Numeri 29
29
Nonzambo dopoSipito soMumvho goMupe
(Lev 23:23-25)
1Mezuva lyomuhowo lyokwedi kwautano‐nauvali tomu pongo mekereroKarunga, nokukwata mo si karugana. Mezuva eli tomu fuda nombendo. 2Nzambo zeswakerero zokugava kwaHompa, edumba eli lya mu za komutjima, zezi: Ntwedugona zimwe nekungwe limwe nononzwigona ntano‐nambali donongara domvhura zimwe, nayinye yandjewa‐ndjewa. 3Nzambo zonombuto zousura wokunakuka wokuduva nomagadi gononzwe ezi za hamena ko zezi: Mwankenye ntwedu nokilogarama ntatu dousura, mekungwe limwe nokilogarama mbali, 4ano monzwigona zongara kilogarama zimwe. 5Tomu zamba hena ekungwe limwe lyosikombo lyonzambo zononzo. Monkedi ezi tomu ruganene nye vantu yekuhuro lyopampo. 6Eyi kuyizamba mu yi kambeke konzambo zeswakerero ezi za kara po zemezuva lyomuhowo lyokwedi, kumwe nonzambo zayo zonombuto nonzambo zeswakerero zankenye ezuva kumwe nonzambo zazo zonombuto nonzambo zovhinyu. Nonzambo edi donondya edumba lyado kwa za Hompa komutjima.
Nonzambo dEzuva lyEfironkenda
(Lev 23:26-32)
7Mezuva lyoumurongo lyokwedi kwautano‐nauvali tomu pongo mekererokarunga, nokumakera si kandya ndi asi mu kwate kokarugana. 8Tomu zambere Hompa nzambo zeswakerero, edumba eli lya mu za komutjima, ezi: Ntwedugona zimwe nekungwe limwe nononzwigona ntano‐nambali donongara domvhura zimwe, nayinye yandjewa‐ndjewa. 9Nzambo zonombuto zousura wokunakuka wokuduva nomagadi gononzwe ezi za hamena ko zezi: Mwankenye ntwedu nokilogarama ntatu dousura, mekungwe limwe nokilogarama mbali, 10ano monzwigona zongara kilogarama zimwe. 11Tomu zamba hena ekungwe limwe lyosikombo lyonzambo zononzo. Eyi kuyizamba mu yi kambeke kosikombo sonzambo zekuhuro lyovantu pampo nonzambo zeswakerero zankenye ezuva kumwe nonzambo zazo zonombuto nonzambo zovhinyu.
Nonzambo dopoSipito soYikorogo
(Lev 23:33-44)
12Mezuva lyomurongo nagatano lyokwedi kwautano‐nauvali tomu pongo mekererokarunga. 13Sipito esi sefumadekero lyaHompa tomu si dana ure womazuva gatano‐nagavali, nokukwata si kokarugana. Mezuva eli lyokuhova tomu zambere Hompa nzambo zonondya zedumba eli lya mu za komutjima ezi: Nontwedugona murongo nantatu nomakungwe gavali nononzwigona donongara murongo nane domvhura zimwe, nayinye yandjewa‐ndjewa. 14Nzambo zonombuto zousura wokunakuka wokuduva nomagadi gononzwe ezi za hamena ko zezi: Mwankenye ntwedu nokilogarama ntatu dousura, mekungwe limwe nokilogarama mbali, 15ano monzwigona zongara kilogarama zimwe kumwe nononzambo dovhinyu edi da kara po. 16Tomu zamba hena ekungwe limwe lyosikombo lyonzambo zononzo. Eyi kuyizamba mu yi kambeke konzambo zeswakerero zankenye ezuva kumwe nonzambo zazo zonombuto nonzambo zovhinyu.
17Mezuva lyauvali tomu zamba nontwedugona murongo nambali nomakungwe gavali nononzwigona donongara murongo nane domvhura zimwe, nayinye yandjewa‐ndjewa. 18-19Tomu yi zamba kumwe nononzambo nadinye edi da kara po dezuva lyokuhova.
20Mezuva lyautatu tomu zamba nontwedugona ntano‐nambali nomakungwe gavali nononzwigona donongara murongo nane domvhura zimwe, nayinye yandjewa‐ndjewa. 21-22Tomu yi zamba kumwe nononzambo edi da kara po dezuva lyokuhova.
23Mezuva lyaune tomu zamba nontwedugona murongo nomakungwe gavali nononzwigona donongara murongo nane domvhura zimwe, nayinye yandjewa‐ndjewa. 24-25Tomu yi zamba kumwe nononzambo nadinye edi da kara po dezuva lyokuhova.
26Mezuva lyautano tomu zamba nontwedugona ntano‐nane nomakungwe gavali nononzwigona donongara murongo nane domvhura zimwe, nayinye yandjewa‐ndjewa. 27-28Tomu yi zamba kumwe nononzambo nadinye edi da kara po dezuva lyokuhova.
29Mezuva lyautano‐nalimwe tomu zamba nontwedugona ntano‐nantatu nomakungwe gavali nononzwigona donongara murongo nane domvhura zimwe, nayinye yandjewa‐ndjewa. 30-31Tomu yi zamba kumwe nononzambo nadinye edi da kara po dezuva lyokuhova.
32Mezuva lyautano‐nauvali tomu zamba nontwedugona ntano‐nambali nomakungwe gavali nononzwigona donongara murongo nane domvhura zimwe, nayinye yandjewa‐ndjewa. 33-34Tomu yi zamba kumwe nononzambo nadinye edi da kara po dezuva lyokuhova.
35Mezuva lyautano‐nautatu tomu pongo mekererokarunga, nokukwata si kokarugana. 36Nzambo zeswakerero zokuzamba kwaHompa yizo nzambo zonondya zedumba eli lya mu za komutjima zezi: Ntwedugona zimwe nekungwe limwe nononzwigona donongara ntano‐nambali domvhura zimwe, nayinye yandjewa‐ndjewa. 37-38Tomu yi zamba kumwe nononzambo nadinye edi da kara po dezuva lyokuhova.
39Eyi yiyo yininke ngomu zambera Hompa poyipito yeni eyi ya kara po, yononzambo deni deswakerero nononzambo donombuto nononzambo dovhinyu nononzambo dombili. Eyi yokukambeka kononzambo dankenye muntu, edi ana kugava a sikise mo mugano ndi kononzambo demeharo lyomuntu mwene.
40Mosesa makura ta tantere Vaisraeli nayinye eyi ga mu pangerere Hompa.
© Egwanekerobibeli Lyanamibia 1987, 2003
© Bible Society of Namibia 1987, 2003