Numeri 23
23
1Age ta tantere Baraka asi: “Tungira nge apa yizambero yitano‐nayivali, ove o retere nge nontwedu ntano‐nambali nomakungwe gatano‐nagavali.”
2Baraka ta rugana moomu va mu tanterere. OBaraka naBaramu makura tava zambere ntwedu nekungwe pwankenye sizambero. 3Ano Baramu ta tantere Baraka asi: “Sikama apa ponzambo zoge zeswakerero, ame tani zi tanko ni tare Hompa mpamwe na gwanekera name. Nani ya ku sansekera nkenye eyi na ka horwera nge.” Age makura ta zi kevega lya tuntuka, 4Karunga makura ta gwanekere nendi. Baramu ta mu tantere asi: “Ame nina dike yizambero yitano‐nayivali, yiyo nina zambere pwankenye sizambero ntwedu nekungwe.”
5 Hompa ta mu limburura asi: “Tengura kwaBaraka o mu twarere mbudi zange.” 6Age makura ta tengura ta gwana Baraka age simpe haga sikamena ponzambo zendi zeswakerero kumwe novagendesi navenye womoMowaba.
7Baramu ta porofeta ngesi asi:
“Baraka hompa gwaMowaba
yige ana gusa nge
moSiliya nokonondundu dokoUpumezuva.
Age yiyo ana tanta: ‘Wiza o ya
porofetere nge,
fingilira mbunga zaIsraeli!’
8Ngapi omu nani fingilira eyi
ga dira kufinga Karunga?
Ndi asi ni ruganese nonkango dehandu,
Karunga age ga hana kudiruganesa?
9Ame kuvamonena komamanya gokutuntuka;
ame hena kuvhura kuvatarera konondundu.
Awo muhoko ogu gwa likerera;
awo va diva asi kwa va swera
va pitakane nomuhoko dapeke.
10Ruvharo rwaIsraeli runzi
ngwendi mbundu —
awo vanzi unene,
nokuvhura si kuvavarura.
Sigeni nge ni hulise mazuva
gange ngwendi name gumwe
gomombunga zaKarunga.
Sigeni nge ni fe nombili ngwendi muhungami.”
11Makura Baraka ta tantere Baramu asi: “Yinke ono rugana nge ove. Amesi ame kuna ku reta oku o ya fingilire nonkore dange, nye nayinye eyi ono rugana, kuna va tungike ava.”
12Age ta limburura asi: “Ame yeeyi a sansekere nge Hompa yelike yiyo ani ku tantere.”
Eporofeto lyauvali lyaBaramu
13Ano Baraka ta tantere Baramu asi, tu ze kumwe kevega lyapeke oku no ka vhura kumonena Vaisraeli vamwe ko ava vana kara pepi. Kwina yiko no ka va fingililira nge. 14Age ta mu twara kosanzara zaSofimu kondungu zondundu zaPisiga. Age ta tungire ko nye yizambero yitano‐nayivali, makura ta zambere po ntwedu nekungwe pwankenye sizambero.
15Baramu ta tantere Baraka asi: “Ove kara nye paapa ponzambo zoge zeswakerero, ame tanko ni ka gwanekere naHompa.”
16 Hompa ta gwanekere naBaramu, makura ta mu tantere eyi na ka uyunga, ta mu tumu a tengure kwaBaraka, a ka mu sansekere mbudi zendi. 17Age makura ta zi, ta ka gwana Baraka age simpe haga sikamena ponzambo zendi zeswakerero kumwe noVagendesi womoMowaba. Ano Baraka ta pura eyi ana uyunga Hompa. 18Baramu ta porofeta ngesi asi:
“Wiza Baraka zaSiporo,
o purakene eyi nina kuuyunga.
19Karunga kapi ga kara ngwendi
muntu ogu a tanta yimpempa.
Age kapisi muntu ogu
a rundurura magazaro gendi.
Nkenye eyi a tumbwidire
age kuyisikisa mo.
20Ame kuna pangere nge ni tungike,
ano nsene Karunga ana mana
kutungika, ame nokuvhura si kuyikandana.
21Ame kapi na mono yiponga mwaJakopo
ndi asi ehudi moIsraeli.
Hompa Karunga gwawo pwawo
ga kara,
awo kwa mu tumba asi Hompa gwawo.
22Karunga kwa va gusa moEgipite,
yiyo a va kondjere moomu
azi rwisa nyatji konombinga dazo.
23Kapi kwa kara katemba ndi upure
wokuruganesa u kwate muhoko gwaIsraeli.
Ano ntaantani vantu ngava
uyunga yokuhamena Vaisraeli:
‘Tareni si nye Karunga
eyi ana rugana!’
24Muhoko gwaIsraeli gwa kara
ngwendi nyime gononkondo:
Kapi a pwizumuka
dogoro ta lipapagwire erambo,
dogoro ta nu po honde
zeyi ana dipaga.”
25Ano Baraka ta tantere Baramu asi: “Moomu ngesi ono nyoka kufingilira mbunga zaIsraeli, nokuvatungika si kooku, wa ha va tungika.”
26Baramu ta mu limburura asi: “Nani kapi kani howo kuyikutantera asi ame ntudi yeeyi na tantera nge Hompa yiyo nani rugana?”
Eporofeto lyautatu lyaBaramu
27Baraka ta tantere Baramu asi: “Wiza tu ze kevega peke. Mpamwe Karunga na yi panda asi ove o ka va fingililire nge kwina.” 28Ano age makura ta twara Baramu kondungu zondundu zaPeyoro, ezi za tarera momburundu. 29Baramu ta mu tantere asi: “Tungira nge apa yizambero yitano‐nayivali, ove o retere nge nontwedu ntano‐nambali nomakungwe gatano‐nagavali.” 30Baraka ta yi rugana moomu vana yi mu tantere, ta zamba ntwedu nekungwe pwankenye sizambero.
© Egwanekerobibeli Lyanamibia 1987, 2003
© Bible Society of Namibia 1987, 2003