Numeri 30
30
Noveta donomugano
1Mosesa kwa gavere nompangera edi kovagendesi womazimo goVaisraeli. 2Mugara, nsene a gana mugano asi ta gava yuma kwaHompa ndi ta gana asi ta dili songandi, ga ha teza etumbwidiro lyendi, nye a sikise mo nayinye eyi ga tanta asi yiyo nga rugana.
3Ano mukadona ogu ana kara simpe membo lyoguhwe, nsene a gana asi ta gava yuma kwaHompa, ndi a tumbwidire asi ta dili songandi, 4a sikise mo nayinye eyi ga gana ndi yeyi ga tumbwidira, ntudi guhwe ana yi nyoka pokuyizuvha ntani. 5Nye guhwe nsene a mu nyokesa yokusikisa mo mugano pokuyizuvha, kapi ga hepa kugusikisa mo. Hompa nga mu dongwenena po morwa oguhwe va mu silika asi ga ha gu sikisa mo.
6Mukadi gokudira kukwara, nsene a gana mugano, a yi tede nawa ndi a dire kuyiteda nawa, ndi a tumbwidire asi ta dili songandi, nye ta kwara, 7a sikise mo nayinye eyi ga gana ndi yeyi ga tumbwidira, ntudi yendi ana yi nyoka pokuyizuvha ntani. 8Nye yendi nsene a mu nyokesa kusikisa mo mugano pokuyizuvha, kapi ga hepa kugusikisa mo. Hompa nga mu dongwenena po.
9Mufisayendi ndi mukadi ogu va zumba a sikise mo nkenye eyi ga gana ndi yeyi ga tumbwidira asi ta dili songandi.
10Mukadikwara nsene a gana ndi a tumbwidira asi ta dili songandi, 11a sikise mo nayinye eyi ga gana ndi yeyi ga tumbwidira, ntudi yendi ana mu silike pokuyizuvha ntani. 12Nye yendi nsene a mu nyokesa kusikisa mo mugano pokuyizuvha, kapi ga hepa kugusikisa mo. Ogo yendi ana mu zonagwire yokusikisa mo mugano gwendi. Hompa nga mu dongwenena po. 13Yendi ga kara nononkondo dokukareka ndi dokuzungurura nkenye mugano ndi etumbwidiro eli ga tokwere. 14Ano mugara nsene haga yi zuvhira nye teete zendi, nokumusilika si, a sikise mo nayinye eyi ga gana ndi yeyi ga tumbwidira. Ngoso ana gu panda nye mugano pokudira kumusilika, age nye ga gu zuvha. 15Ano mugara nsene a zonagura mugano, age nye nare ga gu zuvha, yige nye na simba mafutiro gogo mukadi gokudira kusikisa mo mugano.
16Edi yido nye noveta edi ga pere Hompa Mosesa dokuhamena konomugano dovakadikwara nava va dira kukwara, ava va kara simpe momambo goguhyawo.
© Egwanekerobibeli Lyanamibia 1987, 2003
© Bible Society of Namibia 1987, 2003