Numeri 35
35
Yitata eyi va pere ko Varevhi
1Momazana gaMowaba mesinya mwina lyaJorodana kulivyuka naJeliko yimo ga tanterere Hompa Mosesa asi: 2“Tantera Vaisraeli asi, momauhingiro aga ngava gwana, ngava pe ko Varevhi yitata yimwe, nawo va kare mo, nomaliro goyimuna aga ga kundurukida oyo yitata. 3Yitata oyo ngayi kara yoVarevhi, nkumwe ngava tunge mo. Ano maliro goyimuna ngaga kara gonongombe dawo noyimuna yawo yimwe nayinye. 4Maliro goyimuna kutundilira komakuma gositata nometa mafere gatano ngoso mwankenye ruha. 5Ago kugafaneka asi, pa kare ezarararo lyosikwambando sonometa eyovi limwe ngoso konombinga nadinye, sitata aso pokatji. 6Ngomu pe ko Varevhi yitata yorugami yitano‐nasimwe yokutjilira, ogu ana dipaga mukwawo momponyo. Tomu va gwederere ko hena yitata nomurongo ne nayivali, 7asi sivaro sayo mudima si hure ponomurongo ne noyitata yitano-nayitatu kumwe nomalisiro gayo goyimuna. 8Sivaro soyitata yoVarevhi, eyi ngava gwana kwankenye ezimo, si lize nounene woruha rosirongo sankenye ezimo.”
Yitata yorugami
(Deut 19:1-13; Jos 20:1-9)
9 Hompa kwa tanterere Mosesa 10a tantere Vaisraeli asi: “Nsene ngomu ruta mukuro gwaJorodana, mu ze mosirongo saKanani, 11ngomu ka horowore mo yitata yorugami yokutjilira ogu ana dipaga mukwawo momponyo. 12Omo yimo nga ka yoworokera kekoro lyanakufa, nsene li hara kumurugwidira kuwoko. Ogu ga dipaga mukwawo, nokulivinduka si kumudipaga, age va hana kumutwara mompanguro. 13Tomu horowora yitata yitano‐nasimwe, 14yitatu koUpumezuva waJorodana, eyi yitatu mosirongo saKanani. 15Eyi yiyo nye ngayi kara yitata yorugami koVaisraeli nokovanayirongo, ava wokuyandjukumana mo tupu ndi wokuyakererera mo. Nkenye ogu ana kudipaga mukwawo momponyo, kutjilira mo tupu mositata simwe poyo.
16-18“Ano ogu gokudipagesa mukwawo kosikwata sosivera ndi kemanya ndi kositji, ana tura nzo zedipago, ogo kumutokwera konomfa. 19Vekoro lyene‐lyene lyanakufa opo vana kara nye nononkondo dokumutokwera konomfa. Nsene vana mu gwana, yiwo kumudipaga.
20“Nsene pweli ogu ga nyenga mukwawo nye a mu dipage pokumuzundura ndi pokumuzuguma yuma 21ndi a mu toone nonyongo, ana kara nonzo zedipago, ogo kumutokwera konomfa. Vekoro lyene‐lyene lyanakufa opo vana kara nye nononkondo dokumutokwera konomfa. Nsene vana mu gwana, yiwo kumudipaga.
22“Gazara asi gumwe mpamwe kuvhura a dipage mukwawo momponyo pokumuzundura ndi pokumuzuguma yuma, nye age kapi ga mu nyenga. 23Ndi gazara asi gumwe mpamwe kuvhura kuzuguma emanya, li dipage muntu ogu ga hana asi nkore zendi, age ga hana kutara ko, hena kapisi mowina. 24Napenye opo mbunga zi tokore zi hame kogu ana dipaga mukwawo, kapisi zi hame kekoro lyanakufa, eli lina kuhara kumurugwidira kuwoko. 25Mbunga zi yoworore ogu ana dipaga muntu kekoro lyanakufa, zi mu tengwide kositata sorugami, oku ga tjilira. Ta ka kara kooko dogoro konomfa domupristeli gomunene. 26Ano ogu ga dipaga, nsene a tunda mositata sorugami, esi ga tjilira, 27makura vekoro lyanakufa va mu gwane, va mu dipage, opo patupu nzo zedipago. 28Ogu ga dipaga, a kare ntani moomo mositata sorugami dogoro nokonomfa domupristeli gomunene, konyima kuza tupu nye kwawo. 29Noveta edi nyone vana di tulire po noruvharo rweni nkenye tupu oku ngomu ka kara.
30“Ano ogu vana heta asi sili kuna dipaga mowina, age kumupa nzo zokumutokwera konomfa, nye ntudi pa kare nombangi mbali ndi kupita opo, edi dina kuyizeresa nawa‐nawa; umbangi wagumwe tupu kapi au gwanene mokukareka po eheto lyedipago. 31Mudipagi nokuzowokera si momfuto zoyimaliva, age yige tupu kumudipaga. 32Nokugava si epulisiro kogu ana tjilire mositata sorugami, asi a gave mfuto zoyimaliva, morwa ana hara kutengura kwawo, age mupristeli gomunene simpe kapi ana fu. 33Nsene ngomu yi rugana eyi, ngomu dirura sirongo, omu muna kara. Edipago kudirura sirongo, ano kapi pa kara nzira zokurugana yekuhuro lyosirongo lyopampo, omu va dipagera muntu, ntudi mudipagi mwene nava dipaga. 34Nokudirura si sirongo esi muna kara, morwa ame nyame Hompa, ogu ga tunga mokatji kombunga zaIsraeli.”
© Egwanekerobibeli Lyanamibia 1987, 2003
© Bible Society of Namibia 1987, 2003