Numeri 27
27
Vana wovakadi vaSerofehadi
1Vana wovakadi vaSerofehadi zaHefere, Hefere zaGiliyata, Giliyata zaMakire, Makire zaManase, Manase zaJosefa vava: oMahira naNowa naHogira naMilika naTilisa. 2Awo tava zi, makura tava sikama komeho zaMosesa naEliyasara mupristeli novagendesi nombunga nazinye ezi za kere pevero lyoNkongoronzugo zoMagwanekerero, tava tanta asi: 3“Guhyetu kwa fira momburundu ga hana kusiga ko konauzuni muna gomugara nampili gumwe. Age kapi ga heme kombunga zaKora, ava va di vyukire Hompa. Age kwa fililire nonzo dendi. 4Nampili moomu ga dilire kusiga ko kana kokagara, yiyo nye nali zumbanena edina lyawo mezimo lyawo ndi? Tu pa ugawo wemekoro lyaguhyetu.”
5Mosesa ta twara nonkango dawo kwaHompa. 6Ano Hompa ta mu tantere asi: 7“Eyi vana pura vana wovakadi vaSerofehadi youhunga. Va pa ugawo wemekoro lyaguhyawo. Ninka upingwa waguhyawo u kare wawo. 8Tantera mbunga zaIsraeli asi: nsene mugara ta fu ga hana kusiga ko konauzuni kana kokagara, munwendi gomukadi yige na pinga ugawo wendi. 9Ano nye nsene kapi ga paka nomuna gomukadi si googu, vanavazina wovagara yiwo wokupinga. 10Nye nsene asi novanavazina wovagara vaava kutupu, va mu pinge onkwaguhwe. 11Ano nsene asi vanavazina wovagara ndi ohekurwendi kutupu, va mu pinge yikwakoro yendi ava va mu tundakana, va yi weke yi kare ugawo wawo. Mbunga zaIsraeli zi litarere ko eyi asi yizo mpangera zopaveta nawa‐nawa moomu nina yi mu pangere ame Hompa.”
Josuwa tava mu horowora a kare mukwami gwaMosesa
(Deut 31:1-8)
12 Hompa kwa tanterere Mosesa asi: “Ronda kondundu zaAbalimu o tare sirongo esi nina kupa Vaisraeli. 13Apa no si mona, makura to fu nove moomu ga fire mukuroge Arona, 14morwa namuvenye mouvali weni kwa nyokere mpangera zange momburundu zaSini, apa za tangwine mbunga mudima zi vyuke nge poMeliba, ano one mu dire kuhorora nonkondo dange dokupongoka komeho zawo.” (Meliba runone oru rwa kara poKadesi momburundu zaSini.)
15Mosesa ta kanderere asi: 16“Hompa Karunga, ntundiliro zomwenyo nagunye, na kanderere, tura mo mugara ogu nga gendesa mbunga, 17ta zi pitisire moyita, neyisi ngazi kara mbunga zoge ngwendi nonzwi da hana musita.”
18 Hompa kwa tanterere Mosesa asi: “Gusa Josuwa zaNunu, mugara gonondunge o kambeke mawoko goge pomutwe gwendi. 19Mu sikame komeho zaEliyasara mupristeli nokombunga mudima, makura o mu divise komeho zanavenye asi yige mukwami goge. 20Mu pa ko ruha rumwe roupangi woge, asi mbunga nazinye zaIsraeli zi vhure kumulimburukwa. 21Age nga hamena kwaEliyasara mupristeli, ogu nga mu ronga mapangero gange pokuruganesa Ulimu naTumimu. Monkedi ezi yimo nga gendesa Eliyasara Josuwa nombunga mudima zaIsraeli moyininke yawo nayinye.” 22Mosesa makura ta rugana moomu ga mu pangerere Hompa. Ta sikameke Josuwa komeho zaEliyasara mupristeli nokomeho zombunga mudima, 23ta kambeke mawoko gendi pomutwe gwaJosuwa, makura ta va divisa asi yige mukwami gwendi.
© Egwanekerobibeli Lyanamibia 1987, 2003
© Bible Society of Namibia 1987, 2003