Numeri 24
24
1Kutunda opo Baramu yipo ga yi divilire nye asi Hompa kuna hara kutungika mbunga zaIsraeli. Yiyo nye ga dilire kuza a ka rete younganga moomu ga yi rugene muhowo. Ano age ta sigurukire komburundu, 2makura ta mono mbunga zaIsraeli zina tomeke notenta dawo pamarudi nomarudi. Mpepo zaKarunga tazi mu wiza, 3makura ta porofeta ngesi asi:
“Mbudi zaBaramu zaBeyoro,
nonkango domugara ogu a vhuru
kumona nawa‐nawa
4nogu a vhuru kuzuvha eyi
a uyunga Karunga.
Nomeho gokunwika tani mono melirunduruko
emoneko lyaKarunga
goMunankondo nadinye.
5Ee, uwagona wonotenta daIsraeli,
6edi da lifana ngwendi
nomukweyo donongone
ndi yipata konontere domukuro.
Ngwendi nomfugu ga tapeka Hompa
ndi yitji yosedeli konontere domema.
7Awo ngava kara
nomvhura zonzi,
ngava kuna mbuto zawo
momapya ga duvara nawa
Hompa gwawo nga kara
munankondo a pitakane Agaga,
ano epangero lyendi
ngali lihanena napenye.
8Karunga yige ga va gusa moEgipite,
yiyo a va kondjere moomu azi
rwisa nyatji konombinga dazo.
Tava haraganesa po nonkore dawo,
tava sansununa yisupa yawo
noyikutji yawo tava yi tezagura.
9Muhoko ogo kwa kara ngwendi
nyime gononkondo.
Nsene kuna rara,
nagumwe si gokuyilipepekera
a gu pindure.
Ogu a tungike Israeli,
nage ngava mu tungika,
ano ogu a fingilire Israeli,
nage ngava mu fingilira.”
10Baraka ta sakere mawoko gendi nehandu lyenene, ta tantere Baramu asi: “Ame kani ku zigida o ya fingililire nge nonkore dange, tara si ove ono di tungike nye yikando yitatu. 11Ntaantani finyauka po nye apa. Ame kwa ku tumbwidira ni ku pe mfeto, nye ngesi Hompa ana zi ku silike kuzigwana.”
12Baramu ta limburura asi: “Nani kapi kani howo kuyitantera nontumi doge asi 13nampili ove o pe nge sisiliveli nongorodo nazinye zomombara zoge, ame nokuvhura si kunyoka mpangera zaHompa pokurugana yanyamwange. Ame ntudi yeeyi a tantere nge Hompa yiyo ani rugana.”
Eporofeto lyokuhulilira lyaBaramu
14Baramu ta tantere Baraka asi: “Ano nye ntaantani ngesi ame tani tengura komuhoko gwetu, nye simpe na hana kuza tani ku rondora asi yinke eyi ngazi rugana mbunga zaIsraeli vantu woge komeho,” 15makura ta porofeta ngesi asi:
“Mbudi zaBaramu zaBeyoro,
nonkango domugara ogu a vhuru
kumona nawa‐nawa
16nogu a vhuru kuzuvha eyi
a uyunga Karunga,
ta gwana unongo wokutunda
kogu gEkeguru‐guru.
Nomeho gokunwika tani mono melirunduruko
emoneko lyaKarunga
goMunankondo nadinye.
17Ame na mu mono, nye kapisi ntaantani,
tani mu tara, nye kapisi popepi.
Mbungururu zokuvaima tazi
pumu zi tunde mwaJakopo,
ano mpango zouhompa
tazi tundu mwaIsraeli.
Age nga toona vagendesi womoMowaba
nokufunda valinenepeki navenye novavhundakanesi.
18Age nga di rapatesa nonkore
dendi moEdomu,
nosirongo sawo nga si ninke
si kare ugawo wendi,
ano nonkondo daIsraeli
ngadi neneperera ngorooro.
19Muhoko gwaIsraeli ngagu va sambanga
nokufwadura mo ava ngava hupa mo nomwenyo.”
20Makura Baramu memoneko lyendi ta mono Vaamareki, ta porofeta ngesi asi:
“Vaamareki kwa kere muhoko
gononkondo po unene
kupita nomuhoko nadinye.
Nye mouhura ngagu zonauka po nuunu.”
21Baramu ta mono hena memoneko lyendi Vakeni, makura ta porofeta ngesi asi:
“Pevango eli mwa tunga kwa kora,
kwa kara megameno ngwendi sikorogo
esi va tungira pemanya lya tuntuka.
22Ano one Vakeni ngava mu
haraganesa po apa
ngava mu twara Vasiliya koupika.”
23Baramu ta porofeta ngesi asi:
“Vantuke ava va lipongaika korwaMuzogo‐zogo?
24Vasindidi ngava tunda
koSipurusi moyikepa yawo.
Awo ngava di rapatesa Vasiliya noVababironi,
nye metengwidokuwoko nawo
ngava va zonagura po nuunu.”
25Makura Baramu ta katuka a tengure kwawo, ano Baraka nage ta katuka a ze.
© Egwanekerobibeli Lyanamibia 1987, 2003
© Bible Society of Namibia 1987, 2003