Numeri 26
26
Evaruro lyauvali
1Ehamba lyomukagu eyi lya pwa, Hompa ta tantere oMosesa naEliyasara zaArona mupristeli asi: 2“Vareni Vaisraeli navenye momazimo gawo nomomapata gawo. Tomu tjanga madina govagara navenye wonomvhura nomurongo mbali nava va pitakana opo, ava vana wapere moukwayita.” 3-4OMosesa naEliyasara tava yi limburukwa, makura tava zigida vagara navenye va ponge wonomvhura nomurongo mbali nava va pitakana opo. Awo makura tava lipongaike momazana gaMowaba mesinya mwina lyomukuro gwaJorodana poyiha yaJeliko.
Vaisraeli ava va tundire moEgipite yiwo ava:
5Vana vaRubena (Rubena yige mbeli zaJakopo) vava: Hanoki esimbi lyezimo lyoVahanoki, Paru esimbi lyezimo lyoVaparu, 6Hesironi esimbi lyezimo lyoVahesironi, ano Karumi esimbi lyezimo lyoVakarumi. 7Sivaro somazimo aga kwa hulire povagara 43 730. 8Ruvharo rwaParu yiro Eliyaba, 9ano vana vaEliyaba oNemweli naDatani naAbiramu. ODatani naAbiramu yiwo za horowere mbunga. Awo yiwo va tangwininine Mosesa naArona pokukwama Kora va di vyuke Hompa. 10Ano evhu tali zahama li va mine. Tava fu kumwe naKora novakwami vendi, apa gwa vevekere mundiro vagara mafere gavali nonomurongo ntano. Ava va kere erondoro lyombunga. 11Nye vana wovagara vaKora kapi va fire.
12Rudi rwaSimiyoni roru: Mazimo gaNemweli naJamini naJakini 13naSera naSuru. 14Sivaro somazimo aga kwa hulire povagara 22 200.
15Rudi rwaGada roru: Mazimo gaSefoni naHagi naSuni 16naOsini naEli 17naArodi naAreli. 18Sivaro somazimo aga kwa hulire povagara 40 500.
19-21Rudi rwaJuda (vana wovagara vavali vaJuda oEra naOnani kwa fililire mosirongo saKanani) roru: Mazimo gaSera naPeresi naSera naHesironi naHamuli. 22Sivaro somazimo aga kwa hulire povagara 76 500.
23Rudi rwaIsasikali roru: Mazimo gaTora naPuva 24naJasubu naSimuroni. 25Sivaro somazimo aga kwa hulire povagara 64 300.
26Rudi rwaSeburoni roru: Mazimo gaSeredi naEroni naJahireli. 27Sivaro somazimo aga kwa hulire povagara 60 500.
28Marudi gaJosefa, ogu ga kere novana wovagara vavali, oManase naEfurayimi.
29Rudi rwaManase roru: Makira zaManase yige guhyaGiliyata. Mazimo aga gana kusikura ko kwa lihamesera kwazinyakurwago Giliyata. 30Mazimo gaJesere naHereki 31naAsiliyeli naSikemu 32naSemida naHefere. 33Serofehadi zaHefere kapi ga peke vana wovagara, nye vakadona velike. Madina gawo gaga: Mahira naNowa naHogira naMilika naTilisa. 34Sivaro somazimo aga kwa hulire povagara 52 700.
35Rudi rwaEfuraimi roru: Mazimo gaSutera naBekeli naTahani. 36Ezimo lyaErani kwa lihameserere kwazinyakurwawo Sutera. 37Sivaro somazimo aga kwa hulire povagara 32 500.
38Rudi rwaMbenyameni roru: Mazimo gaBera naAsibeli naAhiramu 39naSefufamu naHufamu. 40Mazimo gaArada naNamani kwa lihamesera kwazinyakurwawo Bera. 41Sivaro somazimo aga kwa hulire povagara 45 600.
42Rudi rwaDana roru: Ezimo lyaHusimu, 43sivaro salyo kwa hulire povagara 64 400.
44Rudi rwaAseli roru: Mazimo gaImuna naIsivi naBeliya. 45Mazimo gaHebeli naMalikiyeli kwa lihamesera kwazinyakurwawo Beliya. 46Aseli kwa kere namunwendi gomukadona Sera. 47Sivaro somazimo aga kwa hulire povagara 53 400.
48Rudi rwaNafitali roru: Mazimo gaJahuseli naGuni 49naJesere naSiremu. 50Sivaro somazimo aga kwa hulire povagara 45 400.
51Sivaro mudima sovagara woVaisraeli kwa hulire po 601 730.
52 Hompa ta tantere Mosesa asi: 53“Gawinina marudi aga sirongo pasivaro sago. 54-56Va gawinina sirongo paufungu‐fungu, ove o gave ruha rorunene kwava wovanzi, ano kwava wovanunu ruha rorununu.”
57Rudi rwaRevhi kwa kara momazimo goGeresoni naKehati naMerali. 58Mazimo gopeke goVarevhi kwa tunda koLibuni naHeburoni naMahili naMusi naKora. Kehati kwa kere guhyaAmuramu. 59Ano Amuramu kwa mu kwarekere naJokebedi zaRevhi, ogu va hampurukilire moEgipite. Age kwa reterere Amuramu vamati vavali oArona naMosesa nampazawo Miliyama. 60Arona kwa kere novana wovagara vane, oNadabu naAbihu naEliyasara naItamara. 61Nadabu naAbihu kwa fire apa va zamberere Hompa mundiro gokudira kupongoka. 62Sivaro soVarevhi kwa hulire povagara 23 000 wokwedi nava wokupitakana opo. Awo kapi va va varwililire koVaisraeli vamwe po, ndi asi va va pe ko nampili karuha kamwe kougawo moIsraeli.
63Mazimo aga nagenye kwa ga tjangere Mosesa naEliyasara apa va ninkire evaruro lyoVaisraeli momazana gaMowaba mesinya mwina lyomukuro gwaJorodana pepi naJeliko. 64Kutupu nampili muntu gumwe gomumwawo ogu ga hupire po pwava va varwilire oMosesa naArona momburundu zaSinayi. 65Hompa kwa tantere asi navenye yiwo kufira momburundu, makura ta yi va horokere, ntudi oKarebu zaJefune naJosuwa zaNunu velike va hupire po.
Currently Selected:
Numeri 26: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003