Numeri 16
16
Ndjorongani zaKora naDatani naAbiramu
1-2Kora zaIsihare gemezimo lyaRevhi gwamwaKehati, ta sikama a di vyuke Mosesa. Age kwa lipakererere novagara vatatu womorudi rwaRubena: oDatani naAbiramu, vana wovagara vaEliyaba, naOno zaPereti kumwe noVaisraeli mafere gavali nonomurongo ntano, masimbi gefumano ava za horowere mbunga. 3Awo tava pongo poMosesa naArona, makura tava uyunga asi: “Tomu litwara mo unene! Vantu navenye wombunga kwa hamena kwaHompa, Hompa kwa kara nose natuvenye. Ano ove Mosesa eyi o lizerwire po ngesi o pitakane mbunga zaHompa yinke nye?”
4Mosesa apa ga yi zuvhire eyi, ta ligandere pevhu a kanderere. 5Age makura ta tantere Kora novakwami vendi asi: “Mungura ngurangura Hompa nga tu likida ava va mu hamena, nogu ga lipongwera, age ga mu horowora, kuheda tupu kwendi kosizambero. 6-7Mungura ngurangura nove novakwami woge tomu gusa yipana yomundiro, ngomu ture po makara gomundiro, tomu tura ko manganganga gokututumikidisa, makura tomu yi twara kosizambero. Opo yipo nye ngatu yi monena asi yilye ogu ga horowora Hompa. One Varevhi nyone muna kulitwara mo unene!”
8Mosesa ta twikire kutantera Kora asi: “One Varevhi, purakeneni! 9One kweni yinunu nye, eyi ga mu horowora Karunga mombunga, asi mu mu hamene mu mu kerere moNkongoronzugo zoMagwanekerero mu kwafe oku tomu ruganene mbunga zendi? 10Age kwa mu pulisira noVarevhi navenye asi mu mu hede pepi, makura one yiyo muna kukondjera kugusa noupristeli woou! 11Ano eyi muna kutangwisa Arona, nove novakwami woge Hompa mwene muna kupirukira.”
12Makura Mosesa ta tumine oDatani naAbiramu, nye awo tava tanta asi: “Kapi natu wiza ko ose. 13Kapi yina gwana nani yokutugusa mosirongo sosiwa saEgipite, o ya tu dipagese omu momburundu? Ove hena yiyo ono kulipaka uhompa asi o tu pangere? 14Ove hena ndangove kapi ono tu reta mosirongo sosiwa ndi o tu pe mapya noyikunino yomadjembere yi kare yetu, nye yiyo ono kutukumbagera. Kapi natu wiza ko ose oko!”
15Makura Mosesa ta handuka, ta tantere Hompa asi: “Nkenye kanzambo aka vana kureta vantu wa ha ka tambura. Nagumwe si ogu na rugana momudona; ndi asi ni guse kandongi komuntu ame.”
16Mosesa ta tantere Kora asi: “Mungura nove novakwami woge mafere gavali nonomurongo ntano ngomu wize koNkongoronzugo zoMagwanekerero. Arona nage yipo nga kara. 17Nkenye ogu nga piture sipana somundiro, ta tura po manganganga gokututumikidisa, makura ta yi reta komeho zaHompa.” 18Nkenye mugara makura ta gusa sipana sendi somundiro, ta tura po makara gomundiro, ta tura ko manganganga gokututumikidisa, makura ta yi twara pevero lyoNkongoronzugo zoMagwanekerero, ta ka sikama kumwe naMosesa naArona. 19Makura Kora ta pongeke mbunga nazinye, azo tazi sikama zi pe yipara koMosesa naArona pevero lyoNkongoronzugo. Poopo ngoso uyerere wekaropo lyaHompa tau moneka kombunga nazinye, 20makura Hompa ta tantere oMosesa naArona asi: 21“Liporeni po povantu ava, ame kuna hara kuvazonagura po ntaantani ngesi.”
22Mosesa naArona makura tava linyongamene va pe yipara pevhu, tava tanta asi: “Ove Karunga nyove ntundiliro zomwenyo govantu navenye. Nsene muntu gumwe tupu ana zono, ove o handukire nye mbunga mudima ndi?”
23 Hompa ta tantere Mosesa asi: 24“Tantera vantu va lipore ko konotenta doKora naDatani naAbiramu.”
25Mosesa kumwe nomasimbi goVaisraeli tava zi koDatani naAbiramu. 26Age makura ta tantere vantu asi: “Liporeni ko konotenta dovantu ava wovadona, mwa ha guma kwankenye kaninke aka va weka, neisi nava mu komberera none morwanonzo dawo.” 27Awo makura tava lipora ko konotenta doKora naDatani naAbiramu.
Datani naAbiramu kwa pwege, tava sikama pomavero gonotenta dawo kumwe novakadi vawo novana vawo. 28Mosesa ta tantere mbunga asi: “Apa ngesi tomu yi limonene asi ame sili Hompa ga tuma nge, ni rugane nayinye eyi, kapisi yokulifuminina nyamwange. 29Vagara ava nsene nava fa moomu ava fu vantu navenye, pa hana kukara mafutiro gaKarunga, ntudi kapisi Hompa ga tuma nge. 30Nye Hompa nsene na rugana eyi ya dira kukara po, evhu li zahame li va mine neyi va weka nayinye, va ze uzuni mosirongo sovafe, diveni asi vantu owo yiwo va zumba Hompa.”
31Tupu ga mana kuuyunga, evhu tali gaguka konhi zoDatani naAbiramu, 32tali va mini nomapata gawo, kumwe novakwami navenye vaKora neyi va weka. 33Makura tava zi nye uzuni mosirongo sovafe kumwe neyi va weka, evhu tali limbandwire, makura tava dongonoka. 34Mbunga nazinye zoVaisraeli ava va kere po, tava duka pokuzuvha nomutaku dovena. Makura tava zigire asi: “Tu dukeni, evhu neisi nali tu mina nose!”
35 Hompa makura ta tumu mundiro, tagu veveke po vagara mafere gavali nonomurongo ntano, ava va retere manganganga gokututumikidisa.
Yipana yomundiro
36Makura Hompa ta tantere Mosesa asi: 37“Tantera Eliyasara munwamupristeli Arona a guse mompire yipana yomundiro yongoporo yovantu ava vana pi. Makura makara gopoyipana yomundiro ka ga zugumine nako peke, yeeyi yipana yomundiro kwa pongoka. 38Epongoko lyayo kwa tunda apa va yi twere kosizambero komeho zaHompa. Ano gusa yipana yomundiro yovagara ava vana fu morwaunzoni wawo o yi hambure tupereki tokupepuka tokukudumikisa sizambero. Ayo ngayi kara erondoro lyombunga zaIsraeli.” 39Mupristeli Eliyasara makura ta gusa yipana yomundiro, tava yi hambura, yi kare tupereki tokupepuka tokukudumikisa sizambero. 40Eli kwa kere erondoro lyoVaisraeli asi nkenye ogu ga dira kuhama korudi rwaArona, nokuwiza si kosizambero komeho zaHompa a ya swakerere manganganga gokututumikidisa, neisi va mu zonagura po ngwendi Kora novantu vendi. Nayinye eyi kwa kere po moomu ga pangererere Hompa Eliyasara mwaMosesa.
Arona ta popere mbunga
41Eyi kwa sa, mbunga nazinye tazi tangwisa oMosesa naArona, tazi tanta asi: “Komu dipagere vantu vamwe vaHompa.” 42Eyi va mana kuponga navenye asi va di vyuke oMosesa naArona, tava pirukire koNkongoronzugo zoMagwanekerero, tava mono eremo lina zi kudumike nouyerere wekaropo lyaHompa una horoka. 43OMosesa naArona makura tava zi, tava sikama komeho zoNkongoronzugo. 44Hompa ta tantere Mosesa asi: 45“Liporeni po povantu ava, yeeyi asi ame kuna hara ni va zonagure po ntaantani!”
Awo makura tava linyongamene va tare pevhu. 46Mosesa ta tantere Arona asi: “Gusa sipana soge somundiro, gusa makara gomundiro kosizambero o ga ture po, makura o ture ko manganganga gokututumikidisa, makura o genderere ko o ze naso kombunga, o ka rugane yekuhuro lyawo pampo. Genderera ko! Ehandu lyaHompa nehepeko lyalyo nare lina tameke.” 47Arona ta yi limburukwa, ta gusa sipana sendi somundiro, ta dukire pokatji kombunga, ezi za pongere. Apa ga mwene asi ehepeko lina tameke nare, ta tura manganganga gokututumikidisa pomakara, a rugane yekuhuro lyombunga pampo. 48Age simpe haga sikamena pokatji kava wokufa nava wovazuni, ehepeko nalyo tali haga. 49Sivaro sovantu ava va fire kwa hulire po — 14 700, nye ava va fililire mondjorongani zaKora kapi va va varwilire ko. 50Ehepeko eyi lya haga, makura Arona ta tengura kwaMosesa kevero lyoNkongoronzugo zoMagwanekerero.
© Egwanekerobibeli Lyanamibia 1987, 2003
© Bible Society of Namibia 1987, 2003