Numeri 34
34
1 Hompa kwa pere Mosesa 2nompangera edi kombunga zaIsraeli asi: “Nsene ngomu za mosirongo saKanani, nomururani dosirongo seni ngadi kara ngesi: 3Mururani gokorwaMbindankano ngagu tundilira komburundu zaSini, gu kwamese mururani gwaEdomu. Koyiha yoUpumezuva ngagu tamekera korwaMbindakano zouhura wEfuta lyoMungwa. 4Ntani ngagu kondonokera korwaMbindakano dogoro kompito zaAgarabimu, gu twikire moSini, gu ka hagere korwaMbindakano poKadesi Baraneya. Ntani ngagu kondonokera koMuzogo‐zogo‐tokero koHasara‐Adara, gu vyuke koAsimoni, 5oku ngagu ka kondonokera korwamukuro komururani gwaEgipite, gu ka hagere kEfuta lyoPokatji.
6“Mururani gokorwaUtokero Efuta lyoPokatji.
7“Mururani gokorwaMuzogo‐zogo ngagu kwamesa nzira zokutundilira kEfuta lyoPokatji zi ze kondundu zaHoro, 8kutunda opo gu ze kompito zaHamati. Tagu twikire gu ze koSedada 9dogoro koSifuroni, tagu ka hagera poHasara‐Enani.
10“Mururani gokorwaUpumezuva ngagu kwamesa nzira zokutundilira koHasara‐Enani, gu ze koSefamu. 11Ntani nye ngagu vyuka korwaMbindakano koHarubeli koUpumezuva waAini, gu vyuke konondundugona konontere dokoUpumezuva dEfuta lyaGalireya, 12ano korwaMbindakano ngagu kwamesa mukuro gwaJorodana gu ze kEfuta lyoMungwa. Edi yido ngadi kara nomururani ne dosirongo seni.”
13Makura Mosesa ta tantere Vaisraeli asi: “Esi yiso sirongo, esi ngomu gwana paufungu‐fungu, sirongo esi ga pa Hompa mazimo gatano‐nagane noruha rumwe rwezimo. 14Mazimo gaRubena naGada noruha rumwe rwezimo lyaManase, awo koUpumezuva nare va gwana uhingiro wawo, va ligawinina momapata gawo 15korwaUpumezuva waJorodana.”
Vagendesi ava ya tumbukira yokugaununa sirongo
16 Hompa kwa tanterere Mosesa asi: 17“Eliyasara mupristeli naJosuwa zaNunu ngava ku vatera pokugaununa sirongo. 18To gusa hena mwankenye ezimo mugendesi gumwe, a ku vatere pokusigaununa 19moomu ngesi: Kareba zaJefune gemezimo lyaJuda; 20Serumiyeli zaAmihudi gwamwaSimiyoni; 21Elidadi zaKisironi gwamwaMbenyameni, 22Buki zaJogoli gwamwaDana; 23Hamiyeli zaEfodi gwamwaManase; 24Kemweli zaSifutani gwamwaEfurayimi; 25Elisafani zaParanaki gwamwaSeburoni; 26Palitiyeli zaAsani gwamwaIsasikali; 27Ahihudi zaSeromi gwamwaAseli; 28ano Pedakeli zaAmihudi gwamwaNafitali.”
29Ava yiwo vagara, ava ga pere Hompa yokugawinina mbunga zaIsraeli mauhingiro mosirongo saKanani.
© Egwanekerobibeli Lyanamibia 1987, 2003
© Bible Society of Namibia 1987, 2003