Numeri 7
7
Nonzambo dovagendesi
1Mosesa eyi ga mana kudika Nkongoronzugo zoMagwanekerero, makura ta zi gwaveke, ta zi pongora kumwe noyininke yazo nayinye nosizambero noyininke yaso nayinye. 2Makura masimbi gopomazimo, ava va kere vagendesi womarudi goVaisraeli, vaava va kere moupangi wetjango, 3tava twarere Hompa nonzambo dawo edi: matemba gatano‐nalimwe nonohove murongo nambali, vagendesi vavali etemba limwe, ano nkenye mugendesi hove zimwe. Eyi va mana kuyigava, 4Hompa ta tantere Mosesa asi: 5“Tambura yigava eyi yokuruganesa moyirugana yoNkongoronzugo zoMagwanekerero. Yi gava koVarevhi, ngava likwafe nayo moyirugana yawo.” 6Makura Mosesa ta gava nye matemba nonohove koVarevhi. 7Ta gava matemba gavali nonohove ne koVageresoni, 8ano matemba gane nonohove ntano‐nantatu koVamerali. Yirugana yawo nayinye ngava yi rugana moupitisili waItamara zaArona. 9Mosesa kapi ga geve matemba ndi nohove koVakehati, yeeyi awo wokusimba koyipepe yiruganeso yokupongoka eyi ya kere moupangi wawo.
10Vagendesi kwa retere hena nonzambo dosipito sepongoro lyosizambero. Pokureta yigava yawo kosizambero, 11Hompa ta tantere Mosesa asi: “Va tantera asi nkenye ezuva momazuva murongo nagavali mugendesi gumwe ta reta yigava yendi yokuyapongwesesa sizambero.”
12-83Awo kwa retere nonzambo dawo momalikwamo aga:
| Rudi | Mugendesi |
|---|---|
| Juda | Nasoni zaAminadabu |
| Isasikali | Netaneli zaSuwara |
| Seburoni | Eliyaba zaHeroni |
| Rubena | Elisuli zaSedeuli |
| Simiyoni | Serumiyeli zaSulisadayi |
| Gada | Eliyasafa zaReweli |
| Efurayimi | Elisama zaAmihudi |
| Manase | Gamaliyere zaPedasuli |
| Mbenyameni | Abidani zaNgidiyoni |
| Dana | Ahiyeseli zaAmisadayi |
| Aseli | Pagiyeli zaOhurani |
| Nafitali | Ahira zaEnani |
Nonzambo edi ga retere nkenye ogu kwa lifene: Siyaha simwe sosisiliveli somukumo gonokilograma 1,5 nosiyahagona sosisiliveli somukumo gonogarama 800 mondando ezi za kara po. Nayinye mouvali wayo tayi zura usura va duva nomagadi yonzambo zonombuto; siyaha simwe songorodo somukumo gonogarama 110, sina zura manganganga gokututumikidisa; ntwedugona zimwe nekungwe limwe nonzwigona zomvhura zimwe yonzambo zeswakerero; sikombo simwe sonzambo zononzo, ano nontwedu mbali nomakungwe gatano noyikombo yitano nononzwigona ntano domvhura zimwe yonzambo zombili.
84-88Sivaro nasinye sononzambo edi va twere vagendesi murongo navavali dokupongwesesa sizambero dedi:
— Yiyaha yosisiliveli murongo nayivali noyiyahagona yosisiliveli murongo nayivali, sivaro nasinye somukumo gwayo nokilogarama 27,6.
— Yiyaha yongorodo yokuzura manganganga yokututumikidisa murongo nayivali, sivaro nasinye somukumo gwayo nokilogarama 1,32.
— Nontwedu murongo nambali nomakungwe murongo nagavali nononzwigona murongo nambali domvhura zimwe kumwe nononzambo donombuto yononzambo deswakerero.
— Yikombo murongo nayivali yonzambo zononzo.
— Nontwedu nomurongo mbali nane nomakungwe nomurongo ntano nalimwe noyikombo nomurongo ntano nasimwe nononzwigona nomurongo ntano nazimwe yononzambo dombili.
89Nsenesi Mosesa ta zi moNkongoronzugo zoMagwanekerero, a ka uyunge naHompa, kuzuvha Hompa ta uyunga nendi pombando zoSikesa sEgwanekero pokatji kovakerubi vavali.
© Egwanekerobibeli Lyanamibia 1987, 2003
© Bible Society of Namibia 1987, 2003