YISEWE 4
4
Uwa wounongo
1Omu purakene eyi a mu rongo guhyeni, vana vange. Omu yi pakere mbili, makura ngomu gwane nondunge. 2Eyi nina kumuronga yiwa, ano nayinye omu yi diworoke. 3Apa na kere unona wange, nyamelike mugara povakurona vange, 4otate ngava rongo nge. Kuvhura va tantere nge asi: “O diworoke eyi nina kukutantera, nokanunu si asi o yi divare. Rugana moomu nina kukutantera, makura ngo kare nomwenyo. 5Vhukisa unongo o lipaparere mayere! Nokudivara si ndi asi o ture komugongo eyi nina kutanta. 6Nokuzumba si unongo, awo ngau ku popera; o u hare, makura awo ngau ku yoworore. 7Kugwana unongo yiso sininke sosinene po esi no vhura kurugana. Nkenye eyi ya peke ono kugwana, papara mayere. 8Hara unongo, makura awo ngau ku ninke o kare munene. U lidingira ngau ku retere efumano. 9Awo ngau kara efumano lyoge lyokuza komeho.”
10Purakena nge, munwange. Yi kwata unene eyi nina kukutantera, makura ngo kare nomwenyo gokupukura pevhu. 11Na ku ronga unongo yiyo na ku likida omu ava kara vantu. 12Nayimwe si ngayi ku gwana monzira zoge, nsene o genda panandunge, ove hena kapi ngo punduka nsene to duka. 13Nkenye apa to diworoka eyi wa lironga. Erongo lyoge yiko kukaramwenyo koge — li kwata mawoko gavali wa ha li zengeda. 14Nokuza si oku ava zi vantu wovadona. Nokukwama si sihonena sovadinikarunga. 15Nokuyirugana si! O suwurukwe udona! O u nyoke to gendi monzira zoge. 16Vadinikarunga kapi ava rara nsene kapi vana rugana yoyidona. Awo kulisindana nange vana kupundukisa muntu ntani nye. 17Udinikarunga noukorokotji kwawo awo ngwendi nondya noyinwa.
18Nzira ezi ava gendi vahungami, ngwendi ezuva lina kusa, taku zere tupu taku zere dogoro mutenya tagu wiza. 19Nzira zovadinikarunga kwa sovagana ngwendi mundema. Awo kugwa, nye kapi ava mono asi yinke eyi vana punduka.
20O pakere mbili eyi nina kukutantera, munwange. Purakena nonkango dange. 21Wa ha di tarerera di ku tunde. O di diworoke to di paka komutjima goge. 22Ado ngadi gava mwenyo neveruko kwankenye ogu a di zuvhu. 23O takamese asi ngapi omu no gazara; ukaro woge yigazo yoge yiyo ayi u pangere. 24Narumwe si kutanta yuma ya hana asi yosili. Yimpempa nononkango depukiso to yi pakere kwina. 25Meho goge aga vyukilire kutara kooko kounasili; wa ha zenzereka mutwe goge monomuga. 26O gazare nawa eyi ono kurugana, makura nayinye eyi ngo rugana tayi ku retere uwa. 27Tonda udona o vyukilire kugenda. Nokuzapuka mo si ntambo zimwe monzira za hungama.
Currently Selected:
YISEWE 4: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
