YISEWE 22
22
1Edina lya fumana lya pitakana emona lyenzi, kukuhara kwa pitakana ngorodo nosisiliveli.
2Ngawo nomuhepwe navenye koyili oyo: navenye Hompa ga va sita.
3Vantu wonondunge kumona udigu tau wiza, makura tava u henduka, nye ava va hana kugazara kuvyukilira mo, makura konyima ntani vana kulivera.
4O limburukwe kwaHompa, to linunupike, makura ngo gwane maugawo nefumano nomwenyo gomure.
5Nsene wa hara mwenyo goge, o kare ure noyiraha eyi ayi kwata vadinikarunga konzira.
6O ronge munona asi ngapi omu nga kara, makura age nga yi diworoke moukaro wendi naunye.
7Vahepwe vapika wongawo. Kulya makongo goyimaliva, to kara mupika gogu ga yi ku pa.
8Ogu a kunu mbuto zoudona, ezonauko nga teza, makura ehepeko eli a hepeke vakwawo tali haga.
9Kara nonkenda o pe ko muhepwe nondya doge, makura ngava ku tungikire mwarwayo.
10Nyoka vaswauli, makura ngapa pire mavhunguto nonomutangu nomatuko.
11Nsene wa hara ukuhuki wokomutjima noruuyungo rombili, hompa nga kara mukweni.
12 Hompa kupopera usili pokupengesa nonkango dovanayimpempa.
13Mugara goudwa kukara membo; age kutanta asi nyime ta ka mu gwana nsene a pwaga ponze.
14Ruhonda ekero lyere — ava ali gwana ehandu lyaHompa yimo ava gwire.
15Ugova nsene una kakatere momutjima gomunona, yinyanyi yepukururo yiyo ayi u tjida mo.
16Nsene o pa ngawo mauhwi ndi o nyokome muhepwe asi ga ha ngawopa, nyamoge ngo kara hepwere.
Mauyungo gounongo nomurongo ntatu
17Purakena, ame kuna hara ni ku ronge eyi va tanta vanongo. Konakona marongo gawo, 18makura ngo hafe apa ngo ga diworoka, ngaga kare momutjima goge. 19Ame kuna ku harere ni ture ehuguvaro lyoge mwaHompa; yiyo nye nani ga ku tanterera apa ngesi. 20Ame kwa ku tjangera mauyungo nomurongo ntatu. Ago kwa kara nediwo nevyukiso lyewa, 21makura ngaga ku ronge asi usili sininke musinke. Nsene ngava ku tuma asi o ka u gwane, ngo ka reta elimbururo lyokuhungama.
1
22Wa ha hakana muhepwe asi morwauhepwe wendi; ndi asi o hepeke ava va hana ekwafo mompanguro. 23Hompa nga va kwatera mo nonkango dawo, age nga zonagura nomwenyo dava ngava zonagura dawo.
2
24Walye o likwata ukwawo nava vehandu wonompepo doukorokotji. 25Kuvhura o lironge yikara yawo, makura kapi ngo vhura hena kurunduruka.
3
26Nokutumbwidira si asi ngayi ku hamena yifutwa yomuntu peke. 27Nsene ngayi ku vhura kufuta, makura nouro woge woowu ngava twara.
4
28Nokanunusi o rundurure mururani gwanare, ogu va tulire po onyokokuru.
5
29Likida nge mugara ogu a rugana yoyiwa, makura ame ngani ku likide mugara ogu ga pitakana sinzi sombunga zohompa womakuto.
Currently Selected:
YISEWE 22: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
