Numeri 18
18
Yetumbukiro lyovapristeli noVarevhi
1 Hompa kwa tanterere Arona asi: “Ove novana woge wovagara novantu peke vepata lyoge nyone wokusimba maudigu gomaunzoni nagenye gokuhamena koyirugana yomoNkongoronzugo zoMagwanekerero nomaudigu goyirugana yomoupristeli. 2Kuninka ko vekoro lyoge worudi rwaRevhi ava ku ruganese ko tava ku kwafa, siruwo esi ono kurugana novana woge wovagara komeho zoNkongoronzugo zoMagwanekerero. 3Ngava sikise mo yirugana yawo yokuhamena koge neyi ya va tumbukira yoNkongoronzugo, nye awo nokuguma si koyininke yokupongoka yemEvega lyoKupongoka ndi kosizambero. Nsene va yi rugana, makura navenye nove nawo tomu fu. 4Ngava rugana kumwe noge, tava sikisa mo eyi ya va tumbukira yoyirugana nayinye yomoNkongoronzugo, nye nkaramuntu nokurugana si noge. 5Ove novana woge nyonelike wokusikisa mo eyi ya mu tumbukira mEvega lyoKupongoka nokosizambero, asi ehandu lyange li dire hena kusangumukira mbunga zoVaisraeli. 6Ame nyame na horowora vekoro lyoge Varevhi moVaisraeli, va kare sigava kweni. Awo kwa va pongwera nge, asi ava rugane yirugana yawo yomoNkongoronzugo zoMagwanekerero. 7Ove ko novana woge wovagara, nyonelike wokusikisa mo nayinye eyi ya tumbukira upristeli, neyi ya hamena kosizambero neyi yemEvega lyoKupongoka. Yininke eyi yiyo ya mu tumbukira, yeeyi ame kwa ku pa sigava soupristeli. Nkenye nkaramuntu ogu ana kuheda koyininke yokupongoka ta fu.”
Eyi ava gwana vapristeli
8 Hompa kwa tanterere Arona asi: “Diworoka asi ame tani ku pe yigava nayinye yokupongoka eyi ava pe nge, ya hana asi nonzambo deswakerero. Tani yi ku pe noruvharo roge, yi kare ruha oru rwa mu tumbukira narunye nanarunye. 9Nonzambo dokupongokerera edi da hasi kuswakererera posizambero, edi ko da mu hamena dedi: Nonzambo donombuto nedi dononzo nedi detengwido. Nayinye eyi ava gava kwange yonzambo zokupongoka, yoge novana woge wovagara. 10Omu yi lire mEvega lyoKupongoka, nye vagara velike wokuyilya; omu yi tare asi kwa pongoka.
11“Nankenye sigava sokupongoka, esi ava gava Vaisraeli kwange, seni. Tani yi ku pe novana woge wovagara nava wovakadi ngayi kare yeni nokomeho oko. Nkenye ogu gemepata lyoge, ogu ga kuhuka pampo, kuyilya tupu.
12“Ame tani ku pe yoyiwa po yosipe eyi ava pe nge Vaisraeli nkenye mvhura eyi: magadi gononzwe novhinyu nonombuto. 13Nayinye eyi yeni. Nkenye ogu gemepata lyoge, ogu ga kuhuka pampo, kuyilya tupu.
14“Nkenye esi va pongwera nge moIsraeli, va hana kusigazarera yongandi, seni.
15“Nkenye mbeli zomuntu ndi zosimuna, ezi ava gava Vaisraeli kwange, zeni. Nye ove nyove kutambura ndando zokuzowesesa nkenye mbeli zomuntu, ove hena nyove kutambura ndando zokuzowesesa nkenye mbeli zosimuna esi sa dira kukuhuka pampo. 16Vakeke kuvazowesesa yimaliva yosisiliveli yomuwaya‐waya yitano moomu ya kara po, nsene vana siki kokwedi kumwe. 17Ano nombeli donongombe nedi dononzwi nedi doyikombo nokudizowora si; ado daamwange, ano kudizambera nge ntani. Honde zayo kuzitjiragera kosizambero, magadi gayo kugaswakerera, ga kare nzambo zonondya. Edumba eli lya za nge komutjima. 18Nyama zayo zeni kumwe nokagogero nosirama setako sokulyo yonzambo zokupongoka.
19“Tani mu pe novana woge wovagara nava wovakadi nonzambo nadinye dokupongoka edi ava pe nge Vaisraeli, ngadi kare deni nokomeho oko. Aga yigo malikwatakano gokudira kuligaunuka, aga na paka pokatji ketu noge noruvharo roge.”
20 Hompa ta tantere Arona asi: “Kapi ngo kara nemona lyokuweka, ove hena kapi ngava ku tetera ko karuha kamwe kosirongo soVaisraeli. Ame Hompa, nyame ruha roupingwa woge.”
Eyi ava gwana Varevhi
21 Hompa kwa uyungire asi: “Ame na pe Varevhi yiumurongo nayinye eyi azi retere nge mbunga zaIsraeli. Yizo mfeto zawo morwayirugana yawo yokupakera mbili Nkongoronzugo zoMagwanekerero. 22Vaisraeli nokuheda si hena koNkongoronzugo, nsene va yi rugana, tava likokere vene nomfa. 23Kutunda apa Varevhi yiwo velike wokupakera mbili Nkongoronzugo, awo yiwo za tumbukira. Ezi yizo ngazi karerera mpangera zanarunye nokoruvharo rweni nako. 24Varevhi kapi ngava kara nemona lyavene moIsraeli, yeeyi na va pe yiumurongo eyi ava pe nge Vaisraeli yoyigava yokupongoka, yi kare yawo. Yipo nye na va tanterere asi kapi ngava kara nemona lyavene moIsraeli.”
Yiumurongo
25 Hompa kwa pangerere Mosesa, 26a tantere Varevhi asi: “Nsene tomu tambura koVaisraeli yiumurongo eyi ana kumupa Hompa yi kare yeni, none tomu gusa ko siumurongo, si kare sigava sokupongoka saHompa. 27Sigava esi tomu si tara ngwendi siumurongo sonondimi esi ava rugana sonombuto donompe novhinyu zompe. 28Monkedi ezi none hena tomu gava sigava sokupongoka esi sa hamena kwaHompa sokutunda moyiumurongo nayinye eyi omu gwana koVaisraeli. Kweyi omu gwana, none tomu gusa ko, mu gave kwaHompa sigava sokupongoka, si kare somupristeli Arona. 29Yokugava tomu yi gusa mweyi yoyiwa po eyi omu gwana. 30One nsene muna gusa ko kweyi yoyiwa po mu gave, eyi yina kuhupa po tomu weke nye, moomu a weke ndimi eyi ana hupisa po, nsene ana mana kuzamba nzambo zendi. 31Nyaamweni nomapata geni kuyilya tupu nkenye apa muna harere, yeeyi yizo mfeto zeni zoyirugana yeni yomoNkongoronzugo. 32Kapi mu ture nzo pokuyilya, nsene mwa gusa ko kweyi yoyiwa po, mu gave kwaHompa. Nokudirura si yigava yokupongoka yoVaisraeli pokuyilya, ayo yoyiwa po va hana kuhova tanko kuyizamba, neisi mu fa.”
© Egwanekerobibeli Lyanamibia 1987, 2003
© Bible Society of Namibia 1987, 2003