Numeri 6
6
Noveta doVanasili
1 Hompa kwa tanterere Mosesa asi 2a divise Vaisraeli nompangera edi asi: Nkenye mugara ndi a kare mukadi gokugana mugano gokupongoka, a kare Munasili oku ta lipongwere mwene Hompa, 3a dire vhinyu nomarovhu. Walye a nu nkenye kanwa aka ka tunda momandjembere ndi asi a lye mandjembere gomatarara ndi gomakukutu. 4Mosiruwo esi ana kukara Munasili, nokulya si kandya kokutunda kosindjembere.
5Mosiruwo esi ana kukara momugano goVanasili nokulikurura si nohuki dokomutwe ndi nonzwedu. Mugano tagu mu manga siruwo nasinye esi ana kulipongwera Hompa, ta sigilire nohuki dendi dokomutwe nononzwedu di kure ngorooro. 6Age nokuheda si pepi nosimpu, 7nampili soguhwe ndi sozina ndi samukurwendi ndi mumbyendi gomugara ndi gomukadi. Ga ha linyateka mwene pokuheda pepi nosimpu, yeeyi asi nohuki dendi yido sidiviso sendi sokulipongwera Karunga. 8Mosiruwo nasinye esi ana kukara Munasili ta lipongwere Hompa.
9Nsene a fira muntu nomfa dokuliharuka pepi noMunasili, a dirure nohuki dendi edi va pongora, ta ndindire tanko mazuva gatano‐nagavali, ntani nye ana kukurura nohuki dendi dokomutwe nononzwedu; ngoso ana kuhuka nye pampo. 10Mezuva lyautano‐nautatu ta reta nonkutji mbali ndi nomputukuwa mbali komupristeli pevero lyoNkongoronzugo zoMagwanekerero. 11Mupristeli makura ta zamba zimwe zi kare nzambo zononzo, ano ezi zimwe tazi kara nzambo zeswakerero. Mokurugana ngesi tava mu kuhura nye pampo mokukundama kwendi simpu. Mezuva tupu lyoolyo mugara ta pongwereresa hena mutwe gwendi, 12ta pongwere hena siruwo sendi soUnasili kwaHompa. Siruwo sendi somuhowo sa hepa mawoko‐woko, yeeyi asi nohuki dendi edi va pongwere da nyata. Nzambo zendi zetengwido, ta twara nzwigona zomvhura zimwe.
13Ezi yizo mpo zoMunasili nsene siruwo sendi somugano sina siki mo. Age va mu tware kevero lyoNkongoronzugo zoMagwanekerero, 14a gave kwaHompa yimuna yitatu yandjewa‐ndjewa ya hana kunyata: nzwigona zongara zomvhura zimwe zonzambo zeswakerero nonzwigona zonkadi zomvhura zimwe zonzambo zononzo, ano ekungwe lyonzambo zombili. 15A gave hena sikumba sonomboroto da hana muhahu: nomboroto dononene dousura wokunakuka edi va duvisa komagadi gononzwe noyikuhuna eyi va kwita nomagadi gononzwe nononzambo donombuto novhinyu edi da kara po.
16Mupristeli a di gave kwaHompa oku ta zamba nzambo zononzo nezi zeswakerero. 17A zambere Hompa ekungwe nzambo zombili nosikumba sonomboroto nononzambo donombuto novhinyu. 18Munasili a kurwire nohuki dendi pevero lyoNkongoronzugo zoMagwanekerero, makura ta ka di tura pomundiro ogu vana swakererere nzambo zombili.
19Mupristeli makura ta gusa sirama sokuwoko sekungwe esi vana tereke, nomboroto zimwe zonene nosikuhuna simwe mosikumba, makura ta yi tambeke Munasili momawoko. 20Konyima zeyi mupristeli ta yi gava nye kwaHompa; ayo yigava yokupongoka yomupristeli, rambangako nokagogero nosirama setako sekungwe eyi ya tumbukira mupristeli. Yina kupwa eyi Munasili makura ta nu nye vhinyu.
21Edi yido nompangera doVanasili. Nsene a tumbwidira po gumwe nzambo zokupitakana pweyi ya kara po eyi a gava Munasili, yige kusikisa mo nawa‐nawa etumbwidiro lyendi.
Etungiko lyosiupristeli
22 Hompa kwa tanterere Mosesa asi 23a tantere Arona novana vendi wovagara asi ava tungikise Vaisraeli netungiko eli:
24“Hompa a mu tungike, age a mu nomene; 25Hompa a mu zeresere sipara sendi, age a mu fire nkenda; 26Hompa a tarese sipara sendi kweni, age a mu pe mbili.”
27Nsene va ruganesa etungiko eli pokukandererera Vaisraeli kwaHompa, age ta va tungike.
© Egwanekerobibeli Lyanamibia 1987, 2003
© Bible Society of Namibia 1987, 2003