OBADJA 1
1
1Ou yiwo uporofete waObadja: Eyi yiyo ana kutanta Hompa, Mupangeli yokuhamena Edomu.
Hompa nga futisa Edomu
Hompa kwa tuma ntumi zendi konomuhoko,
ano ose twa zuvha mbudi zendi asi:
“Liwapaikeni! Tu zeni tu ka
rwise Edomu!”
2 Hompa ta tantere Edomu asi:
“Ngani ku gusa nonkondo,
makura navenye ngava ku swaure.
3Kulinenepeka kweni kwa mu
twara mezome.
Nkurusitata seni hote zemanya lyekukutu;
embo lyoge keguru konondundu
lya kara,
makura yiyo o litantere nyamoge asi:
‘Yilye ogu nga hagumuna nge ko?’
4Nampili ngomu o tungire embo lyoge
keguru ngwendi sikorogo sekuvi,
li moneke ngwendi pokatji
konombungururu lya kara,
ngani ku hagumuna ko tupu.
5“Apa ava wiza vawidi masiku,
kugusa nkenye eyi vana hara.
Apa ava nyaga vantu mandjembere,
nkenye apa kuhupisa mo gomasesu.
Nye nonkore deni da mu komba
mo nuunu.
6Nontekuru daEsau, emona lyeni
va li kwata.
7Vahameni veni va mu kumbagera;
va mu tjida mo mosirongo seni.
Vantu ava mwa kere nawo mbili,
yiwo vana piruka va mu kwate.
Vakweneni ava ngomu li nawo
yiwo va mu tega rutenda;
awo kuna kumuninka asi:
‘Wene unandunge wawo
yiwo upi nye?’
8“Ezuva eli ngani futisa Edomu,
ngani hanagura po vanandunge
tani kombo po unongo wawo naunye.
9Varwi womoTemani ngava tjira,
ano vakwayita navenye
womoEdomu ngava va dipaga.
Eyi ya retesere efutiso lyaEdomu
10“Morwa mwa hakana, yiyo mwa
dipaga vekoro lyeni,
nontekuru daJakopo,
yiyo ngava mu hanagwira
mu swauke dogoro narunye.
11One kwa lipongwere ko pezuva olyo
apa da tezagwire nonkore
marungavero gawo.
One kwa yipire ngwendi wowo
vageni ava va twere emona lyaJerusarema
tava ka ligavera.
12Kapi mwa fililire ngano kuhafera
udigu wovakweneni moJuda.
Kapi mwa fira ngano kuhafera
ezuva lyetekopo lyawo.
Kapi mwa fira ngano kuvazora
moruhodi rwawo.
13Kapi mwa fira ngano kuhwilira
mositata sovantu vange
mu ka hafere ruhepo rwawo
oku tomu gusa ugawo wawo
mezuva lyoudigu wawo.
14Kapi mwa fira kusikama ponompangwanzira
mu kwate ava vana kuhara kuduka.
Kapi mwa fira kuvagava kononkore
mezuva lyoruhodi rwawo.
Karunga nga pangura nomuhoko
15“Ezuva pepi lina kara,
apa ngani pangura ame Hompa
nomuhoko nadinye.
Edomu, eyi wa rugana,
ngava yi ku rugana nove.
Ngani ku tengwidira eyi wa gava.
16Vantu vange kwa nwa nkinda
zoururu zefutiso
kondundu zange zokupongoka.
Nye nomuhoko nadinye
domaparambo ngadi nwa nye
nkinda zoururu ko unene zefutiso;
ngava zi dindurura
tava dongonoka po.
Efundo lyaIsraeli
17“Nye kondundu zaSiyoni
vamwe ngava siuka,
makura tali kara evega lyokupongoka.
Vantu vaJakopo ngava gusa
sirongo sawo esi sa va tumbukira.
18Vantu vaJakopo naJosefa
ngava fana ngwendi mundiro;
ngava hanagura po vantu vaEsau
moomu agu veveke mundiro yirwenge.
Kutupu ntekuru zaEsau ezi
ngazi hupa po.
Ame Hompa nyame na yi uyunga.
19“Vantu wokoMbindakano zaJuda
ngava gusa Edomu;
ava ngava tunda konondundu
koUtokero ngava kwata Filisitiya;
Vaisraeli ngava gusa sirongo
saEfurayimi naSamaliya;
vantu vaMbenyameni
ngava gusa Giliyata.
20Vakwayita wononkwate
wokoMuzogo gwaIsraeli
ngava tengura
tava kwata
Fenisiya dogoro koSarefata.
Nonkwate domoJerusarema edi
da kara moSaredisi ngadi kwata
yitata yoMbindakano zaJuda.
21Vafundi womoJerusarema ngava
rwisa Edomu, ngava si pangere.
Ano Hompa mwene yige
nga kara mupangeli.”
Currently Selected:
OBADJA 1: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
