Numeri 17
17
Mpango zaArona
1 Hompa kwa tanterere Mosesa asi: 2“Tantera mbunga zoVaisraeli asi zi ku pe nompango murongo nambali, kwankenye mugendesi gorudi ku tunde zimwe. Edina lyankenye mugendesi to li tjanga pompango zendi. 3Tjanga edina lyaArona kompango zorudi rwaRevhi. Ano nkenye mugendesi gorudi a kare nompango zimwe tupu. 4Di tura moNkongoronzugo zoMagwenekerero komeho zoSikesa sEgwanekero, oku ani gwanekerere noge. 5Makura mpango zomuntu ogu na horowora ngazi hokera. Pokurugana ngesi nomutangu doVaisraeli edi da hana kupwa, tani di hagesa po.”
6Mosesa makura ta yi tantere Vaisraeli. Ano nkenye mugendesi ta mu pe mpango, mwankenye rudi zimwe, mokudipakerera murongo nambali. ZaArona nazo yipo va zi tulire. 7Mosesa ta tura nompango nadinye moNkongoronzugo zoMagwanekerero komeho zoSikesa saHompa sEgwanekero.
8Eyi kwa sa, Mosesa a ze moNkongoronzugo, ta mono mpango zaArona zorudi rwaRevhi zina hokere, nonombya dazo nenyango lyazo. 9Mosesa ta gusa nompango nadinye, ta ka di likida Vaisraeli. Vena tava mono eyi ya horokere, makura nkenye mugendesi ta gusa mpango zendi. 10Hompa ta tantere Mosesa asi: “Mpango zaArona zi tengwidira ko komeho zoSikesa sEgwanekero. Azo tava zi pungwire zi kare erondoro lyoVaisraeli ava ava tanguna, asi ngava fa, nsene kapi vana kuhageka nomutangu dawo.” 11Mosesa makura ta yi rugana moomu ga mu pangerere Hompa.
12Mbunga zoVaisraeli tazi tantere Mosesa asi: “Moomu ngoso tuna huru po nye! 13Nsene asi nkenye ogu ana kuheda pepi noNkongoronzugo zoMagwanekerero ta fu, makura natuvenye tuna fu nye!”
© Egwanekerobibeli Lyanamibia 1987, 2003
© Bible Society of Namibia 1987, 2003