Numeri 10
10
Nombendo dosisiliveli
1 Hompa kwa tanterere Mosesa asi: 2“Hambura nombendo mbali dosisiliveli dokuruganesa pokuzigida mbunga zi ponge nopokuzungurura kamba. 3Nsene tava twarerekeda kufuda nombendo nadinye mbali, mbunga nazinye zi ya ku umbilikide pevero lyoNkongoronzugo zoMagwanekerero. 4Nye nsenesi mbendo zimwe tupu zina kuhagara, masimbi gopomazimo taga ya ku umbilikida. 5Nsene tava hagaike kufuda, marudi aga aga hamene koUpumezuva wokamba, taga katuka ga ze. 6Nye nsene tava hagaike kufuda rwauvali, marudi aga aga hamene korwaMbindakano zokamba, taga katuka, ga ze. Ano kuhagaika kufuda kokuzungwilisa kamba, 7nye kutwarerekeda kufuda kokuzigidisa mbunga zi ponge. 8Nombendo dokufuda vana vaArona wovapristeli.
“Veta ezi nazi kwama ko ngaga zi diworoke maruvharo nagenye aga ngaga ka kara ko. 9Nsene yita yina mu gwana mosirongo seni, tomu lipopere nyamweni kononkore edi dina mu vyuka, tomu fuda konombendo edi, si kare sidiviso soyirwa. Ame ni Hompa Karunga gweni, ngani mu popera tani mu parura kononkore deni. 10Ndi pa kare poyiruwo yoruhafo poyipito yeni yokwedi kokupe nopoyipito peke eyi ya kara po, tomu fuda nombendo nsene tomu gava nonzambo deswakerero nedi dombili. Ame tani mu kwafa tupu. Ame ni Hompa Karunga gweni.”
Vaisraeli tava zungurura kamba
11Mezuva lyounomurongo mbali lyokwedi kouvali kutunda apa va tundire Vaisraeli mosirongo saEgipite, eremo lyokontunda zoNkongoronzugo zoMagwanekerero kwa zerukire, 12makura Vaisraeli tava tameke rugendo rwawo rokutunda moMburundu zaSinayi. Eremo tali ya sikama momburundu zaParani.
13Rugendo kwa tamekere kompangera zaHompa ezi za genderere mwaMosesa. 14Nkenye apa ngava runduruka, ava verembe lyokuhamena rudi rwaJuda yiwo wokuhova kuza monombunga nonombunga megendeso lyaNasoni zaAminadabu. 15Netaneli zaSuwara yige ga kere megendeso lyorudi rwaIsasikali, 16ano Eliyaba zaHeroni yige ga kere megendeso lyorudi rwaSeburoni.
17Makura Nkongoronzugo tava zi zungurura. Vezimo lyaGeresoni naMerali, ava ava zi simba‐simba, tava vareke nye kugenda.
18Mokukwama ko verembe lyokuhamena rudi rwaRubena tava katuka va ze monombunga nonombunga megendeso lyaElisuli zaSedeuli. 19Serumiyeli zaSulisadayi yige ga kere megendeso lyorudi rwaSimiyoni, 20ano Eliyasafa zaReweli yige ga kere megendeso lyorudi rwaGada.
21Ano vezimo lyaKehati ava ngava simba‐simba yininke yokupongoka nawo tava katuka va ze. Eyi vana kukasika kokamba ezi vana kukatura, azo Nkongoronzugo zina pu nare kudika.
22Mokukwama ko verembe lyokuhamena rudi rwaEfurayimi tava katuka va ze monombunga nonombunga megendeso lyaElisama zaAmihudi. 23Gamaliyere zaPedasuli yige ga kere megendeso lyorudi rwaManase, 24ano Abidani zaNgidiyoni yige ga kere megendeso lyorudi rwaMbenyameni.
25Moruhura verembe lya hamena korudi rwaDana ava ya tumbukira yokukara konyima va popere nombunga nadinye dokupita komeho, nawo tava katuka nye va ze monombunga nonombunga megendeso lyaAhiyeseli zaAmisadayi. 26Pagiyeli zaOhurani yige ga kere megendeso lyorudi rwaAseli, 27ano Ahira zaEnani yige ga kere megendeso lyorudi rwaNafitali. 28Aga yigo malikwamo gorugendo monombunga nonombunga, sinene vana zungurura Vaisraeli kamba zawo, va katuke va ze.
29Mosesa ta tantere rukwayedi rwendi Hobabu zaJeturo goMumidiyani asi: “Ose pokukatuka tuna kerere tu ze kevega eli ga tu tantera Hompa asi nga li tu pa. Age kwa tumbwidilire Vaisraeli asi nga va ragopeka. Ano ya tu ya zeni, none ngomu ka tu ragopese ko.”
30Hobabu ta mu limburura asi: “Hawe, ame kapi na kuza neni, ame tani tengura kwetu.”
31Mosesa ta mu limburura asi: “Tuna kanderere, wa ha tu siga, ove nyove wa diva popawa kutura momburundu, kara nye mudimburuli gwetu. 32Nsene to zi kumwe nose, ngano ngo ka gwana ko nove komatungiko nagenye aga nga ka tu pa Hompa.”
Mbunga tazi katuka
33Mbunga, eyi za katukire zi tunde koNdundu zokupongoka Sinayi, kwa gendere mazuva gatatu, ano Sikesa saHompa sEgwanekero kwa pitire komeho zawo, si ka papare evega eli nava ka tura. 34Nkenye pokamba ezi nava diruka, eremo lyaHompa tali kara kontunda zawo mutenya.
35Sikesa sEgwanekero sinene sina vareke kugenda, Mosesa ta tanta asi: “Hompa katuka, haraganesa nonkore doge o tjwayure ava va ku nyenga.” 36Ano sinene sina sikama, age ta tanta asi: “Hompa, tengura komapata mayovi murongo goVaisraeli.”
© Egwanekerobibeli Lyanamibia 1987, 2003
© Bible Society of Namibia 1987, 2003