu a linenepeke. 13Gerago mugara ogu a kara munongo ogu a pongaike nondunge. 14Amo kwa kara mo mulyo gomunene kupitakana gosisiliveli; kudigwana ove kwa pitakana ngorodo. 15Unongo mulyo gwawo gwa pitakana unene mamanya gondiro; kutupu eyi wa hara yokuvhura kuheteka po. 16Unongo kukupa mwenyo gomure, rambanga ko noungawo nefumano. 17Unongo awo kuvhura u wapeke ukaro woge, tau ku gendesa mo o pite mo gwandjewa‐ndjewa. 18Ava vana kukara vanongo vanerago; unongo ngau va pa mwenyo.

19 Hompa kwa sita evhu nounongo wendi; mediwo lyendi yiyo ga tura eguru pevega lyalyo.

20Unongo wendi yiwo wa ninkisa nomukuro di pupe nomaremo ga gave mvhura kevhu.

21O likwaterere kounongo nokomayere goge; munwange. Narumwe si asi o litarerere yi ku tunde. 22Ayo ngayi ku pa mwenyo gomuwa gerago. 23Makura ngo gende nawa monzira zoge, nokupunduka si. 24Nsene to ka rara kapi hena to tjira, masiku nagenye to ponyoka tupu yoyiwa. 25Kapi ngo kara nowoma wehanauko lyokuliharuka, ngeli ali wizire vadinikarunga ngwendi kakunguru. 26Hompa nga ku yoworora. Kapi nga ku tarerera o lyate mosiraha.

27O ruganene vanaruhepo uwa, nsene kuvhura kuyirugana. 28Narumwe si kutantera mumaparambo goge asi a ndindire dogoro komungura, ove nye kuvhura o mu kwafe poopo. 29Nokugazarera si mumaparambo goge yuma yokumukoresa; nendi mwa likundama, ga ku huguvara. 30Nokutangura si nomuntu mawoko‐woko, age nye ga hana kukurugana rumwe yoyidona. 31Nokupakera si vakorokotji mfudu, ndi asi o tokore kurugana moomu ava rugana awo, 32yeeyi Hompa kwa tonda ava ava rugana udona, nye vahungami ta va tura mougami wendi. 33Hompa kutura efingiliro komambo govadinikarunga, nye mambo govahungami ta ga tungike. 34Ava ava swaura Karunga, nage ta va swaura, nye age kufira nkenda ava ava linunupike. 35Vanongo kuliwongerera efumano, ano vagova kuvhukisa nomuga davene.

Currently Selected:

YISEWE 3: KWN

Highlight

Compare

Copy