Numeri 28
28
Nonzambo dankenye ezuva
(Ex 29:38-46)
1 Hompa kwa pangerere Mosesa, 2a tantere Vaisraeli asi: Kareni nosinka sokusikisa mo nawa yiruwo yokugava kwaKarunga nonzambo donondya, edi da mu za komutjima.
3Nonzambo donondya dokugava kwaHompa dedi: Nonzwigona mbali donongara dandjewa‐ndjewa domvhura zimwe donzambo zeswakerero zankenye ezuva, 4zimwe kuzizamba ngurangura, ano ezi nkwawo ngurova, 5nkenye ezi kumwe nonzambo zonombuto zousura wokunakuka wokilogarama zimwe, wokuduva nolita zimwe zomagadi gononzwe dokuhopora. 6Eyi yiyo nye yokuzamba nkenye ezuva yokuswakerera nuunu, eyi va hovere kuzamba poNdundu zaSinayi yonzambo zonondya. Edumba eli lya za Hompa komutjima. 7Ano nzambo zovhinyu zokuzamba kumwe nonzwigona zopomuhowo, kutjira vhinyu zolita zimwe kosizambero. 8Ngurova to zamba nzwigona zauvali moomu monzambo zongurangura kumwe nonzambo zazo zovhinyu. Nazo nzambo zonondya. Edumba eli lya za Hompa komutjima.
Nzambo zEsabata
9Mezuva lyEsabata to zamba nonzwigona mbali donongara dandjewa‐ndjewa domvhura zimwe nousura wokunakuka wonokilogarama mbali wokuduva nomagadi gononzwe nonzambo zonombuto kumwe nonzambo zovhinyu. 10Nzambo zeswakerero ezi zokuzamba nkenye Esabata rambangako nonzambo zankenye ezuva kumwe nonzambo zazo zovhinyu.
Nzambo zemezuva lyomuhowo kokwedi
11Nzambo zokugava kwaHompa petameko lyankenye kwedi zezi: Nontwedugona mbali nekungwe limwe nononzwigona donongara ntano‐nambali domvhura zimwe, nayinye yandjewa‐ndjewa, 12ano yonzambo zonombuto zousura wokunakuka wokuduva nomagadi gononzwe ngesi: mwankenye ntwedu nokilogarama ntatu dousura wokunakuka, mekungwe nokilogarama mbali, 13ano monzwigona zongara kilogarama zimwe. Nonzambo deswakerero edi yido nonzambo donondya. Edumba eli lya za Hompa komutjima. 14Nzambo zovhinyu ezi za hamena ko zezi: Nolita mbali dovhinyu mwankenye ntwedu, lita zimwe noharufa mwankenye ekungwe, ano lita zimwe monzwigona zongara. Ezi yizo mpangera zonzambo zeswakerero zemezuva lyomuhowo mwankenye kwedi momvhura nazinye. 15Yokukambeka konzambo zeswakerero zankenye ezuva to zamba ekungwe limwe lyosikombo zi kare nzambo zononzo.
Nonzambo dopoSipito soNomboroto da hana muhahu
(Lev 23:5-14)
16Sipito saPaska sefumadekero lyaHompa kusidana mezuva lyoumurongo nagane lyokwedi komuhowo. 17Mezuva lyoumurongo nagatano sipito sekererokarunga sokukara ko mazuva gatano‐nagavali tasi tameke. Momazuva nagenye ogo kulya doodo nomboroto da hana muhahu. 18Mezuva lyosipito tomu pongo moukereli waKarunga, nokukwata mo si karugana. 19Nzambo zeswakerero zokuzamba kwaHompa yizo nzambo zonondya zezi: Nontwedugona mbali nekungwe limwe nononzwigona donongara ntano‐nambali domvhura zimwe, nayinye yandjewa‐ndjewa. 20Nzambo zonombuto zousura wokunakuka wokuduva nomagadi gononzwe ezi za hamena ko zezi: Mwankenye ntwedu nokilogarama ntatu, mekungwe limwe nokilogarama mbali, 21ano monzwigona zimwe zongara kilogarama zimwe. 22Tomu zamba hena ekungwe limwe lyosikombo lyonzambo zononzo. Monkedi ezi tomu ruganene nye vantu yekuhuro lyopampo. 23Eyi kuyizamba mu yi kambeke konzambo zeswakerero zongurangura ezi za kara po. 24Momazuva aga gatano‐nagavali yimo ngorooro mokuzamba nzambo zonondya kwaHompa. Edumba eli lya mu za komutjima. Eyi kuyizamba mu yi kambeke konzambo zeswakerero zankenye ezuva kumwe nonzambo zovhinyu. 25Mezuva lyautano‐nauvali tomu pongo moukereli waKarunga, nokukwata mo si karugana.
Nonzambo dopoSipito soMuzangu
(Lev 23:15-22)
26Mezuva lyomuhowo lyopoSipito soMuzangu pokuretera Hompa nzambo zosipe sonombuto tomu pongo mekererokarunga, nokukwata mo si karugana. 27Tomu zamba nzambo zeswakerero zedumba eli lya za Hompa komutjima ezi: Nontwedugona mbali nekungwe limwe nononzwigona ntano‐nambali donongara domvhura zimwe, nayinye yandjewa‐ndjewa, 28kumwe nonzambo zonombuto ezi za hamena ko zousura wokunakuka wokuduva nomagadi gononzwe ezi: mwankenye ntwedu nokilogarama ntatu, mekungwe nokilogarama mbali 29ano monzwigona zongara kilogarama zimwe. 30Tomu zamba hena ekungwe lyosikombo. Monkedi ezi tomu ruganene vantu yekuhuro lyopampo. 31Eyi kuyizamba nonzambo zovhinyu, mu yi kambeke konzambo zankenye ezuva zeswakerero nezi zonombuto.
© Egwanekerobibeli Lyanamibia 1987, 2003
© Bible Society of Namibia 1987, 2003