YISEWE 16
16
1Ose kuvhura kugazara nompangera detu, nye Karunga yige a mana po nayinye.
2Kuvhura o gazare asi nayinye eyi o gazara youhunga, nye Hompa yige a konakona nompepo doge.
3O hundire Hompa a tungike nompangera doge, ntani ngo ragopa mokudisikisa mo.
4Nkenye esi ga rugana Hompa sa kara nositambo saso; ano sitambo sovadinikarunga ehanauko.
5 Hompa kwa nyenga nkenye ogu ga litumba; age kapi nga va tarerera nampili kanunu asi va yoworoke mo mehandukiro.
6O kare neharo nelimburuko, makura Karunga nga ku dongwenene po nzo zoge. O limburukwe kwaHompa, makura nayimwe si yoyidona ngayi ku horokera.
7Nsene o hafesa Hompa, kuvhura o ninke nonkore doge di kare vakweni.
8Hasa kukara neyi yoyinunu, nye yokugwanena mousili, ya pitakana kukara neyi yoyinzi, nye yokugwanena moyimpempa.
9Ove kuvhura o gazare nompangera doge, nye Karunga yige gokupanga yirugana yoge.
10 Hompa kuuyunga nononkondo dosiuhompa; ano matokoro gendi nkenye apa kwa hungama.
11 Hompa kwa hara yiviha noyihetekeso yi kare pausili, ano nkenye ndando zi hungame.
12Ohompa kapi ava tarerere udona, yeeyi asi uhungami yiwo au nkondopeke epangero.
13Hompa kwa hara kuzuvha usili, age hena kwa hara ava ava uyunga usili.
14Muntu gomunongo kukambadara kuhafesa hompa; ano hompa nsene a handuka, gumwe kuvhura a fe.
15Nsene asi hompa sipara sendi sina hafa kwa lifana nomaremo aga aga reta mvhura zontemuna — amo mwenyo gwa kara mo.
16Kukara noungono nediwo kwa pitakana unene‐nene kukara nongorodo nosisiliveli.
17Vantu wovawa kugenda monzira ezi za tonda udona; ano o tare nawa oku ono vyuka — ayo kuwapa yi parure mwenyo goge.
18Elinenepeko kureta ehanauko, ano elitumbo kureta epunduko.
19Hasa kulinunupika o kare hepwere, ya pitakana yokukara gumwe povalitumbi ngomu ligavere nawo yokukwata.
20Ogu a pakere mbili eyi vana kumuronga, nga gwana uwa; ano ogu ga huguvara Hompa, nga kara nerago.
21Muntu gomunongo ogu ga pya kumudivira konondunge dendi. Mokuvhuka uwa wononkango dendi, yimo mokuvhuka hena erago lyendi.
22Unongo runone romwenyo komunongo, nye kuheteka kuronga magova, oyo kumana po tupu siruwo.
23Vantu wonondunge kuhova kugazara, ntani vana kuuyunga; makura eyi vana kuuyunga kuyihuguvara unene.
24Nonkango dombili kwa fana usi — nontovara mokumakera, ado nongwa kekanguko lyoge.
25Pa kara nzira ezi ava tara vantu asi za hungama, nani nye azo kutwara konomfa.
26Eharo lyokulya lyomurugani kumuninkisa a rugane unene, morwa age kwa hara kugusa po nzara zendi.
27Vantu wovadona kwa hara kukoresa vakwaawo; nononkango dawo deedi kutwera udona.
28Vadinikarunga kuhanesa nompata; awo kukatura udigu, makura maukwawo taga teka po.
29Vantu wovakorokotji kukumbagera vakwaawo, tava va twaredesere kezonauko.
30Kutara nawa vantu ava vana kukuzora sirungu tava ku divire meho; awo kuna gazara yuma yoyidona.
31Mwenyo gomure mfeto zouhungami; ano nomvhi nkata zefumano.
32Kukara mudidimiki kwa pitakana unankondo. Ano kulipangera nyomoge kwa pitakana kupangera yitata mudima.
33Vantu kurugana yopaufungu‐fungu va lirongere po eharo lyaKarunga, nye etokoro kutunda nkenye apa kwaKarunga mwene.
Currently Selected:
YISEWE 16: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
