Numeri 5
5
Vantu wokudira kukuhuka
1 Hompa kwa tanterere Mosesa asi: 2“Tantera Vaisraeli asi va guse mo mokamba nkenye munayingondwe nogu ga kara nosipapa sehamba lyomukagu nogu ga linyateka pokukwata kosimpu. 3Gusa mo navenye ava va dira kukuhuka pampo neisi va nyateka kamba, omu ani kara pokatji kombunga zange.” 4Vaisraeli tava limburukwa, makura tava gusa navenye vangesi mokamba.
Nompangera detengwido
5 Hompa kwa pererere Mosesa 6nompangera edi morwaVaisraeli: Nsene gumwe a tura nzo kwaHompa pokulizona namukwawo, 7a tongonone nzo zendi, age a yi tengwide, makura ta kambeke ko noperesenda nomurongo mbali yi ze kogu ga zonena. 8Ano ogo muntu nsene ga fa, nye age kapi ga paka ekoro eli nava yi pa, va yi gave kwaHompa yi kare yomupristeli. Yikambeka eyi yokumuzeresesa pampo kumwe nekungwe. 9Ano nkenye nzambo ezi ava zambere Vaisraeli Hompa, tazi kara zomupristeli ogu vana kuzitambeka. 10Nkenye mupristeli a guse nonzambo edi vana kumutambeka, di kare dendi.
Yokuhamena esupa
11 Hompa kwa tanterere Mosesa asi 12-14a divise Vaisraeli nompangera edi asi: Nsene ngano mugara a rwira mukadendi esupa morwakudira kumuhuguvara pokugazara asi ga linyateka pokurara nomugara nage‐peke, nye yendi ya hana kumuzerera morwa mukadi ga yi mu horeka, apo hena patupu umbangi, va hana kumukwata ndi kugazara asi mugara a rwira mukadendi esupa, age ga hana kuzona nomugara nage‐peke: 15Napenye opo mugara a guse mukadendi, a mu tware komupristeli. Age a piture hena nzambo ezi va hepa po: kilogarama zimwe zousura woyilya, nye age nokutjira po si magadi gononzwe ndi asi a pake po manganganga gokututumikidisa, morwa azo nzambo zeyi yesupa zokuhorora usili poruzera.
16Mupristeli a tware mukadi ogo komeho, makura a mu sikameke kosipara saHompa. 17Mupristeli a tjire mema gamwe mokandimbe, makura ta gusa kavhu porugorongwa roNkongoronzugo zoMagwanekerero, ta ka mwaga omo momema. 18Mupristeli makura ta ditura nohuki dogo mukadi, ta tura usura wonzambo momawoko gendi. Mupristeli ta kwaterere kandimbe komema goururu, aga aga reta efingiliro, momawoko gendi. 19Mupristeli makura ta ninki mukadi a gane: “Nsene kapi wa hondera, kapi ngali ku gwana efingiliro eli ali tundu momema aga. 20Nye nsene wa hondera, 21Hompa ta fingilire edina lyoge mokatji kombunga. Ngano a ku fingilire o kukute mukoga nezimo lyoge li dunde. 22Mema aga ngano taga zi mezimo lyoge li dunde nomukoga goge gu kukute.” Mukadi a limburure asi: “Na yi panda, Hompa a yi rugane tupu.”
23Mupristeli ta tjanga mafingo aga posipepa, makura ta kuhu eyi ana tjanga mokandimbe komema goururu. 24Age simpe kapi ana ninki mukadi a nwe ogo mema, ga mu ze, ga mu retere kukora kokunene, 25mupristeli ta gusa tanko nzambo zousura momawoko gomukadi, ta zi zerura, a zi pongwere Hompa, makura ta zi tura kosizambero. 26Ntani ana kupunda po eke lyokuzura zi kare nzambo zediworokeso, makura ta zi swakererere posizambero. Moruhura ntani nye ana kuninka mukadi a nwe ogo mema. 27Nsene ga hondera, mema taga mu retere kukora kokunene, ezimo lyendi tali dundu, ano mukoga gwendi tagu kukuta. Edina lyendi tali kara nefingiliro pokatji kombunga. 28Nsene kapi ga zona, kapi yi mu zonagure, nokureta vana ta reta tupu.
29-30Ezi yizo nye veta za hamena komugara gesupa, ogu a rwire mukadendi esupa asi kuhondera. Mukadi kumutwara komeho, a sikame kosipara saHompa, makura mupristeli ta rugana nye yompo zeyi. 31Mugara kutupu nye nzo, ano mukadi, nsene ana moneka nzo, ta simbi nye udigu wendi.
© Egwanekerobibeli Lyanamibia 1987, 2003
© Bible Society of Namibia 1987, 2003