Numeri 4
4
Yetumbukiro lyezimo lyaKehati
1 Hompa kwa tanterere oMosesa naArona, 2va ka vare Varevhi vezimo lyaKehati pomazimogona nopomapata, 3va tjange vagara navenye kutamekera konomvhura nomurongo ntatu dogoro konomurongo ntano, yiwo va wapera kurugana moNkongoronzugo zoMagwanekerero. 4Yirugana yawo kwa hamenene koyininke yokupongokererera.
5 Hompa kwa tanterere Mosesa nompangera edi asi: Poruveze rokuzungurura kamba oMosesa naArona novana vendi wovagara ngava hwilire moNkongoronzugo, tava gusa ko ekehe lyonkondwa, eli lya viva Sikesa sEgwanekero, va si kudumikise ko. 6Ngava kudumike ko sipapa esi sa pya kusunta, tava zara kontunda ekehe lyougeha wokusita, makura tava zweke mo yitji yokusisimbisa.
7Ngava zare ko ekehe lyougeha wokusita kositafura sonomboroto dokuzambera Hompa, makura tava tura ko yiyaha nomarupasa geyi yedumba lyewa nomarupasa gonzambo nononkinda dononzambo dovhinyu. Nomboroto kudisiga kooko kositafura. 8Ngava kudumike ko ekehe lyegeha kwanayinye eyi, makura tava zara ko sipapa esi sa pya kusunta, makura tava zweke mo yitji yokusisimbisa.
9Ngava guse ekehe lyougeha wokusita, tava li kudumike kositenteko sonoramba ntano‐nambali nonoramba daso nonompamo noyipana yomundiro noyipako nayinye yomagadi gononzwe. 10Awo ngava si dingire mosipapa esi sa pya kusunta kumwe noyiruganeso yaso nayinye, makura tava yi tura pousimbiro.
11Ngava ninka tava zara ekehe lyougeha wokusita kosizambero songorodo, tava kudumike ko sipapa esi sa pya kusunta, makura tava zweke mo yitji yokusisimbisa. 12Ngava guse yiruganeso nayinye yEvega lyoKupongoka, tava yi dingire mekehe lyougeha wokusita, tava tura ko sipapa esi sa pya kusunta, makura tava yi tura pousimbiro. 13Ngava kombe ko enoto kosizambero, makura tava zara ko ekehe lyougeha wopurupuli. 14Makura ntani vana kutura po yiruganeso nayinye, eyi ngava ruganesa moukereli, kosizambero: yipana yomundiro noyikuraiko yonyama noyihupuro nomarupasa, makura tava kudumike ko sipapa esi sa pya kusunta, makura tava zweke mo yitji yokusisimbisa.
15Poruveze rokuzungurura kamba vezimo lyaKehati tava wiza, va ya simbe yininke yokupongoka, sinene tupu oArona novana vendi wovagara vana mana kuyikudumika noyiruganeso yayo nayinye. Vezimo lyaKehati nokuguma ko si koyininke yokupongoka, neisi va fa.
Eyi yiyo ya tumbukira vezimo lyaKehati, sinene tava zungurura Nkongoronzugo zoMagwanekerero.
16Eliyasara munwamupristeli Arona yige ngayi tumbukira yoNkongoronzugo mudima nomawoli gonoramba nomanganganga gokututumikidisa nononzambo donombuto nomagadi gokugwava nankenye kaninke peke komoNkongoronzugo, aka va pongwera Hompa.
17 Hompa kwa tanterere oMosesa naArona asi: 18“Nokuvatarerera si vezimo lyaKehati 19asi va fe pokuheda koyininke eyi yokupongokerera. Eyi asi yi dire kuhoroka, oArona novana vendi wovagara va hwilire mo, makura va gave kwankenye mugara sirugana sendi nokumutantera eyi na simba. 20Nye Vakehati, nsene va hwilira moNkongoronzugo, nye va mone vapristeli, awo kuna kurongera yininke yokupongoka, tava fu.”
Yetumbukiro lyezimo lyaGeresoni
21 Hompa kwa tanterere Mosesa asi 22a vare Varevhi vezimo lyaGeresoni pomazimogona nopomapata, 23a tjange vagara navenye kutamekera konomvhura nomurongo ntatu dogoro konomurongo ntano, ava va wapera kurugana moNkongoronzugo zoMagwanekerero. 24Awo yiwo wokusimba yininke eyi: 25Nkongoronzugo zoMagwanekerero nomaukudumikiso gazo nosipapa sokontunda nekehe lyepevero, 26nomakehe nonongodi dorugumbo edi da kundurukida Nkongoronzugo, nosizambero nomakehe gepevero lyorugumbo noyininke nayinye eyi ava ruganesa pokudikaika yininke eyi. Awo ngava rugana nayinye eyi va va pa asi va yi sikise mo. 27OMosesa naArona ngava yi pakere mbili asi Vageresoni va sikise mo yirugana nayinye eyi ya va tumbukira. Awo va simba‐simbe nayinye eyi va va pangera oArona novana vendi wovagara. 28Eyi yiyo ya tumbukira vezimo lyaGeresoni moNkongoronzugo zoMagwanekerero.
Yetumbukiro lyezimo lyaMerali
29 Hompa kwa tanterere Mosesa asi a vare Varevhi vezimo lyaMerali pomazimogona nopomapata. 30A tjange vagara navenye kutamekera konomvhura nomurongo ntatu dogoro konomurongo ntano, ava va wapera kurugana moNkongoronzugo zoMagwanekerero. 31Awo yiwo ngayi tumbukira yokusimba yifini nonompigetji nonongundi nomatako goNkongoronzugo, 32nonongundi nomatako gado noyikwateso nonongodi dorugumbo oru rwa kundurukida Nkongoronzugo noyininke nayinye eyi ava ruganesa pokuyidikaika. Nkenye mugara ngava mu tumbwira eyi nga simba‐simba. 33Eyi yiyo ya tumbukira vezimo lyaMerali moyirugana yawo yomoNkongoronzugo zoMagwanekerero; awo ngava yi rugana moupitisili waItamara, munwamupristeli Arona.
Sivaro soVarevhi
34-48Mokukwama mpangera zaHompa oMosesa naArona nomasimbi gombunga tava vara mazimo gatatu goVarevhi, goKehati naGeresoni naMerali pomazimogona nopomapata. Tava tjanga vagara navenye kutamekera konomvhura nomurongo ntatu dogoro konomurongo ntano, ava va wapera kurugana moNkongoronzugo zoMagwanekerero ngesi:
| Kehati | 2 750 |
| Geresoni | 2 630 |
| Merali | 3 200 |
| Sivaro mudima: | 8 580 |
49Nkenye mugara kwa mu tumbwidilire yirugana eyi nga rugana neyi nga simba‐simba pompangera zaHompa, ezi ngazi gendere mwaMosesa, ano nkenye ogu kwa mu tjenge moomu ga pangerere Hompa Mosesa.
© Egwanekerobibeli Lyanamibia 1987, 2003
© Bible Society of Namibia 1987, 2003