Numeri 1
1
Evaruro lyokuhova
1Mezuva lyomuhowo lyokwedi kwauvali momumvho gwauvali kutunda apa va tundire Vaisraeli mosirongo saEgipite, Hompa kwa tanterere Mosesa moMburundu zaSinayi moNkongoronzugo zoMagwanekerero asi: 2“Nove naArona, vareni Vaisraeli navenye momazimo nomomapata gawo. Tomu tjanga madina govagara navenye 3wonomvhura nomurongo mbali nava va pitakana opo, ava vana wapere moukwayita. 4Kuninka ko mwankenye rudi ekurusimbi lyopomazimo li mu kwafe.”
5-15Madina govagara ava va horowere ngava mu kwafa gaga:
| Rudi | Esimbi lyepezimo |
|---|---|
| Rubena | Elisuli zaSedeuli |
| Simiyoni | Serumiyeli zaSulisadayi |
| Juda | Nasoni zaAminadabu |
| Isasikali | Netaneli zaSuwara |
| Seburoni | Eliyaba zaHeroni |
| Efurayimi | Elisama zaAmihudi |
| Manase | Gamaliyere zaPedasuli |
| Mbenyameni | Abidani zaNgidiyoni |
| Dana | Ahiyeseli zaAmisadayi |
| Aseli | Pagiyeli zaOhurani |
| Gada | Eliyasafa zaReweli |
| Nafitali | Ahira zaEnani |
16Masimbi gopomazimo aga, yigo nye vapitisili womomazimo gawo ava va horowerere sirugana esi mombunga. 17Mosesa naArona makura tava gusa owo vagara murongo navavali, 18tava pongeke mbunga mudima mezuva lyomuhowo lyokwedi kwauvali. Vantu navenye kwa va tjangeserere momarudi nomomapata gawo. Madina govagara navenye wonomvhura nomurongo mbali nava va pitakana opo kwa ga tumbagwire, makura tava ga tjanga, 19moomu ga yi penge Hompa. MoMburundu zaSinayi yimo ga tjangerere Mosesa vantu. 20-46Vagara wonomvhura nomurongo mbali nava va pitakana opo, ava va waperere moukwayita, kwa va tjenge madina gawo mokuliza nomazimo nomapata gawo, kutamekera korudi rwaRubena, mbeli zaJakopo. Yivaro eyi ya kere po yoyo:
| Rudi | Sivaro |
|---|---|
| Rubena | 46 500 |
| Simiyoni | 59 300 |
| Gada | 45 650 |
| Juda | 74 600 |
| Isasikali | 54 400 |
| Seburoni | 57 400 |
| Efurayimi | 40 500 |
| Manase | 32 200 |
| Mbenyameni | 35 400 |
| Dana | 62 700 |
| Aseli | 41 500 |
| Nafitali | 53 400 |
| Sivaro mudima | 603 550 |
47Nye Varevhi kapi va va tjangere ngwendi marudi makwawo, 48yeeyi Hompa kwa tanterere Mosesa asi: 49“Nsene to tjanga mbunga zoVaisraeli, nokurutjangerera ko si rudi rwaRevhi. 50Tura Varevhi moupangi woNkongorozugo zoMagwanekerero neyi nayinye ya hamena mo. Awo yiwo ngava zi simba‐simba kumwe neyi ya hamena mo oku tava ruganene mo. Ngava dike notenta dawo di kundurukide Nkongorozugo. 51Nsene tomu dirura kamba zeni, Varevhi yiwo wokuzungurura Nkongoronzugo nokukazidika pevango eli muna kukatura. Nkenye nkaramuntu ogu nga heda pepi nazo, va mu dipage. 52Vaisraeli vamwe po ngava dike notenta monombunga, nkenye mugara nombunga zendi nerembe lyawo, 53nye Varevhi ngava dike notenta dawo di kundurukide Nkongoronzugo zoMagwanekerero, va zi nomene, asi a dire kuheda muntu pepi nazo, neisi na retera mbunga zoVaisraeli ehandu lyange.” 54Mbunga zoVaisraeli makura tazi rugana nayinye, moomu ga tanterere Hompa Mosesa.
© Egwanekerobibeli Lyanamibia 1987, 2003
© Bible Society of Namibia 1987, 2003