AMOSA 9
9
Epanguro lyaHompa
1Ame kwa mwene Hompa age kuna sikama posizambero. Ta gava mpangera asi: “Toona unene konomutwe donongundi dontembeli, makura yikuravero yi kankame. Di teza o di gandere konomutwe dovantu. Ava ngava hupa po, ngani va dipagera moyita. Nagumwe si ogu nga ninka asi a duke, nga ka vande. 2Mpili mosirongo sovafe ngava za, kuwoko kwange taku ka va nkwenya mo; nampili ngava ronde meguru, namo ngani ka va karumuna mo. 3Nampili va ka bate kondungu zondundu zaKarumeli, ngani ka va fungura ko tani ka va gusa ko. Nampili va ka vande nge konhi zefuta, emukuruzoka ngani tantera li ka va humine ko. 4Nampili va va tware koupika, va pite komeho zononkore dawo, ame ngani gava mpangera va va dipage. Ame kuna tokora ni va haraganese po, kapi tani va kwafa.”
5 Hompa Mupangeli gombunga
zovakwayita ta gumu evhu,
makura tali kankama;
nava navenye va tunga ko
tava kara mononkali.
Uzuni naunye ngau sikama
nye ngau gwa
ngwendi mukuro gwaNili.
6 Hompa ta tungu embo lyendi meguru
ano kontunda zevhu
ta tura ko ndunda zeguru.
Age ta zigida mema gefuta,
makura taga pimpire pevhu.
Edina lyendi yige Hompa!
7 Hompa kuna kutanta asi: “Mbunga one zaIsraeli, ame kuna kugazara unene vantu womoSudani, moomu na mu ruganena one. Ame kwa gusa Vafilisiti moGereka noVasiliya moKire, nawa‐nawa moomu na mu gusire one moEgipite. 8Ame Hompa, Mupangeli, kuna kutara sirongo esi saIsraeli sononzo. Ame ngani si komba ko konauzuni oku. Nye mazimo gaJakopo kapi ngani ga haraganesa po.
9“Yeeyi tareni, ame ngani panga asi va nyungange ezimo lyaIsraeli, moomu ava nyunganga yilya posipa. Ame ngani va nyungangera mokatji konomuhoko ni kandagure mo ava va hana mulyo. 10Vananzo ava vana kara mokatji kombunga zange, ngani va dipagera moyita — nava navenye ava tanta asi: ‘Karunga kapi ta sigilire udona, u tu hedere.’ ”
Ewapeko lyaIsraeli lyokomeho
11 Hompa kuna kutanta asi: “Ezuva ngali sika mo apa ngani tungurura sirongo saNdafita, esi sina kara ngwendi embo eli lya zunguruka li kare ndambo zohando. Makuma gaso ngani ga tungurura. Ame ngani si tungurura si kare ngwendi mwanare. 12Ano mbunga zaIsraeli ngazi ligusira eyi ya hupa mo mosirongo saEdomu nonomuhoko edi da kere dange,” yimo ana kutanta ogu nga ninka yi horoke eyi.
13 Hompa kuna kutanta asi:
“Mazuva ngaga wiza
apa ngayi kura yilya usimbu‐simbu
makura nare kuna kuyiteza,
ano mandjembere nago
ngaga kura usimbu‐simbu, makura
nare kuna kugarugana vhinyu.
Nondundu ngadi ndoka vhinyu zompe,
ano konondundugona ngazi pupa ko.
14Ame ngani tengwida vantu
vange kosirongo sawo.
Awo ngava ka tungurura yitata yawo
eyi ya zonauka
makura ngava ka tunge mo.
Awo ngava ka tapeka yikunino
yovhinyu, tava nu vhinyu;
ngava ka rugana yipata
tava ka lya eyi ngayi mena mo.”
15 Hompa Karunga gweni
kuna kutanta asi:
“Ame ngani tapeka vantu vange
mosirongo esi na va pa,
awo kapi ngava va gusa mo hena.”
Hompa Karunga gweni
yige ana yi uyunga.
Currently Selected:
AMOSA 9: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
