Numeri 25
25
Mbunga zaIsraeli poPeoro
1Vaisraeli apa va dikire nokamba dawo momuramba goNomusu, vagara ngava lirara‐rara novakadi woVamowaba. 2Vakadi awo yiwo ngava va zigida‐zigida koyipito yononzambo dawo oku ngava fumadekere karunga goVamowaba. Vaisraeli ngava li nondya odo, tava fumadeke vakarunga vawoowo, 3Bara naPeoro. Hompa ta va handukire, 4makura ta tantere Mosesa asi: “Gusa vagendesi navenye woVaisraeli o va dipage moyitarameho yovantu. Kutunda opo ame kapi ngani handukira hena mbunga.” 5Mosesa ta tantere varudipagivantu asi: “Nkenye ogu pokatji keni a dipage mugara gemezimo lyendi ogu ana fumadeke Bara naPeoro.”
6Gumwe goVaisraeli ta twara mukadi goMumidiyani motenta zendi moyitarameho yaMosesa nombunga nazinye, awo simpe hava kerera mononkali pevero lyoNkongoronzugo zoMagwanekerero. 7Apa ga yi mwene Pinehasa zaEliyasara, mutekurwaArona mupristeli, ta katuka, a tunde mo mombunga. Age ta gusa egonga, 8makura ta sikura mugara nomukadi ava va zire motenta, ta va wurura mouvali wawo negonga. Yipo nye lya hagerere ehamba lyomukagu, eli lya zonagwire Vaisraeli. 9Opo ngoso alyo lina dipaga nare vantu 24 000.
10 Hompa ta tantere Mosesa asi: 11“Pinehasa ana gusisa po ehandu lyange lyokuhamena mbunga zaIsraeli. Age kapi ana didimike kufumadeka nkenye sikarunga ntudi nyame. Morwa eyi yiyo nina dili kuvazonagwira mehandu lyange. 12Ano mu tantera asi ame tani tura po malikwatakano nendi aga ngaga karerera po nomoruveze rokomeho oko. 13Age nomaruvharo gendi kwa va tulilira mo moupristeli, yeeyi age kapi ga lididimikilire vakarunga peke kumwe name, yiyo nye ga reterere mbunga egusiropo lyononzo dawo.”
14Edina lyoMuisraeli ogu va dipagere kumwe nomukadi goMumidiyani yige Simuli zaSuru. Age kwa kere esimbi lyezimo lyorudi rwaSimiyoni. 15Edina lyogo mukadi yige Kosibi. Oguhwe Suru kwa kere esimbi limwe lyombunga zimwe zomazimo goVamidiyani.
16 Hompa ta pangere Mosesa asi: 17“Homona Vamidiyani o va haraganese po 18morwaudona ou va ku ruganene pokukumbagera poPeoro nomokonda zaKosibi, ogu va dipagere poruveze rwehamba lyomukagu poPeoro.”
© Egwanekerobibeli Lyanamibia 1987, 2003
© Bible Society of Namibia 1987, 2003