YISEWE 23
23
6
1Nsene kuna hingire o lye nomunenentu, gazara asi nalye ono kara. 2Nsene kuna kara neharo lyenene lyokulya, linyokera nyamoge. 3Wa ha kara nedowo lyonondya donongwa edi ana kugava; kuvhura a hare kukugombeka.
7
4Kara nounongo una gwana po asi wa ha lirorora nyomoge mokukondja asi o kare ngawo. 5Yimaliva nsene yi ku za momeho, kufana ngwendi yeyi asi mavava yina mene yi tuke yi ze pere moomu ali tuka ekuvi.
8
6Wa ha lya kosiliro somugara ogu ga ku nyenga ndi asi o dovaukire nondya dendi donongwa. 7“Wiza yo guse po hena,” yimo na tanta, nye nani kapisi yimo ana gazara. Eyi ana kugazara yeeyi ya mu kara. 8Ngo yi rusa mo eyi ono li, makura nonkango doge nadinye mwangoso.
9
9Wa ha hetekera kuuyungira mugova nondunge; age nokuyipakera si mbili.
10
10Nokurundurura si mururani gwanare ndi o ture mo mapya gononsigwe. 11Hompa yige mupopeli gwawo gononkondo, age yige nga va kwatera mo nonkango dawo kweni.
11
12O purakene nawa‐nawa komurongi goge, to lirongo nayinye eyi ono kuvhura.
12
13Wa ha limbilirwa kuronga munona nonkedi donongwa. Etoono lyewa kapi tali mu dipaga. 14Yokumurugana ngoso, mwenyo gwendi ono kuparura.
13
15Munwange, nsene o kara munongo, ngano ngani hafa unene. 16Ngani litumbadeka nsene ngani ku zuvha to uyunga nonkango dounongo.
14
17Walye o kara nesupa lyovantu wovanzoni; nye o tjire nkenye apa Hompa. 18Nsene yi kara ngoso, kuninka asi ove meho zoge mehozuni.
15
19Purakena, munwange, kara munongo, o kare nosinka sosinene sokugazara nzira ezi ono kara. 20Nokulipakerera si novantu ava ava nu unene vhinyu ndi vava ava lihoto unene nondya. 21Nonkorwe nava womakurulya ngava kara nohepwe. Nsene o ninka asi kooko kulya nokurara makura, naruvali si nare kuna kudwara yinyakwi.
16
22O purakene koguhwo; ngano kwa pilire po awo, ngano kapi wa kara po. Ano onyoko nsene vana kurupa, wa ha va dina.
23Usili, unongo, kulironga nondunge donongwa eyi yiwa kuranda, nye mokuyirandesa udigu unene.
24Muntu gomuhungami guhwe ga kara nokonda zokuhafa. Ove kuvhura kulitumbadekera mwamunoge gonondunge.
25O ninke oguhwo nonyoko tava ku litumbadekere; pa onyoko ruhafo oro.
17
26O purakene nawa munwange, ano ukaro wange u kare sihonena soge. 27Vakadi woyihora nava worukehe owo siraha sonomfa. 28Awo kukundindira ngwendi vanamahaka, awo hena kuninkisa vagara wovanzi va dire kuvahuguvara.
18
29-30Likida nge gumwe ogu a nu unene, makura ame ngani ku likide ogu ga kara mehudi ogu a liretere mwene nkenda, nkenye apa kureta udigu, nkenye apa kusivana. Meho kwa geha ngwendi honde, age kwa kara noyito eyi ya fira ngano kupira po nye. 31Walye azi ku hongorora vhinyu, mpili ngomu za geha unene, mpili ngomu azi paima monkinda, nomu azi sonotoka pomuliu. 32Mungura to zuvhu ngwendi ezoka lyouhungu lina ku humu. 33To mono yimoneka eyi ya dira kukara po, ove kapi ngo vhura kugazara ndi o uyunge eyi yina zere. 34Ngo zuvha ngwendi gogu ana rara mokatji kefuta, ana kara nouvera wemefuta, ngwendi gogu ana rarere kondungu zositji sosikepa. 35Makura ngo tante asi: “Kava rorwere nge. Nampo kava toonene nge, nye kapi nina yi divilisa. Siruwoke nani pinduka? Kuna hara ni ka likoreke.”
Currently Selected:
YISEWE 23: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
