Numeri 19
19
Enoto lyongombe zongeha
1 Hompa kwa tanterere Mosesa naArona asi 2va gave nompangera edi koVaisraeli: Reteni ngombe zonkadi zongeha zandjewa‐ndjewa ezi va dira kukutira rumwe, 3mu zi gave komupristeli Eliyasara. Azo kuzipwagesa ponze zokamba, makura tava zi dipagere komeho zendi. 4Ano Eliyasara a guse ko honde zazo zimwe, ta zi nagagere nonyara zendi koyiha yoNkongoronzugo zoMagwanekerero yikando yitano‐nayivali. 5Simuna mudima kumwe nosipapa saso nonyama zaso nohonde zaso nomaura kuyiswakerera komeho zomupristeli. 6Age makura ta gusa yintetwa yositji sosedeli nosivagara sohisopo nekehe limwe lyegeha, ta yi zugumine pomundiro. 7Konyima zeyi ta kuhu yikoverero yendi, ta litjiragere mema korutu, ntani nye ana kuhwilira mokamba. Nye age ta kara ngorooro ga hana kukuhuka pampo dogoro kongurova. 8Mugara ogu ana swakerere ngombe nage ta kuhu yikoverero yendi, ta litjiragere mema korutu, nye nage ta kara ngorooro ga hana kukuhuka pampo dogoro kongurova. 9Ano mugara gumwe gokukuhuka pampo ta pongaike enoto lyongombe, ta ka li tura pevega eli lya kuhuka pampo ponze zokamba, apa nava ka li pungwira mbunga zaIsraeli, asi ngava li ruganese pokudinda ko mema galyo gokugusisa po uhakuhuki pampo. Mpo ezi zokuruganesa pokugusa nzo. 10Mugara ogu ana pongaike enoto a kuhwe yikoverero yendi, nye ta kara ngorooro ga hana kukuhuka dogoro ngurova. Nokomeho oko yizo mpangera zokukwama zoozo one Vaisraeli novanayirongo ava muna kara nawo.
Kuguma kosimpu
11Nkenye ogu ana kuguma kosimpu ta nyata pampo mazuva gatano‐nagavali. 12Age a likuhure nomema gekuhuro mezuva lyautatu neli lyautano‐nauvali, makura ta kuhuka nye pampo. Ano nsene kapi ana kulikuhura momazuva nagenye aga gavali neli lyautatu neli lyautano‐nauvali, nokukuhuka si pampo. 13Nkenye ogu ana kuguma kosimpu, nye a dire kulikuhura mwene pampo, ta kara ngorooro ga hana kukuhuka, yeeyi kapi va mu tjiragera korutu mema gekuhuro lyopampo. Age kunyateka Nkongoronzugo zoMagwanekerero zaHompa. Muntu gwangesi nokumutara si hena asi nage gombunga zaKarunga.
14Muntu nsene ana fire motenta, ogu ana kara motenta siruwo esi ana kufa ndi a hwilire mo, ta nyata pampo mazuva gatano‐nagavali. 15Nkenye kavaza ndi kayiga aka ka pira nswiko nako taka nyata. 16Ano nogu gokuguma muntu ogu vana dipaga ndi kuna fu nomfa edi ava fu vantu navenye ponze ndi nkenye ogu ana kuguma kosisupa somuntu ndi kontoko, nage ngosikwawo ta kara ga hana kukuhuka mazuva gatano‐nagavali.
17Pouhakuhuki wangesi kugusa po enoto lyongombe ezi vana swakerere lyokugusisa po nzo, tava li tura mokayiga, makura tava tjire mo mema gomawa. 18Pomuhowo gumwe ogu ga kuhuka pampo ta gusa sisampo sohisopo, ta si tupike momema, makura ta sampere tenta noyininke nayinye eyi yina kara mo novantu ava kava kara mo. Mwaruvali gumwe ogu ana kuhuka pampo ta sampere mema muntu ogu ana gumu kosisupa somuntu ndi kosimpu ndi kontoko. 19Mezuva lyautatu nemezuva lyautano‐nauvali muntu ogu ga kuhuka pampo ta sampere mema ogu ga dira kukuhuka. Mezuva lyautano‐nauvali ta kuhura muntu ogo, ogu ana pu kukuhuka pampo pokutoka kezuva, nsene ana mana kukuhwa yikoverero, hena ana litjiragere mema korutu.
20Nkenye ogu ana linyateke pampo, nye a dire kulikuhwa mwene, ta kara ngorooro ga hana kukuhuka, yeeyi kapi va mu tjiragera korutu mema gekuhuro lyopampo. Age kunyateka Nkongoronzugo zoMagwanekerero zaHompa. Muntu gwangesi nokumutara si hena asi nage gombunga zaKarunga. 21Nokomeho oko yizo mpangera zokukwama zoozo one namuvenye. Muntu ogu ana sampere mema gekuhuro, nage ta kuhu yikoverero yendi. Ano nkenye ogu ana gumu mema aga, ta kara ngorooro ga hana kukuhuka pampo dogoro kongurova. 22Nkenye esi ana kuguma muntu gokunyata pampo, naso tasi nyata. Ano ogu ana kusiguma, ta kara ngorooro ga hana kukuhuka pampo dogoro kongurova.
© Egwanekerobibeli Lyanamibia 1987, 2003
© Bible Society of Namibia 1987, 2003