Numeri 36
36
Upingwa wovakadikwara
1Masimbi gomapata mezimogona lyaGiliyata zaMakire, simpumba saManase zaJosefa, kwa zire kwaMosesa nokovangendesi vamwe po. 2Tava uyunga asi: “Hompa kwa ku pangerere asi o gawinine mbunga zaIsraeli sirongo paufungu‐fungu. Age hena kwa ku pangerere asi o gave emona lyamunwazinyetu Serofehadi kovana vendi wovakadi. 3Nye gazara asi nsene ngava kwara vagara worudi naropeke, emona lyawo ngali kara nye lyoro rudi, makura upingwa, ou twa gwana paufungu‐fungu, tau lihora. 4Ano momvhura ezi ava tengwida emona nalinye eli va randesa kwavenyalyo, emona lyovana vaSerofehadi wovakadi ngali kererera moomo morudi oru rwa va kwara, makura tali zumbana mo morudi rwetu.”
5Makura Mosesa ta gava kombunga zaIsraeli mpangera zakwaHompa ezi: “Eyi vana tanta rudi rwaManase monzira. 6Hompa yipo nye ana pangere asi vana vaSerofehadi wovakadi kukwara tupu nkenye ogu vana hara, nye kukwarera moomo morudi rwawo. 7Emona lyankenye Muisraeli li hamene morudi rwawo. 8Nkenye mukadi ogu a pingi emona morudi rumwe rwaIsraeli, a kware mugara ogu ga hamena korudi oro ntani. Monkedi ezi ntani a pinga nkenye Muisraeli emona lyonkwazinakuru, 9makura emona kapi ngali runduruka, li ze korudi noru noru. Nkenye rudi ngaru kara ngorooro nemona lyarwene.”
10-11Makura oMahira naTilisa naHogira naMilika naNowa, vana vaSerofehadi wovakadi, tava rugana moomu ga pangerere Hompa Mosesa, makura tava kwara nye vana wohekurwawo. 12Tava kwarere momazimo gorudi rwaManase zaJosefa, makura emona lyawo tali karerere moomo morudi ronkwazinyakurwawo.
13Edi yido nye noveta nonompangera edi ga pererere Vaisraeli Hompa mwaMosesa momazana gaMowaba mesinya mwina lyomukuro gwaJorodana kulivyuka naJeliko.
© Egwanekerobibeli Lyanamibia 1987, 2003
© Bible Society of Namibia 1987, 2003