YISEWE 21
21
1Yigazo yaHompa kwa kara mepangero lyaHompa moomu a pangere kupupa komema. Age kuyitwaredera nkenye oku ana hara.
2Ove kuvhura o gazare asi nkenye eyi o rugana youhunga, nye diworoka asi Hompa yige a konakona mpepo.
3O rugane youhunga ayo yiwa; oyo kuhafesa Hompa kupitakana yokumuretara nonzambo.
4Vadinikarunga kuvapangera ezinzameho nokulitumba kwawo, ano ayo nzo.
5O faneke nawa yuma yoge ngo gwane mo yoyinzi; nsene o rugana yampuku zange pya usimbu, kapi ngo gwana mo eyi yina ku gwanene.
6Emona lyokugwanena moyimpempa kuhanauka po usimbu, nye ngapa katu popi nare yina kutwara monomfa.
7Vadinikarunga ukorokotji wavene yiwo au va pangura; awo kunyoka kurugana youhunga.
8Vanzoni kugenda monzira zokupenga; ava va hana nzo kurugana youhunga.
9Kukara peguru lyondunda hasa, kwa pitakana kutunga nzugo zimwe tupu nomukadi gokana.
10Vadinikarunga kwa kara nkenye apa nonzara zoudona; kapi va kara nonkenda zovantu.
11Muswauli nsene tava mu futisa, nogu ga hana magazaro, nage ta lirongere ko. Munongo kulironga kweyi ava mu rongo.
12Karunga, muhungami, ga diva eyi ayi kara momambo govadinikarunga; ano age nga hanagura po vadinikarunga.
13Nsene o nyoka kupurakena nkugo zomuhepwe, nove nkugo zoge zekwafo kapi ngava zi zuvha.
14Nsene asi muntu ana ku handukire, sigava somokahorehore tasi mu ninkisa a liture.
15Nsene youhunga vana rugana, vantu wovawa kuhafa, nye vantu wovadona awo kuvaretera utjirwe.
16Nomfa kwa ndindira nkenye ogu a zapuka mo monondunge donongwa.
17Ogu ga hara mabodjano, ngaru mu gwana ruhepo, ano ogu ga hara vhinyu nomagadi kapi nga kara ngawo.
18Vadinikarunga vene ava liretere ruhepo oru va harera vantu wovawa.
19Yokukakara momburundu hasa, kapisi kumwe neyi yokukara nomukadi goyisivana gokana.
20Emona noyibodjana kwa kara momambo govanandunge, nye vagova awo kuhanagura yimaliva yawo mosikando.
21O kare nombili nosili, makura ngo kare nomwenyo gomure; vantu ngava ku fumadeka tava ku rugana momuwa.
22Mukurona govakwayita gonondunge kuvhura a guse sitata esi ava popere vagara wononkondo, ta hanagura makuma aga va huguvara.
23Nsene kwa hara asi, wa ha ku gwana udigu, o gazare nawa eyi o uyunga.
24Likida nge muntu goyimpempa, makura ame ni ku likide gokulitumba ga linenepeka gwankenye omu.
25Muntu goudwa ogu a nyoka kurugana mwene ana kulidipaga; 26yirugana yooyo yokugazara eyi ana hara kugwana. Muhungami age kugava ga hana uruva.
27 Hompa kwa yi nyenga yokumuzambera vadinikarunga nonzambo, unene nsene tava yi rugana nonompepo donondona.
28Umbangi womunayimpempa kapi ava u huguvara, nye nkango zogu a gazara nawa yuma, kuzitambura.
29Vahungami kwa lihuguvara vene; vadinikarunga kunyoka paapa va hulira.
30Kutupu unongo ndi nondunge ndi epukururo ali kwafa nsene Hompa kapi ga ku hama.
31Kuvhura o wapaikire nonkambe yita, nye Hompa yige a gava efundo.
Currently Selected:
YISEWE 21: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
