JONA 1
1
Jona ta nyoka kulimburukwa kwaHompa
1Ezuva limwe Hompa kwa uyungisire Jona izaAmitayi. 2Ta tanta asi: “Zende kositata sosinene Ninivhe o ka si udisire; udinikarunga wovantu vamo nina u mono.” 3Jona makura ta vyuka nakopeke asi a duke Hompa. Ta zi koJopa, oku ga ka gwene sikepa sina kuza koSipaniya. Ta futu yimaliva, makura ta perama kumwe nombunga va ze koSipaniya, oku na ka vanda Hompa. 4Hompa makura ta tumu mpepo zondigu mefuta, kakunguru kwa kere gomudigu, sikepa tasi kara mosimpagwa sokutekauka po. 5Vanasikepa kwa tjilire tava kugu ekwafo, nkenye ogu kwakarunga gwendi. Mokurerupika simpagwa tava zugumine murongero mefuta. Opo ngoso age Jona ana zi konhi zosikepa ana rara pokoso.
6Mukurona gosikepa ta ka mu gwana ko, ta mu tantere asi: “Kurarera yinke ngesi? Pinduka o kanderere ekwafo kwaKarunga goge. Mpamwe na tu fira nkenda a parure nomwenyo detu.”
7Vanasikepa tava litantera‐tantere asi: “Tu zugumeni sihoroweso tu dive asi unzoni walye ou una tu pakesa mosimpangwa esi.” Tava yi rugana, makura edina lyaJona yilyo va kwateka po. 8Makura tava mu tantere asi: “Tu tantera! Ou ngesi unzoni woge sa ndi? Yinke ono kurugana mo omu? Kosirongoke wa tunda? Ove gomuhokoke?”
9Jona ta limburura asi: “Ame ni Muhebeli. Ame kutongamena Karunga geguru, ogu ga sita evhu nefuta!” 10Jona ta twikire ko kuvatantera asi age kwa duka Hompa.
Vanasikepa tagu va pwaga, tava tanta asi: “Oyo yidona unene kuyirugana!” 11Kakunguru ta ya dida nye unene, makura vanasikepa tava mu pura asi: “Ngapi omu natu ku rugana, kakunguru a mwene?”
12Jona ta limburura asi: “Zugumineni nge mefuta, makura tali litura. Na diva asi epuko lyange yiyo ana mu gwanene ogu kakunguru.”
13Vanasikepa tava kondjo asi va tware sikepa konontere, tava dugu paapa va hulira. Nye kakunguru ta dida nye unene, nokusi vana kuza. 14Makura tava kugu kwaHompa asi: “Hompa, tuna ku kanderere, wa ha tu dipaga pokugusa mwenyo gomugara ogu! Ove Hompa, nayinye eyi moge yina kara; eyi yirugana yoge!” 15Tava gusa Jona, tava mu zugumine mefuta, makura efuta nare lyateete. 16Eyi yiyo ya ninkisire vanasikepa va tjire Hompa, makura tava zamba nzambo tava mu tumbwidire asi ngava mu kerera.
17Kompangera zaHompa makura emumfi tali mini Jona, makura ta kara mezimo nomutenya ntantu nomasiku gatatu.
Currently Selected:
JONA 1: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
