Numeri 33
33
Nontanda doVaisraeli kutundilira Egipite dogoro koMowaba
1Madina apa va dikire Vaisraeli nokamba, apa va tundire moEgipite, megendeso lyaMosesa naArona, gaga gana kukwama ko. 2Mosesa kwa tjangere madina gomavega nagenye, aga va dikire nokamba pampangera zaHompa.
3Mbunga zaIsraeli kwa tundire moEgipite mezuva lyomurongo nagatano lyokwedi komuhowo momumvho, mezuva eli lya kweme koPaska zokuhova. Awo kwa tundire mositata saRamusesi mepopero lyaHompa moyitarameho yoVaegipite, 4vena awo kuna kuvhumbika nombeli, edi ga dipagere Hompa. Pokurugana ngesi Hompa kwa likidire, asi yige gelike gononkondo po kovakarunga woVaegipite.
5Mbunga zaIsraeli kwa tundire moRamusesi, tava ya dike kamba poSukoto. 6Va tunda poSukoto, tava ya dike kamba poEtamu, pepi napa za hura mburundu. 7Va tunda opo, tava tengura koPi Hahiroto koUpumezuva waBara‐Sefoni, makura tava dike kamba pepi naMigidoli. 8Vana kutunda poPi Hahiroto, tava vindakana mEfuta lyEgeha, va ze momburundu. Vana kugenda mazuva gatatu momburundu zaEtamu, tava dike kamba poMara. 9Kutunda opo tava zi koElimi, oku va ka dikire kamba, morwa marunone gomema murongo nagavali ga kere po nonongone nomurongo ntano nambali.
10Va tunda poElimi, tava ya dike kamba pepi nEfuta lyEgeha. 11Kamba zawo kwa ya zi dikire momburundu zaSini. 12Ntani vana kuyadika kamba poDofuka, 13kutunda opo poArusi. 14Zokukwama ko zopoRefidimu, apa pwa pilire mema gokunwa vantu.
15-37Kutunda poRefidimu dogoro kondundu zaHoro awo kwa dikire nokamba pomavega aga: moMburundu zaSinayi poKiboroto‐Hatava, poHaseroto, poLitima, poLimoni, poPeresi, poLibuni, poLisa, poKeherata, pondundu zaSefere, poHarada, poMakeroto, poTahata, poTera, poMitika, poHasimona, poMoseroto, poBene‐Jakani, poHoro‐Hagidigadi, poJotobata, poAburona, poEsiyoni‐Jebere, momburundu zaSini (kuninka asi poKadesi), ntani pondundu nye zaHoro, ezi za kara pepi nosirongo saEdomu.
38-39Arona mupristeli kwa rondere kondundu zaHoro, moomu ga mu pangerere Hompa, makura ta ka fira ko, age nomvhura dendi efere nonomurongo mbali nantatu. Age kwa fire mezuva lyomuhowo lyokwedi kwautano momvhura zonomurongo ne konyima zapa va tundire Vaisraeli moEgipite.
40Hompa gwaArada gokoMbindakano zosirongo saKanani kwa zuvhire asi Vaisraeli tava wiza.
41-49Kutunda pondundu zaHoro dogoro komazana gaMowaba Vaisraeli kwa dikire nokamba pomavega aga: Po‐Salimona, poPunoni, poOboto nopomarunda gaAbalimu mosirongo saMowaba, poDiboni‐Gada, poAlimoni‐Diburataimu, pondundu zaAbalimu pepi nondundu zaNebo, nomazana gaMowaba mesinya mwina lyaJorodana kulivyuka naJeliko pokatji kaBete‐Jesimoto nomuramba goNomusu.
Nompangera dokuhamena Kanani
50Omo momazana gaMowaba mesinya mwina lyaJorodana kulivyuka naJeliko yimo ga pererere Hompa Mosesa 51nompangera edi koVaisraeli asi: “Nsene muna rutu Jorodana, mu ze mosirongo saKanani, 52tomu tjida mo navenye ava va kara mosirongo. Nye vakarunga vawo womamanya nava woyivera tomu va zonagura po navenye nomavega gawo nagenye gokuvafumadekera. 53Tomu kwata sirongo, mu si hingire, morwa nyame nina si mu pe. 54Gawinina sirongo marudi peke‐peke nomazimo peke‐peke paufungu‐fungu, ove o gave ruha rorunene kwava wovanzi, ano kwava wovanunu ruha rorununu. 55Ano nsene kapi ngomu tjida mo ava va kara mosirongo, ava ngava hupa mo, ngano ngava kara ngwendi yivambi momeho geni nomega monompatji deni, awo hena ngano ngava mu rwisa. 56Nsene kapi ngomu va tjida mo, ngano ngani mu hanagura po, moomu na va gazarera awo kuvahanagura po.”
© Egwanekerobibeli Lyanamibia 1987, 2003
© Bible Society of Namibia 1987, 2003