Numeri 32
32
Mazimo gokoUpumezuva waJorodana
(Deut 3:12-22)
1Mazimo goRubena naGada kwa kere nonongombe dononzi unene. Apa va mwene asi sirongo saJaseli naGiliyata siwa koyimuna, 2tava zi kwaMosesa naEliyasara nokovagendesi vamwe wombunga, tava tanta asi: 3-4“Nomukunda edi ana kwafa Hompa Vaisraeli asi va di kwate‐doyitata yoAtaroto naDiboni naJaseli naNimura naHesiboni naEreyare naSebamu naNebo naBeyoni‐sirongo sosiwa konongombe, ano ose twa kara nonongombe dononzi. 5Tuna kanderere, tu peni sirongo esi, si kare setu, wa ha tu ninka tu rute mukuro gwaJorodana, tu ka tunge mesinya mwina.”
6Mosesa ta va limburura asi: “One ngesi kuna hara nye mu kare paapa, Vaisraeli vakweneni va ze velike koyita ndi? 7Ngapi nye omu nomu dombesa nomutjima dombunga zaIsraeli mokuruta Jorodana, va ze mosirongo esi ana kuvapa Hompa? 8Oguhyeni nawo yimo va ruganene ngorooro, apa na va tumine poKadesi‐Baraneya va ka nenge sirongo. 9Awo kwa ka tere sirongo, tava ka sika dogoro komuramba gwaEsikoli, nye apa va ka tengwire, tava ya dombesa nomutjima dombunga mokuza mosirongo esi ana kuvapa Hompa. 10Hompa yipo ga handukire ezuva olyo, ta gu paka po mugano: 11‘Ame na gana asi nagumwe si povagara wonomvhura nomurongo mbali ndi wokupitakana opo ava va tunda moEgipite asi ngava hwilire mosirongo esi na tumbwidira Abirahamu naIsaka naJakopo, morwa kapi va limburukwa nge.’ 12Eyi kwa hamene kwanavenye, ntudi oKarebu zaJefune Mukenusi naJosuwa zaNunu no; yiwo va limburukwire kwaHompa. 13Hompa kwa handukilire mbunga, ta zi renda‐rendesa momburundu nomvhura nomurongo ne dogoro vepupi olyo, ava va dilire kumuhafesa, tava pu po kufa. 14Makura none yiyo nye muna kugusa yoguhyeni, nonesi rudi rovanzoni muna kuhara kuhwedesa hena Vaisraeli kehandu lyenene lyaHompa. 15Nsene asi one wonkwaRubena nonkwaGada kapi muna kupura yendi, ngano nga zumbilira hena mbunga momburundu, ezonauko lyawo nzo zeni nye.”
16Awo tava hedere Mosesa, tava tanta asi: “Tu siga tanko tu tunge manyongo gononzwi detu gomamanya, noyitata yoruvharo rwetu tu yi kundurukide makuma. 17Ntani ngatu wapa kuza noVaisraeli vakwetetu koyirwa, tu va pitisire mehomono dogoro noku ngatu va twara mosirongo esi ngasi kara sawo. Mosiruwo oso aro ruvharo rwetu kuna kara moyitata yokukundurukida makuma, va likangure kovantu wosirongo esi, 18dogoro noku ngava gusa Vaisraeli vakwetetu sirongo esi va va pa ko, nose ntani tuna kutengura kwetu. 19Kapi ngatu gusa ko kweyi ngayi ka va hingidikisa mesinya mwina lyaJorodana, morwa ose yetu ko tuna yi gwana moomu koUpumezuva waJorodana.”
20Mosesa ta va limburura asi: “Nsene asi sili yimo muna yi gazara moomu muna kutanta, ntudi liwapaikireni paapa kosipara saHompa mu ze koyirwa. 21Vakwayita veni navenye va rute Jorodana, makura va ka homone nonkore detu mepitisiro lyaHompa, dogoro ta va fundu, 22nkumwe nga guse sirongo. Konyima zeyi ngomu tengura tupu kweni, yeeyi muna sikisa mo eyi ya mu tumbukira kwaHompa nokoVaisraeli vakweneni. Hompa ntani nga yi panda asi sirongo esi sokoUpumezuva waJorodana si kare seni. 23Ano nsene kapi ngomu sikisa mo etumbwidiro lyeni, tani mu rondora asi ngomu tura nzo kwaHompa. Mwa ha lipuka moyininke eyi, neisi nga mu futisa konzo zeni. 24Tungeni tupu yitata yeni nomanyongo gononzwi deni, nye ngomu sikise mo eyi muna tumbwidire!”
25Ava vaGada nava vaRubena tava tanta asi: “Tate, ngatu yi rugana, moomu ono tu pangere. 26Vakadi vetu novana vetu nonongombe detu nononzwi detu ngadi kara moomu moyitata yaGiliyata. 27Nye ose ko natuvenye tuna liwapaikire kuza moyirwa mepitisiro lyaHompa. Ngatu ruta Jorodana, tatu ka rwa, moomu tupu ono yi tanta.”
28Makura Mosesa ta gava kwaEliyasara naJosuwa nokovagendesi vamwe woVaisraeli nompangera edi asi: 29“Vakwayita vaGada nava vaRubena, nsene ngava ruta Jorodana, awo vana liwapaikire yirwa mepitisiro lyaHompa, ano hena nsene ngayi mu tompoka kukwata sirongo nosikwafa sawo, makura ngomu va pe sirongo saGiliyata, si kare sawo. 30Ano nsene kapi ngava ruta Jorodana, va ze kumwe neni koyirwa, nawo ngava gwana ruha rwawo kooko kosirongo saKanani ngwendi nyone.”
31Vakwayita vaGada nava vaRubena tava limburura asi: “Tate, ngatu yi rugana, moomu ana tu pangere Hompa. 32Mepitisiro lyendi ngatu za kosirongo saKanani koyirwa, neisi ngatu zengeda uhingiro wetu omu moUpumezuva waJorodana.”
33Makura Mosesa ta gava nye komazimo gaGada naRubena nokoruha rumwe rwezimo lyaManase sirongo mudima sahompa Sihoni goVaamoli nesi sahompa ogo gwaBasani, rambangako noyitata nonomukunda edi da yi kundurukida. 34Ezimo lyaGada makura tali tungurura nye yitata Diboni naAtaroto naArure 35naAtiroto‐Sofani naJaseli naJogebeha 36naBete‐Nimura naBete‐Harana, eyi va kundurukidisire nare komakuma. 37Ano ezimo lyaRubena tali tungurura Hesiboni naEreyare naKiliyataimu 38naNebo naBara‐Meyono (edina eli kwa li rundwilire) naSibuma. Awo kwa rukire madina peke yitata eyi va tungwilire.
39Ezimo lyaMakira zaManase tali kwata sirongo saGiliyata va si weke, makura tava tjida mo Vaamoli, ava va kere mo. 40Mosesa makura ta pe nye ezimo lyaMakira sirongo saGiliyata, awo makura tava si hingire. 41Jaire gezimo lyaManase kwa homwene ta kwata nodoropa dimwe, makura ta di ruku asi nodoropa daJaire. 42Noba kwa homwene ta kwata Kenati nonodoropa daso, makura ta si liruku edina lyamwene Noba.
© Egwanekerobibeli Lyanamibia 1987, 2003
© Bible Society of Namibia 1987, 2003