Vafilipi 4

Makorangedo nomapukururo

1Vakwetu one ava na hara, ava na tokomena, one ehafo lyange, mweni ani fumanene. Pameni mwaHompa, vakwetu one ava na hara.

2Ewodiya nove Sintike, tani mu korangeda, lizeni mutjima gumwe mwaHompa. 3Nove murugani mukwetu, ogu na huguvara, tani ku hundire asi o kwafe vakadi ava. Yeeyi awo ngava rugana unene kumwe name mokuhanesa Mbudi zoNgwa. Awo ngava rugana hena kumwe naKeremenisi novarugani vakwetu vamwe, ava va tjanga madina gawo mobuke zomwenyo.

4Omu hafe nkenye apa mwaHompa. Tani rugwire mo hena asi, omu hafe.

5Ufenkenda weni au moneke kovantu navenye. Hompa popepi ana kara. 6Walye omu kara nosinka soyuma. Nye momakanderero geni omu hundire nkenye eyi muna hepa kwaKarunga. Omu yi hundire nkenye apa nonomutjima dompandu. 7Ano mbili zaKarunga, ezi za pitakana unene nondunge nadinye, ngazi kungira nomwenyo deni nomagazaro geni mwaJesus Kristusa.

8Pokuhulisa vakwetu, yi kare yosili, yekuto, yokuhungama, youkuhuki neyi ava hara vantu neyi ava fumadeke, zi kare nkareso zongwa ndi yeyi ya wapera epando, yiyo nomu gazara po. 9Eyi mwa lironga neyi mwa tambura neyi mwa zuvha neyi mwa mona kwange, omu yi sikise mo, makura Karunga gombili nga kara neni.

Mpandu morwamauhwi

10One asi ehafo musi kounene na kara nalyo mwaHompa! Nare mwa here kupakera nge mbili, nye kapi mwa gwene mpito zokuyirugana. 11Nye ame kapi nina kuyiuyungira yangesi morwaruhepo rwange, hawe, yeeyi na liyikisa kukara nombili neyi na kara nayo. 12Ame na diva kukara moruhepo ndi moruyiga. Na liyikisa hena yikara nayinye noyininke nayinye, mekuta ndi monzara, ni kare neyi yoyinzi ndi yoyisesu tupu. 13Ame kuvhura nayinye nononkondo dogu a pameke nge.

14Nye mwa rugana yoyiwa pokukwafa nge momaudigu gange. 15Amesi one Vafilipi mwa diva nyonevene asi pokuvareka kuudisa Mbudi zoNgwa zaKarunga apa na tundire moMakedoniya, mbungakriste nazimwe si ezi twa lizuvhire nazo yokuhamena kugava nokutambura, hawe, nyonelike thi! 16Napa si na kere moTesaronika, mwa tuminine nge rumwe ndi ruvali ngoso, mu kwafe nge moruhepo rwange. 17Kapisi ngwendi asi ame kuna hara mauhwi, nani nye nyone nina harere mu gwanene po. 18Nye nayinye ya ya sika, nayene yina vhukire nge. Ntaantani, hawe, yina gwana po nye! Nayinye eyi na hepa nayo nina kara, yeeyi Epafuraditusa, ntaantani ka reterere nge mauhwi gokutunda kweni. Ago nzambo zedumba lyewa, nzambo ezi a tambura Karunga nehafo lyenene. 19Nye Karunga gwange nga mu pa nkenye eyi mwa hepa, pougawo wendi wokusikilira mo mouyerere mwaJesus Kristusa. 20Karunga Guhyetu ava mu fumadeke narunye‐narunye. Amen!

Malirekero

21Kundireni po vapongoki navenye mwaJesus Kristusa. Vakwetu ava nina kara nawo oku, vana mu kundisire po. 22Mbunga nazinye zovapongoki zina mu kundisire po, nye unene‐nene wombara zahompa gwaRoma.

23Hompa Jesus Kristusa a mu fire nkenda!

Currently Selected:

Vafilipi 4: KWN

Highlight

Copy