YISEWE 15
15
1Elimbururo lyombili, kumweneka ehandu, nye lyononkango dehandu, kuhwameka unene ehandu.
2Vanongo nsene tava uyunga, kudivisa usili wonondunge wawo, nye magova kuuyunga da hana mutompo.
3 Hompa kumona nkenye oku kuna kuhoroka yuma, age kutumona, nsene ose kuna kurugana uwa ndi udona.
4Nonkango dombili kureta mwenyo, nye nonkango dougara kuhepeka mpepo zoge.
5Kudira kupakera mbili eyi va ku ronga oguho, ugova, nye nsene o tambura mapukururo gawo, to kara nonondunge.
6Vahungami kukara nougawo wawo, nye vadinikarunga kuzumbanesa wawo, nsene maruveze goudigu taga wiza.
7Nondunge kudihanesa vantu wonondunge, nye kapisi magova.
8 Hompa kuhafa nsene asi vantu wouhunga tava kanderere, nye ta nyenge nonzambo edi ava mu retere vadinikarunga.
9 Hompa kwa nyenga nonzira dovantu wovadona, nye kwa hara dava ava rugana uwa.
10Nsene o rugana udona, ngava ku pangura nawa‐nawa. Ove ngo fa nsene kapi ono kusiga va ku ture monzira.
11Nosirongo si sovafe naso nokuvhura si kukandana Hompa mokudiva eyi ya kara mo. Muntu omu na vhura kuhoreka magazaro gendi Karunga ngapi?
12Vantu womakoto kapi va hara kuvapukurura. Awo kapi ava pura kowakwawo wounongo mavyukiso nampili nakauke.
13Vantu nsene vana hafa, kumenya‐menya, nye nsene vana guwu, kusuva yipara.
14Vantu wonondunge kuhara kulironga, nye magova ago kugwanena nougova wago.
15Mwenyo gohepere, kwa kara moudigu narunye, nye vantu ava ava kara nerago, kuhafera ukaro wawo.
16Sosiwa sokukara hepere nokutjira Hompa, kupitakana yokukara ngawo nye momaudigu.
17Sa vhura po sikwawo sokulya yikwahidi novantu ava wa hara, kupitakana yokulya nyama zongwa ezi wa hara, apo utondwe po.
18Ehandu lyenene kureta nomutangu, nye kulimona usima kureta mbili.
19Ano ove nsene o kara mudwa, to likokere nkenye udigu, nye nsene o kara pausili, kapi ngo kara nomaudigu.
20Mumati gounongo kuhafesa oguhwe, nye egova kuswawisa tupu ozina.
21Vantu wovapote kuhafera ugova wawo, nye munongo kurugana eyi ya hungama.
22Tambura mapukururo nagenye, moomu o vhulire, makura to ragopa. Nye nsene kapisi yimo, to hudipara.
23Ee, ehafo musinke lyokugwana nonkango dina zire mo poruveze rwado.
24Vantu wounongo kugenda monzira zokuvyuka meguru komwenyo. Awo kapi ava gendi monzira zepevhu ezi za vyuka monomfa.
25 Hompa nga hanagura po mambo govalinenepeki, nye nga gamena emona lyovafisavaya.
26 Hompa kwa nyenga magazaro gomadona, nye age kwa hara nonkango dombili.
27Nsene o heteka kupapara emona lyomoyimpempa, embo lyoge ono kutwara moudigu. Walye o tambura yuma yomoufutunkume, makura ngo kare nomwenyo gomure.
28Vantu wovawa kuhova tanko kugazara, ntani ana kulimburura. Wovadona kulimburura usimbu, nye udigu ayi reta.
29Vantu wovawa nsene tava kanderere, Hompa ta purakene, nye wovadona kapi a va pakere mbili.
30Yipara youzerere kukuhafesa, ano mbudi zongwa kukupepereresa.
31Nsene kupurakena apa ava ku pukurura, ove o munongo.
32Nsene kunyoka kulironga, nyamoge ono kulihepeka. Nsene o tambura epukururo, ngo kara o munongo.
33Efumadeko kwaHompa erongo mwalyene. Wa hepa muhowo kulinunupika, ntani ono kugwana efumano.
Currently Selected:
YISEWE 15: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
