Numeri 22
22
Hompa gwaMowaba ta tumine Baramu
1Vaisraeli tava twikire rugendo rwawo, makura tava ka tura kamba zawo momazana gaMowaba korwaUpumezuva waJorodana kulivyuka naJeliko. 2Hompa Baraka zaSiporo apa ga mwene nayinye eyi va rugene Vaisraeli Vaamoli, 3age mwene nombunga nazinye zaMowaba tava kara nye nowoma wounene koVaisraeli, yeeyi awo vanzi unene va kere. 4Vamowaba tava tantere vagendesi woVamidiyani asi: Mbunga ezi ngazi zonagura po usimbu nkenye eyi ya tu kundurukida ngwendi ntwedu ezi zina kumana wayi komalisiro. Moruveze oro Baraka yige ga kere hompa goVamowaba. 5Makura ta tumu nye nontumi kwaBaramu zaBeyoro, ogu ga tungire koPetoro pepi nomukuro Efurata mosirongo saAmawu. Tadi mu twarere mbudi ezi asi: “Tani ku divisire asi moEgipite kwa tunda mo muhoko. Vantu vago kwa lihanena napenye, vana vhama nge. 6Awo vanzi kutupita, na ku kanderere, wiza o ya va fingililire nge. Makura, mpamwe ose natu vhura kuvafunda tu va tjida‐tjide mo mosirongo. Yeeyi ame na diva asi ogu ono swere ove, kuna mu swererere, ano ogu ono fingi, nage kuna mu fingililire.”
7Makura vagendesi woVamowaba nava woVamidiyani tava pitura mfuto zefingo, va ze nazo kwaBaramu, tava mu sikisire mbudi zaBaraka. 8Baramu ta va tantere asi: “Rareni apa masiku ganaina, mungura ntani nye ngani mu sansekera nkenye eyi ga tantera nge Hompa.” Makura vagendesi woVamowaba tava kara nye pwaBaramu.
9Karunga ta wiza kwaBaramu ta mu pura nye asi: “Vagarake owo vana kara poge?”
10Age ta limburura asi: “Hompa Baraka gwaMowaba yige ana va tumu kwange va ya divise nge 11asi moEgipite kwa tunda mo muhoko ogu gwa lihanena mosirongo nasinye. Age kuna hara ni va mu fingire asi a vhure kuvafunda a va tjida‐tjide mo mosirongo.”
12Karunga ta tantere Baramu asi: “Nanyamoge si wa ha yi hetekera asi o ze kumwe nowo, asi o ka fingilire mbunga zaIsraeli, yeeyi awo netungiko lyange va kara.”
13Eyi lya sa ko, Baramu makura ta zi konontumi daBaraka, ta va tantere asi: “Tengureni kweni, Hompa ana nyokesa nge kuza kumwe none.” 14Ano awo tava tengura nye kwaBaraka, va ka mu sansekere asi Baramu ana nyoka kuza kumwe nawo.
15Ano Baraka ta tumununa ko nye sivaro sosinene sovagendesi vekuto lyenene. 16Awo tava zi kwaBaramu, tava mu twarere mbudi ezi za tundire kwaBaraka asi: “Na ku kanderere, pwa ha kara esi sina kukulimbika kuwiza kwange. 17Ame ngani ku pa mfeto zonene nokurugana nkenye tupu eyi ngo tanta. Na ku kanderere, wiza o ya fingire nge muhoko ogu.”
18Ano Baramu ta limburura asi: “Baraka nampili a pe nge sisiliveli nongorodo nazinye zomombara zendi, ame nokuvhura si ni nyoke mpangera zaHompa Karunga gwange nampili mokaninke kokanunu kaaka. 19Ano nye rareni paapa masiku ganaina, moomu va ninkire vakweneni, ni koneke tanko nsene asi Hompa ana kara noyuma peke yokusansekera nge.”
20Masiku googo Hompa ta wiza kwaBaramu, ta mu tantere asi: “Vantu ava nsene asi kuna wiza, va ku pure o ze nawo, liwapaika tupu o ze nawo, nye ka rugane yeeyi nani ku tantera yelike.” 21Ano eyi lina si, Baramu ta kutire sindongi sendi, makura ta zi kumwe novagendesi woVamowaba.
Baramu nosindongi sendi
22Karunga ta handukire Baramu yeeyi ga katukire a ze. Baramu, apa ga rondere sindongi sendi, kwa zire kumwe novakareli vendi vavali. Muengeli gwaHompa ta sikama monzira a va kondere. 23Sindongi apa sa mwene muengeli ana sikama monzira, age ana kwaterere rufuro, tasi zapuka monzira, si dukire momapya. Makura Baramu ta si toona, ta si tengwidire monzira. 24Muengeli ntani ana sikama monzira apa za nunupira nzira pokatji koyikunino yoyindjembere yivali, ano ekuma lyomamanya lya kere konombinga nadinye donzira. 25Sindongi apa sa mwene hena muengeli, tasi linyamberekeda kekuma, si senenekede mpadi zaBaramu kwalyo. Baramu ta si toona hena. 26Muengeli ta heda hena simpe komeho, ta sikama apa za nunupa nzira pwa pira mpito zokupitira konombinga nadinye. 27Poruveze oru sindongi tupu sa mona hena muengeli, tasi bwakama. Baramu makura ta handuka, ta toona sindongi nepongopongo lyendi. 28Ano Hompa ta zahura sindongi si uyunge, tasi pura Baramu asi: “Yisinke nina ku zono eyi ono toonene nge ngesi yikando yitatu nye?”
29Baramu ta limburura asi: “Yeeyi ono monesa nge sa ugova! Ngano kani kara norufuro, ngano nina ku dipaga.”
30Sindongi tasi limburura asi: “Nani ame kapisi sindongi esi o rondanga moukaro woge naunye dogoro ezuva lyanaina? Na yi ku rugana rumwe ngesi?” Age asi: “Hawe.”
31 Hompa makura ta mahura meho gaBaramu, ta mono muengeli, ana sikama age ana kwaterere rufuro. Baramu ta liganda, sipara sendi tasi tu pevhu. 32Muengeli ta mu pura asi: “Morwasinke ono toonene sindongi soge ngesi yikando yitatu? Ame kuna wiza ni ku kondere monzira zoge, yeeyi kapi zina zire mo. 33Nye sindongi soge sina mono nge, yiyo sina zapuka monzira yikando yitatu. Ngano kapisi yimo sina rugana, ngano nina ku dipaga, aso si paruke.”
34Baramu ta limburura asi: “Ame nina zono. Kapi kani yi diva asi nyove ono sikama monzira o kondere nge. Ano moomu ngoso ono yi tara nye asi yidona, ame ni twikire hena nzira zange, tani tengura kwetu.”
35Ano muengeli ta mu tantere asi: “Zende novantu ava, nye ka rugane yeeyi nani ku tantera yelike.” Makura Baramu ta zi nye nawo.
Baraka ta tambura Baramu
36Baraka apa ga zuvha asi Baramu ta wiza, ta zi a ka gwanekere nendi koAra, sitata esi sa kara komukuro Arunoni komururani gwaMowaba. 37Baraka ta tantere Baramu asi: “Apa na ku tumininine, yisinke eyi wa dilire kuwiza? Ove kwa gazarere asi ame nokuvhura si kukufuta eyi yina gwana po?”
38Baramu ta mu limburura asi: “Na wiza, ndi kapisi yimo? Ntaantani nonkondo nye musinke nina kara nado? Ame yeeyi ana kusansekera nge Karunga yelike nani ku tantera.” 39Makura Baramu ta zi kumwe naBaraka kositata Husoto. 40Baraka yiko ka dipagerere yimuna nononzwi, makura ta tumine nyama zimwe Baramu novagendesi ava va kere nendi.
Eporofeto lyomuhowo lyaBaramu
41Eyi lina si, Baraka ta pitura Baramu va ka ronde koBamoti‐Bara, awo yipo nye va wape kumona nawa ruha rumwe rombunga zaIsraeli.
© Egwanekerobibeli Lyanamibia 1987, 2003
© Bible Society of Namibia 1987, 2003