Numeri 31
31
Yita yokupongoka yokurwisa Vamidiyani
1 Hompa kwa tanterere Mosesa asi: 2“Futisa Vamidiyani kweyi va rugana muhoko gwaIsraeli. Ngo mana kuyirugana, makura to fu.”
3Makura Mosesa ta tantere mbunga asi: “Liwapaikireni yita, mu ka di sare Vamidiyani, mu ka va futise kweyi va rugana Hompa. 4Mwankenye ezimo lyaIsraeli mu tunde vagara eyovi va ze koyita.”
5Makura mwankenye ezimo tava horowora mo vagara eyovi, sivaro mudima sava va liwapaikilire yita vagara mayovi murongo nagavali. 6Mosesa ta va tumu koyita, mepitisiro lyaPinehasa zaEliyasara gomupristeli, ogu ga kere moupangi woyininke yokupongoka nonombendo dokugava yidiviso. 7Tava ka di sara Vamidiyani, moomu ga pangerere Hompa Mosesa, tava dipaga vagara navenye, 8rambangako novahompa vatano vaMidiyani ava: oEvi naRekemu naSuru naHuru naReba. Awo kwa dipagere hena Baramu zaBeyoro.
9Ano Vaisraeli makura tava kwata vakadi woVamidiyani novana vawo va va tware, tava gogomona nongombe dawo noyimuna yawo nayinye, tava komborora emona lyawo nalinye, 10makura tava hwike yitata yawo nonokamba dawo nadinye. 11Tava gusa nayinye eyi va ka kwete nononkwate noyimuna, 12tava yi twarere oMosesa naEliyasara nombunga zaIsraeli, ezi za kere mokamba momazana gaMowaba mesinya mwina lyaJorodana kulivyuka naJeliko.
Mutengu govakwayita
13OMosesa naEliyasara novagendesi hena navenye wombunga tava pwaga mokamba va simbagwire vakwayita. 14Mosesa ta handukire vakurona wovakwayita, vapitisili wovakwayita eyovi novakwayita efere, ava va ka tundire koyita. 15Ta va pura asi: “Yinke nye yokusigira vakadi navenye nomwenyo? 16Diworokeni asi vakadi yiwo va kweme nompangera daBaramu, va tulise mbunga nzo zokudira kulimburukwa Hompa poPeoro. Eyi yiyo ya retesere ehepeko mombunga zaHompa. 17Ano ntaantani dipageni vamati navenye novakadona navenye ava va likundama‐kundama, 18ano vakadona navenye ava va dira kukundama yiwo nomu hupisa po. 19Makura namuvenye ava mwa dipaga vantu nava mwa kundama koyimpu tomu ka kara ponze zokamba mazuva gatano‐nagavali. Mezuva lyautatu neli lyautano‐nauvali tomu likuhura nyamweni novakadi, ava mwa ka kwata, nawo va likuhure. 20Tomu kuhura hena nkenye kakoverero nankenye kaninke aka va rugana kosipapa ndi konohuki dosikombo ndi kositji.”
21Eliyasara mupristeli ta tantere vagara ava va ka tundire koyita asi: “Edi yido nompangera, edi ga pa Hompa Mosesa. 22-23Nkenye kaninke aka aka dili kupya ngwendi ngorodo nosisiliveli nongoporo nosivera, nanayinye hena yangoso, oyo kuyikuhura pokuyipitisa momundiro. Ano yininke peke nayinye kuyikuhura nomema gekuhuro. 24Mezuva lyautano‐nauvali tomu kuhu yikoverero yeni, ntani ngomu kuhuka pampo mu gwane epulisiro lyokuhwilira mokamba.”
Etopororo lyeyi va ka kwete
25 Hompa kwa tanterere Mosesa asi: 26“Ove naEliyasara novagendesi navenye wombunga vareni yininke nayinye eyi va ka kwata, rambangako nononkwate noyimuna. 27Gaununeni eyi va ka reta pavali, ruha rumwe rovagara ava va zire koyita, ano oru rumwe rombunga. 28Ruha oru runa kuhamena kovakwayita, momafere gatano gononkwate tomu gusa mo gumwe gomutero gokwaHompa, kombinga zoyindongi nonongombe nononzwi noyikombo nayo ngosikwawo. 29Yi gaveni kwaEliyasara mupristeli yi kare sigava sokwaHompa. 30Ruha oru muna kupa po mbunga, monomurongo ntano dononkwate tomu gusa mo gumwe, kombinga zonongombe noyindongi nononzwi noyikombo nayo ngosikwawo. Tomu yi gava koVarevhi, ava va kara moupangi woNkongoronzugo zaHompa zoMagwanekerero.” 31OMosesa naEliyasara nawo tava rugana, moomu ga va pangerere Hompa.
32-35Sivaro seyi va ka kwete vakwayita kukambeka ko neyi va gusire yi kare yavene sesi: Nonzwi 675 000, nongombe 72 000, yindongi 61 000 novakadona ava va dira kukundama 32 000. 36-40Harufa zeyi ya zire kovakwayita, nonzwi 337 500, ano mutero gokwaHompa nonzwi 675, nongombe dokovakwayita 36 000, ano nongombe domutero gokwaHompa 72, yindongi yokovakwayita 30 500, ano yindongi yomutero gokwaHompa 61, vakadona ava va dira kukundama wokovakwayita 16 000, ano womutero gokwaHompa 32. 41Mosesa makura ta gava kwaEliyasara mutero ogu, gu kare sigava sokwaHompa, moomu ga yi pangere Hompa.
42-46Eyi ya zire kombunga, nonzwi 337 500, nongombe 36 000, yindongi 30 500, ano vakadona ava va dira kukundama 16 000. 47Moyo ya zire kombunga Mosesa ta gusa mo gumwe monomurongo ntano dononkwate, kombinga zoyimuna nayo ngosikawo. Makura ta yi pe Varevhi, ava va kere moupangi woNkongoronzugo zaHompa zoMagwanekerero, moomu ga yi pangere Hompa.
48Makura vapitisili ava ngava pangere vakwayita tava zi kwaMosesa, 49tava mu tantere asi: “Hekurwetu, tuna mana kuvara vakwayita vemepangero lyetu, nye nagumwe si ana pili po. 50Makura yiyo nye tuna reta maurenga gokulitjapera gongorodo aga: tulyenge tokomawoko nonomusere nonolinga nomanyepa notulyenge tomononsingo otu twa ka gusa. Tatu yi zambere Hompa, yi kare mfuto zonomwenyo detu asi ngano nga tu popere hena.” 51Makura oMosesa naEliyasara tava tambura ngorodo, ezi va rugana maurenga gokulitjapera. 52Sigava nasinye sovapitisili wovakwayita mukumo gwaso nokilogarama mafere gavali. 53Ava va hana asi vapitisili wovakwayita, awo kwa lipakerere eyi va ka gusire. 54OMosesa naEliyasara makura tava twara ozo ngorodo koNzugo zoMagwanekerero asi ngano Hompa nga popere mbunga zaIsraeli.
© Egwanekerobibeli Lyanamibia 1987, 2003
© Bible Society of Namibia 1987, 2003