Numeri 2
2
Epompeko lyomarudi monontanda
1 Hompa kwa tanterere Mosesa naArona nompangera edi asi: 2Vaisraeli nsene tava dike ntanda, nkenye ogu a dike perembe lya hamena rudi rwawo nosidiviso sezimo lyawo. Ntanda kuzidika zi kundurukide Nkongoronzugo zoMagwanekerero.
3-9KorwaUpumezuva va dike ko verembe lya hamena korudi rwaJuda monombunga dawo novagendesi vawo, ngesi:
| Rudi | Mugendesi | Sivaro |
|---|---|---|
| Juda | Nasoni zaAminadabu | 74 600 |
| Isasikali | Netaneli zaSuwara | 54 400 |
| Seburoni | Eliyaba zaHeroni | 57 400 |
| Sivaro mudima | 186 400 |
Rudi rwaJuda yiro rokupita komeho.
10-16KorwaMbindakano va dike ko verembe lya hamena korudi rwaRubena monombunga dawo novagendesi vawo ngesi:
| Rudi | Mugendesi | Sivaro |
|---|---|---|
| Rubena | Elisuli zaSedeuli | 46 500 |
| Simiyoni | Serumiyeli zaSulisadayi | 59 300 |
| Gada | Eliyasafa zaReweli | 45 650 |
| Sivaro mudima | 151 450 |
Rudi rwauvali rokukwama ko rwaRubena.
17Ano pokatji komarudi gavali gokomeho nagavali gokonyima yipo pokugenda Varevhi, awo kuna simbi Nkongoronzugo zoMagwanekerero. Nkenye rudi ru gende pampangera zokuliza nokamba zawo, ru kare pevega lyaro nerembe lyaro.
18-24KorwaUtokero va dike ko verembe lya hamena rudi rwaEfurayimi monombunga dawo novagendesi vawo, ngesi:
| Rudi | Mugendesi | Sivaro |
|---|---|---|
| Efurayimi | Elisama zaAmihudi | 40 500 |
| Manase | Gamaliyere zaPedasuli | 32 200 |
| Mbenyameni | Abidani zaNgidiyoni | 35 400 |
| Sivaro mudima | 108 100 |
Rudi rwautatu rokukwama ko rwaEfurayimi.
25-31KorwaMuzogo‐zogo va dike ko verembe lya hamena rudi rwaDana monombunga dawo novagendesi vawo, ngesi:
| Rudi | Mugendesi | Sivaro |
|---|---|---|
| Dana | Ahiyeseli zaAmisadayi | 62 700 |
| Aseli | Pagiyeli zaOhurani | 41 500 |
| Nafitali | Ahira zaEnani | 53 400 |
| Sivaro mudima | 157 600 |
Rudi rwaune rokuhulilira rokukwama ko rwaDana.
32Sivaro sombunga zoVaisraeli esi va tjangere momarudi monombunga nonombunga kwa hulire po 603 550. 33Varevhi kapi va va tjangerere koVaisraeli vapeke, moomu ga pangerere Hompa Mosesa.
34Mbunga zoVaisraeli makura tazi rugana nayinye, moomu ga tanterere Hompa Mosesa. Nkenye ava tava dike perembe lyawo, makura tava gendi mezimo lyawo.
© Egwanekerobibeli Lyanamibia 1987, 2003
© Bible Society of Namibia 1987, 2003