Numeri 13
13
Nondadi
(Deut 1:19-33)
1 Hompa kwa tanterere Mosesa asi: 2“Horowora mugendesi gumwe mwankenye ezimo lyomomarudi murongo nagavali, o va tume ngwendi nondadi va ka nenge sirongo saKanani, esi nina kugava koVaisraeli.” 3-15Mosesa ta yi limburukwa, ta tumu vagendesi ava, va tunde momburundu zaParani, va ze:
| Rudi | Mugendesi |
|---|---|
| Rubena | Samwa zaSakura |
| Simiyoni | Safata zaHoli |
| Juda | Karebu zaJefune |
| Isasikali | Igali zaJosefa |
| Efurayimi | Hoseya zaNunu |
| Mbenyameni | Paliti zaRafu |
| Seburoni | Gadiyeli zaSodi |
| Josefa (Manase) | Gadi zaSusi |
| Dana | Amiyeli zaGemali |
| Aseli | Seturu zaMikayeli |
| Nafitali | Nahubi zaFofusi |
| Gada | Geweli zaMaki |
16Aga yigo madina gonondadi edi ga tumine Mosesa di ka nenge sirongo. Age kwa pirwire edina lyaHoseya zaNunu, li kare Josuwa.
17Mosesa apa ga va tumine, ta tanta asi: “Zendeni monzira ezi korwaMbindakano mu ka ronde konondundu. 18Ka tareni nawa omu sa fana oso sirongo, novantu ava va kara mo asi vangapi nononkondo dawo asi papi da hulira. 19Ka tareni nawa asi sirongo siwa ndi sidona, novantu nsene kwa tunga moyitata yoporuzera tupu ndi kwa yi kundurukida makuma. 20Ka tareni nawa nsene asi evhu lyamo lyetapa ndi lyomuheke‐heke noyitji nsene asi yitji mo. Nokukalidivara si, tomu ka pitura ko enyango eli ali yimi mo.” (Siruwo oso yiso aga pi mandjembere.)
21Vagara owo makura tava zi korwaMuzogo‐zogo va ka nenge sirongo kutundilira komburundu zaSini korwaMbindakano dogoro nokoRehoba pepi napa ava pitire va ze koHamati. 22Awo kwa hovere kuvyuka korwaMbindakano zosirongo, tava wiza poHeburoni, apa va kere womazimo goAhimani naSesayi naTalimayi, awo womoruvharo ronondungurume oru ngava tumbura asi Vaanaki. (Heburoni kwa si tungire nomvhura ntano‐nambali, aso Sowani somoEgipite simpe.) 23Eyi va wiza momuramba gwaEsikoli, tava tete mutayi gosisokombwa simwe somandjembere sosidigu, ntudi vagara vavali ntani va vhura kusipangeka. Awo kwa ka pitwire ko hena nondunga nekuzu. (24Evega olyo kwa li rukire muramba gwaEsikoli, morwa mutayi gomandjembere ogu va tetere mo Vaisraeli.)
25Eyi vana mana kunenga sirongo mazuva nomurongo ne makura tava tengura 26kwaMosesa naArona nokombunga mudima zaIsraeli poKadesi momburundu zaParani. Tava sanseke eyi va ka mona, makura tava likida eyi va ka pitura. 27Tava tantere Mosesa asi: “Ose kwa ka nenga sirongo, oku va tu tumine; sirongo sene singawo nevhu lyaso ewa. Enyango lyamo limwe lyeli. 28Nye vantu ava va kara mo vanankondo noyitata yawo yinene unene, ayo kwa yi kundurukida makuma. Yoyidona po yeeyi twa ka mona mo ruvharo rorudi ronondungurume. 29Vaamareki kwa kara korwaMbindakano zosirongo, ano Vaheti noVajebusi noVaamoli kwa kara kosirongo sonondundu; ano Vakanani kwa kara kEfuta lyoPokatji va kwamese mukuro gwaJorodana.”
30Karebu kwa mwenekedere vantu ava va tangwisire Mosesa, ta tanta asi: “Tu ka va homoneni, tu guseni sirongo; nonkondo detu dina gwana po dokusigusa si kare setu.”
31Nye vagara ava va zire naKarebu tava tanta asi: “Ose kapi twa paka nonkondo da gwana po dokuvahomwesa. Vantu vamo vanankondo unene kupitakana ose.” 32Pokuuyunga ngesi tava hanesa mutoto gomudona moVaisraeli gokuhamena sirongo esi va ka nenga. Tava tanta asi: “Mosirongo oso kapi amu yimi yokuvhura kuparuka vantu ava va kara mo. Nkenye ogu twa ka mona mure, 33nonondungurume deedi twa ka di mona mo, doruvharo rwaAnaki. Ose kwa limwene yoyinunu‐nunu ngwendi nompasimpasi, nawo si yimo va tu tere ngorooro.”
© Egwanekerobibeli Lyanamibia 1987, 2003
© Bible Society of Namibia 1987, 2003