Numeri 20
20
Yihoroka yopoKadesi
(Ex 17:1-7)
1Mokwedi komuhowo mbunga nazinye zaIsraeli kwa ka sikire momburundu zaSini, makura tava dike kamba zawo poKadesi. Apo yipo ga filililire Miliyama, tava mu horeke.
2Vantu opo kapi va gwene po mema, makura tava ya umbilikida oMosesa naArona, 3tava va tangwinine asi: “Ngano kwa fililire komeho zoNkongoronzugo zoMagwanekerero zaHompa kumwe noVaisraeli vakwetetu, ngano hasa. 4Yinke nye ono tu retere momburundu nye? Asi tu ya fire mo sa nye tupu noyimuna yetu? 5Yinke nye eyi wa tu gusira moEgipite o tu rete omu mengorondo mwa hasi kumena kaninke? Nombuto mutupu, ekuzu mutupu, mandjembere mutupu nonondunga si. Nomema gaaga gokunwa mutupu!” 6OMosesa naArona makura tava ligora komeho zombunga, tava sikama pevero lyoNkongoronzugo zoMagwanekerero, tava nyongama va tare yipara pevhu, makura uyerere wekaropo lyaHompa tau va monekere.
7 Hompa ta tantere Mosesa asi: 8“Gusa mpango ezi za kara komeho zoSikesa sEgwanekero, makura nove naArona mu pongeke mbunga nazinye. Komeho zanavenye tantera emumanya olyo nkumwe li mu pe mema. Pokuninka ngesi to popomwene mbunga mema memanya, nkumwe va nwe noyimuna yawo.” 9Mosesa makura ta zi a ka hare mpango, moomu ga mu tanterere Hompa.
10Age naArona tava pongeke mbunga nazinye komeho zemumanya, makura Mosesa ta tanta asi: “Purakeneni vanandjorongani one! Makura kuvhura nye tu mu gusire mema memanya eli ndi?” 11Makura Mosesa ta zerura mpango, ta zi toona pemanya ruvali, va liharuka ko, mema kuna kupoposa, makura vantu navenye noyimuna tayi nu.
12Nye Hompa ta tugumukire oMosesa naArona asi: “Moomu muna pili epuro lyokusikilira mo, mu singanyeke nonkondo dange dokupongoka komeho zombunga, kapi hena ngomu va twara mosirongo esi na va tumbwidira asi ngani si va pa.”
13Eyi kwa horokere poMeliba, apa va tangwinine Vaisraeli, va vyuke Hompa, makura ga va likidire asi age kwa pongoka.
Hompa gwaEdomu ta silike Vaisraeli kuvindakana mosirongo sendi
14Mosesa kwa tuminine nontumi poKadesi di ze kwahompa gwaEdomu. Awo tava mu tantere asi: “Mbudi ezi kovanavanyoko womazimo gaIsraeli zina tundu. Nove wa diva tupu udigu ou twa kere nawo 15nomu va zire ozinyakurwetu koEgipite, va ka kare mo nomvhura dononzi. Vaegipite ngava rugana momudona ozinyakurwetu nose. 16Ose yipo nye twa kugire kwaHompa asi a ya tu kwafe. Nkugo zetu ga zi tondokere, makura ta tumu muengeli ogu ga tu gusire moEgipite. Ano ntaantani potuli poKadesi, katata aka ka kara pomururani gosirongo soge. 17Tuna kanderere, tu pulisira tu vindakane mosirongo soge. Ose nyamwetu noyimuna yetu kapi ngatu zapuka asi tu ze momapya goge ndi moyikunino yoge yomandjembere, nomonondjombo doge si kapi ngatu nwa mo mema. Ngatu genda moomu monkungwasirongo dogoro ngatu pwage mo mosirongo seni.”
18Nye Vaedomu tava va limburura asi: “Tuna nyoka kuvindakana mo omu mosirongo setu! Nsene ngomu yi hetekera, ngano ngatu mu zira.”
19Vaisraeli tava va tantere asi: “Ose ngatu genda moomu monkungwasirongo, ano nsene asi nyamwetu ndi yimuna yetu ngayi nwa mema geni, ngatu ga futa — eyi tuna hara ko ose yooyo yokuvindakana mo makura.”
20Vaedomu tava rugurura mo asi: “Tuna nyoka ose!” Tava katuka nombunga zonene zovakwayita asi va ka va rwise. 21Vaisraeli kwa tengwire tava ka genda zapeke morwa Vaedomu kwa va silikire kuvindakana mosirongo sawo.
Nomfa daArona
22Mbunga mudima zaIsraeli tazi tundu moKadesi, tazi ka sika kondundu zaHoro 23komururani gwaEdomu. Oko yiko ga tantererere Hompa oMosesa naArona asi: 24“Arona kapi nga za mo mosirongo esi na tumbwidira Vaisraeli asi ngani si va pa, ta fu, morwa one mu vavali kwa nyokere mpango zange poMeliba. 25Gusa Arona namunwendi Eliyasara mu ronde nawo kondundu zaHoro, 26makura o ka huture Arona yidwara yosiupristeli, o ka yi dwareke munwendi Eliyasara. Arona yiko na ka fira.” 27Mosesa ta rugana moomu ga mu pangerere Hompa. Tava rondo kondundu zaHoro moyitarameho yombunga nazinye, 28makura Mosesa ta hutura Arona yidwara yosiupristeli, ta yi dwareke Eliyasara. Oko kondungu zondundu yiko ga ka fililire Arona, ano Mosesa naEliyasara tava tundu ko, tava humburuka. 29Mbunga mudima tazi yi nongonona asi Arona ana fu, tava mu lili mazuva nomurongo ntatu.
© Egwanekerobibeli Lyanamibia 1987, 2003
© Bible Society of Namibia 1987, 2003