Numeri 9
9
Paska zauvali
1Mokwedi kokuhova komumvho gwauvali kutunda apa va tundire Vaisraeli mosirongo saEgipite, Hompa kwa tanterere Mosesa moMburundu zaSinayi asi: 2“Mbunga zoVaisraeli azi diworoke narunye kudana Sipito saPaska mosiruwo esi sa kara po, 3kutameka ngurova mezuva lyomurongo nagane lyokwedi oku mokukwama noveta nonompangera daso nadinye.” 4Makura Mosesa ta tantere mbunga zi diworoke narunye kudana Sipito saPaska. 5Awo makura tava yi rugana ngurova zezuva lyomurongo nagane lyokwedi komuhowo moMburundu zaSinayi. Mbunga makura tazi rugana nkenye aka moomu ga tanterere Hompa Mosesa.
6Nye pwa kere vagara vamwe ava va nyete morwa va kundamene kosimpu, yiyo va dililire kuwapera kudana Sipito saPaska mezuva olyo. Awo makura tava zi kwaMosesa naArona, 7tava tanta asi: “Ose tuna nyata pokuguma kosimpu, yinke nye yokutunyokesera kugava nzambo kwaHompa kumwe noVaisraeli vamwe po mosiruwo esi sa kara po?”
8Mosesa ta va limburura asi: “Ndindireni tanko, ngatu zuvhe mwaHompa omu nga pangera.”
9 Hompa kwa tanterere Mosesa 10a tantere mbunga zoVaisraeli asi: “Nkenye ogu gomomweni ndi gomoruvharo rweni nga dira kukuhuka morwakuguma kosimpu ndi kwa za ure kougenda, nye age aga harera kudana Sipito saPaska, 11vangesi kuvapulisira tupu kudiworoka kudana Sipito saPaska mongurova zezuva lyomurongo nagane lyokwedi kwauvali. Awo va si dane nye nonomboroto da hana muhahu noyimeno youruru. 12Odo nondya nokudihupisa po si asi va di tulike dogoro komungura, ano yisupa yoyimuna nayo nokuyivandagura si. Awo nawo ngava diworoke kudana Paska mokuliza nonompangera dazo nadinye. 13Nye nkenye ogu ana kuhuka pampo, age hena kapi ga za kougenda, a nyoke kudiworoka kudana Sipito saPaska, kapi ngani mu tara hena asi nage gombunga zange, morwa kapi ga gava nzambo kwange posiruwo esi sa kara po. Age yige kusimba udigu wonzo zendi.
14“Nsene asi munayirongo mwa kara nendi, nye age ana hara kudana Sipito saPaska, age nage nga diworoke kudana Paska mokuliza nonoveta nonompangera dazo nadinye. Veta ezi kwa hamena kwankenye ogu, a kare mvharerwa ndi munayirongo.”
Eremo lyomundiro
(Ex 40:34-38)
15-16Mezuva eli va dikire Nkongoronzugo zoMagwanekerero, eremo makura tali wiza tali zi kudumike. Masiku alyo kumoneka ngwendi mundiro. 17Sinene lina rondo eremo, mbunga zoVaisraeli tazi zungurura kamba, ano pokuhegumuka eremo, tava dike hena kamba. 18Mbunga ngazi zungurura kamba nokuzidika po hena, moomu a va tantere Hompa. Siruwo esi lina kara eremo kontunda zoNkongoronzugo, nawo tava kara moomo mokamba. 19Eremo nsene lina kara ko siruwo sosire kontunda zoNkongoronzugo, nawo tava limburukwa kwaHompa, nokurunduruka po si. 20Pamwe eremo kukara kontunda zoNkongoronzugo mazuva gangapi tupu; nkenye omu yina kerere, awo tava hingire mokamba ndi tava runduruka moomu ana kuvapangera Hompa. 21Pamwe eremo kukara ko tupu ngurova dogoro ngurangura makura. Ano eremo sinene lina rondo, nawo makura tava runduruka. Gu kare mutenya ga kare masiku, eremo sinene lina rondo, nawo tava runduruka. 22Nampili kuna kara ko mazuva gavali ndi kwedi kumwe ndi mvhura zimwe, siruwo esi lina kukara ko eremo kontunda zoNkongoronzugo, nawo nokurunduruka si, nye nsene lina rondo, tava runduruka. 23Awo ngava dike tava zungurura kamba mokulimburukwa konompangera daHompa edi ngadi gendere mwaMosesa.
© Egwanekerobibeli Lyanamibia 1987, 2003
© Bible Society of Namibia 1987, 2003