Numeri 3
3
Vana vaArona wovagara
1Eli yilyo ezimo lyoArona naMosesa poruveze oru ga uyungire Hompa naMosesa koNdundu zaSinayi. 2Arona kwa kere novana wovagara vane ava: Mbeli Nadaba, sikwamambeli Abihu, ntani oEliyasara naItamara. 3Awo kwa va gwavekere, tava va pongwere mosirugana soupristeli. 4Nadaba naAbihu kwa fililire moMburundu zaSinayi apa va zamberere Hompa nzambo zomundiro gokudira kupongoka. Awo kapi va peke vana. Ano oEliyasara naItamara yiwo ngava rugana yirugana youpristeli, guhyawo Arona age simpe muzuni.
Varevhi tava va tura moyirugana va kare vakwafi wovapristeli
5 Hompa kwa tanterere Mosesa asi: 6“Ninka rudi rwaRevhi ru hede pepi, ngaru kare vakwafi womupristeli Arona. 7Aro ngaru rugana eyi ya hamena koNkongoronzugo zoMagwanekerero neyi yokukwafa vapristeli nombunga nazinye. 8Awo ngava kara moupangi woyininke nayinye eyi ya hamena moNkongoronzugo oku tava kwafa Vaisraeli peke moukereli wawo. 9Eyi ngayi tumbukira po Varevhi yokuruganena oArona novana vendi wovagara makura. 10Ano Arona novana vendi wovagara yiwo no tura moyirugana youpristeli. Nye nkenye ogu gwapeke nga heteka kulitura moyirugana yawo, va mu dipage.”
11 Hompa kwa tanterere Mosesa asi: 12“Ame ko nyamwange tani gusa Varevhi mevega lyonombeli nadinye donongara doVaisraeli, va kare vange. 13Yeeyi nombeli nadinye donongara dange. Apa na dipagere nombeli nadinye doVaegipite, ame kwa lipongwerere nyamwange nkenye mbeli zongara zemezimo lyankenye Muisraeli nedi doyimuna yawo. Ame nyame Hompa.”
Etjango lyoVarevhi
14 Hompa makura ta tantere Mosesa moMburundu zaSinayi asi: 15“Tjangesa Varevhi momapata nomomazimo gawo. Sinene munona gomugara gokwedi kumwe ndi kupitakana opo, mu tjanga.” 16Makura Mosesa ta yi rugana.
17-20Revhi kwa kere novana wovagara vatatu: oGeresoni naKehati naMerali. Awo yiwo va kere ozinyakurwamazimo, ava ava ga tumbagwisisa. Geresoni kwa kere novana wovagara vavali: oLibeni naSimeyi. Nye Kehati kwa kere novana wovagara vane: oAmuramu naIsihare naHeburoni naUsiyeli. Vana wovagara vaMerali vavali: oMahali naMusi. Awo yiwo va kere ozinyakurwamazimo, ava ava ga tumbagwisisa.
21Mazimo gavali aga ga tunda mwaGeresoni gaga: Valibuni noVasimeyi. 22Sivaro sovagara wokutamekera pokwedi kumwe nava va pitakana opo, ava va tjangere 7 500. 23Vezimo lyaGeresoni ngava tomeke notenta dawo konyima zoNkongoronzugo zoMagwanekerero korwaUtokero. 24Eliyasafa zaRayeli yige ga kere esimbi lyezimo olyo. 25Awo yiwo va kere moupangi woNkongoronzugo zoMagwanekerero, nomaukudumikiso gazo nekehe lyepevero 26nomakehe gorugumbo aga ga kundurukida Nkongoronzugo nosizambero nekehe lyepevero lyorugumbo. Awo yiwo va kere moupangi wanayinye eyi.
27Mazimo gane aga ga tunda mwaKehati gaga: Vaamuramu noVaisihare noVaheburoni noVausiyeli. 28Sivaro sovagara wokutamekera pokwedi kumwe nava va pitakana opo, ava va tjangere 8 600. 29Vezimo lyaKehati ngava tomeke notenta dawo korwaMbindakano zoNkongoronzugo zoMagwanekerero. 30Eliyasafa zaUsiyeli yige ga kere esimbi lyezimo olyo. 31Awo yiwo va kere moupangi woSikesa sEgwanekero nositafura nositenteko sonoramba ntano‐nambali noyizambero noyiruganeso eyi ngava ruganesa vapristeli mEvega lyoKupongoka nekehe lyepevero lyEvega lyoKupongoka. Awo yiwo va kere moupangi wanayinye eyi.
32Eliyasara munwamupristeli Arona yige ga kere esimbi lyoVarevhi. Age yige ga kere moupangi wanavenye ava ngava rugana mEvega lyoKupongoka.
33Mazimo gavali aga ga tunda mwaMerali gaga: Vamahali noVamusi. 34Sivaro sovagara wokutamekera pokwedi kumwe nava va pitakana opo, ava va tjangere 6 200. 35Suliyeli zaAbihayeli yige ga kere esimbi lyezimo olyo. Vezimo eli ngava tomeke notenta dawo korwaMuzogo‐zogo goNkongoronzugo zoMagwanekerero. 36Awo yiwo va kere moupangi woyifini yoNkongoronzugo nonompigetji nonongundi nomatako gado noyiruganeso yako nayinye. 37Awo yiwo hena va kere moupangi wonongundi nomatako gado noyikwateso nonongodi dorugumbo.
38OMosesa naArona novana vawo wovagara ngava dike nontanda dawo komeho zoNkongoronzugo zoMagwanekerero korwaUpumezuva. Awo yiwo va kere moupangi woukereli mEvega lyoKupongoka, va ruganene mo Vaisraeli. Nkenye nkaramuntu ogu nga heteka kuyirugana, va mu dipage. 39Sivaro soVarevhi wovagara wokutamekera pokwedi kumwe nava va pitakana opo, ava ga tjangesesere Mosesa momazimo gawo, moomu ga yi penge Hompa, 22 000.
Etjango lyonombeli donongara
40 Hompa kwa tanterere Mosesa asi: “Tjangesa nombeli nadinye donongara doVaisraeli dokutamekera pokwedi kumwe nedi da pitakana opo. 41Ame nyame Hompa! Varevhi vange mevega lyonombeli nadinye donongara. Ame hena yimuna yoVarevhi yange mevega lyonombeli nadinye doyimuna.” 42Mosesa ta yi limburukwa, makura ta tjangesa nombeli nadinye donongara 43dokutamekera pokwedi kumwe nedi da pitakana opo, sivaro sawo 22 273.
44 Hompa kwa tanterere Mosesa asi: 45“Pongora nye Varevhi va kare vange mevega lyonombeli nadinye donongara doVaisraeli, noyimuna yoVarevhi mevega lyonombeli nadinye doyimuna yoVaisraeli. 46Sivaro sonombeli donongara doVaisraeli esi sa pitakana soVarevhi no‐273, si zowora ko. 47Nkenye ogu mu zowesesa koyimaliva yitano yomuwaya‐waya yosisiliveli mokuliza nondando ezi za kara po, 48makura oyo yimaliva o yi gave kwaArona novana vendi wovagara.” 49Mosesa ta yi limburukwa, makura ta gusa 50yimaliva yomuwaya‐waya yosisiliveli 1 365, 51ta yi gava kwaArona novana vendi wovagara.
© Egwanekerobibeli Lyanamibia 1987, 2003
© Bible Society of Namibia 1987, 2003