Numeri 8
8
Eturo lyonoramba
1 Hompa kwa tanterere Mosesa asi: 2“Tantera Arona asi nsene ta tura noramba ntano‐nambali positenteko, a di vyukise asi uzera u temene komeho.” 3Arona ta yi limburukwa, makura ta tura noramba di minikire komeho zositenteko moomu ga tanterere Hompa Mosesa. 4Kutunda keguru dogoro pevhu kwa si hambwire songorodo, si lifane nefano eli ga likidire Hompa Mosesa.
Ekuhuro lyoVarevhi nepongoro lyawo
5 Hompa kwa tanterere Mosesa asi: 6“Gusa Varevhi moVaisraeli vamwe po o va kuhure 7ngesi: to va sampagere mema gekuhuro, to va ninki va kurure marutu gawo mudima nokukuhwa yikoverero yawo mudima, makura tava kuhuka nye pampo. 8Varevhi va guse ntwedugona nonzambo ezi za kara po, nousura wonomboroto wokuduva nomagadi gononzwe. Ove o guse ntwedu zauvali zonzambo zononzo. 9Ove makura o pongeke mbunga nazinye zaIsraeli o ture Varevhi komeho zoNkongoronzugo zoMagwanekerero. 10Mbunga zoVaisraeli zi kambeke mawoko gazo konomutwe doVarevhi. 11Arona makura ta pongwere nge Varevhi, va kare sigava sokupongoka soVaisraeli, asi awo ngava ruganene nge. 12Varevhi makura tava kambeke mawoko gawo ponomutwe donontwedu mbali; zimwe zonzambo zononzo, ano ezi nkwawo zonzambo zeswakerero, asi va sikise mo sirugana sekuhuro lyopampo lyoVarevhi.
13“Pongwera nge Varevhi, va kare sigava sange sokupongoka, makura o ture Arona novana vendi wovagara moupangi wawo. 14Mwangesi yimo nye no gusa Varevhi moVaisraeli vamwe po, va kare vange. 15Pokumana kukuhura Varevhi nokuvapongora, kuwapa tupu nye kurugana awo yomoNkongoronzugo zoMagwanekerero. 16Awo kwa va pa nge mevega lyonombeli nadinye donongara doVaisraeli, makura yiyo va kara vange. 17Apa na dipagere nombeli nadinye doVaegipite, ame kwa lipongwerere nyamwange nkenye mbeli zongara zemepata lyankenye Muisraeli nedi doyimuna yawo. 18Varevhi yiwo na gusa mevega lyonombeli nadinye doVaisraeli, 19ame yiyo nina va gava kwaArona novana vendi wovagara, va kare sigava sokutunda koVaisraeli. Awo ngava ruganena Vaisraeli moNkongoronzugo zoMagwanekerero, ngava va popera koyiponga eyi ngayi va gwana, nsene tava heda pepi nEvega lyoKupongoka.”
20Makura oMosesa naArona nombunga nazinye zoVaisraeli tava pongora Varevhi, moomu ga tanterere Hompa Mosesa. 21Varevhi tava likuhura vene, tava kuhu yikoverero yawo, makura Arona ta va pongora, va kare sigava sokupongoka saHompa. Age hena ta va ruganene yirugana yekuhuro pampo. 22Makura Varevhi tava wapere nye kurugana yomoNkongoronzugo zoMagwanekerero moupangi woArona novana vendi wovagara. Mbunga makura tazi rugana nkenye aka ga tanterere Hompa Mosesa kokuhamena Varevhi.
23 Hompa kwa tanterere Mosesa asi: 24“Varevhi wokutamekera ponomvhura nomurongo mbali nantano, yiwo wokurugana yirugana yawo yomoNkongoronzugo zoMagwanekerero, 25ano nsene vana ka sika konomvhura nomurongo ntano, makura tava tundu mo moyirugana yawo. 26Kutunda opo awo yooyo yokukwafa Varevhi vakwaawo moyirugana yawo yomoNkongoronzugo, nye mwavene ko velike nokulifuminina si kuyirugana. Ngesi yimo nye no panga yirugana yoVarevhi.”
© Egwanekerobibeli Lyanamibia 1987, 2003
© Bible Society of Namibia 1987, 2003