Numeri 14
14
Mbunga zaIsraeli tazi tanguna
1Masiku mudima mbunga nazinye kwa kuganene oku tazi lili. 2Tava tangwisa oMosesa naArona asi: “Ngano kwa fira tupu moomwina moEgipite ngano hasa, ndi nampili moomu momburundu! 3Eyi ana kututwarera Hompa kosirongo oso yinke? A ka tu dipagese nye moyita! Vakadi vetu novana vetu ngava ka va weke nye. Nsene ngano tu tengura tupu kookwina koEgipite hena yinke?” 4Awo tava litantere‐tantere asi: “Tu lihorowereni mugendesi, tu tengureni koEgipite!”
5Mosesa naArona makura tava linyongamene komeho zombunga mudima. 6Ano Josuwa zaNunu naKarebu zaJefune, vavali womonondadi, tava taura yikoverero yawo morwa eguwo, 7tava tantere mbunga mudima asi: “Sirongo esi twa ka nenga, sirongo sosiwa unene. 8Hompa nsene sili ga tu hara, nga tu twara ko a ka tu pe sirongo sina sosingawo sevhu lyewa. 9Mwa ha pirukira Hompa, one hena mwa ha tjira vantu ava va kara mo, kapi ngatu va paka po. Hompa kumwe nose ga kara, yiyo ga haraganesa po vakarunga vawo ava ava va popere. Ano neisi nomu tjilira.” 10Mbunga nazinye tazi tokora asi zi va dipage nomamanya. Poopo ngoso uyerere waHompa tau moneka moNkongoronzugo zoMagwanekerero komeho zoVaisraeli navenye.
Mosesa ta kandererere mbunga
11 Hompa kwa tanterere Mosesa asi: “Dogoro siruwoke ngava nyoka nge vantu ava? Dogoro ezuvake ngava dira kuhuguvara nge, nampili ngomu na rugana yitetu yoyinzi mokatji kawo. 12Ngani va tumina ehamba lyomukagu, ngali va zonagure po. Ano ove ngani ku ninka ngo kare edi lyomuhoko ogu ngagu kara nonkondo dononzi kupitakana pwedi dawo.”
13Nye Mosesa ta tantere Hompa asi: “Amesi nyove wa gusa vantu ava moEgipite nononkondo doge. Vaegipite, apa ngava yi zuvha eyi wa ruganena vantu woge, 14ngava yi tantera vantu ava va kara mosirongo esi. Ano vene owo awo nare va zuvha asi ove Hompa nose wa kara, asi ove kumoneka nawa‐nawa, nsene eremo lyoge lina sikama kontunda zetu, hena asi ove kupita komeho zetu meremo lyokufana emungundi mutenya, ano masiku mweli lyomundiro. 15Ano nsene no dipaga nye vantu woge navenye, nomuhoko edi da zuvha unene wefumano lyoge, ngadi tanta asi, 16vantu woge kuna va dipagere momburundu, morwa yina ku vhuru kuvatwara mosirongo esi wa va tumbwidira asi ngo si va pa. 17Ano moomu ngoso Hompa, na ku kanderere, tu likida unankondo woge, ove o sikise mo eyi wa tu tumbwidira, apa wa tantere asi: 18‘Ame Hompa kapi ani handuka usimbu, ame hena kumonekesa eharo lyenene noulimburukwi, yiyo ani dongonona po nonzo nouhezuvhu. Nye kapi ngani lidivarerera po ni dire kufutisa vana nonontekuru doruvharo rwautatu naune morwanonzo dovakurona vawo!’ 19Nina ku kanderere, dongonona po nonzo dovantu ava morwaeharo lyoge lyenene eli lya ha runduruka, moomu wa va dongwenena‐dongwenena po hava tundira moEgipite.”
20 Hompa ta mu limburura asi: “Ame nani va dongwenena po moomu ono yi hundilire. 21Nye yosili nina kukutantera: Ame ogu na kererera po nouyerere wange yiyo wa zura ntunda zevhu nalinye, 22vantu ava nagumwe si nga hupa po a ka lyate mo mosirongo oso. Awo va mona uyerere wekaropo lyange noyitetu eyi na rugana moEgipite nomomburundu. Yisinke ava hadagura‐hadagwire nge, va nyoke kulimburukwa kwange. 23Awo narumwe si asi ngava ka lyate mo mosirongo esi na tumbwidira ozinyakurwawo. Nagumwe si pwava va nyoka nge ogu nga ka lyata mo. 24Nye ogu ko muntu gwange Karebu morwa age nkedi zendi peke, age hena ga limburukwa nge, hawe ogo ngani mu twara mosirongo esi ga ka nenga, ano ruvharo rwendi yiro ngaru gusa sirongo 25sonomuramba edi vana tungu ntaantani Vaamareki noVakanani. Mungura ngomu tengure momburundu koyiha yEfuta lyEgeha.”
Hompa ta futisa mbunga morwamutangu
26 Hompa kwa tanterere Mosesa naArona asi: 27“Dogoro siruwoke ngava sininika kutangwisa nge vantu ava wovadona ngesi? Na roroka nye kupurakena nomutangu dawo. 28Ano ntaantani ka va sikisire elimbururo eli asi: ‘Ame ogu na kererera po, tani mu gana asi yosili ngani yi sikisa mo moomu muna yi hundilire. Ame nyame Hompa na yi uyunga. 29Ano morwa mwa tangwisa nge, makura nagumwe si ogu ga pitakana ponomvhura nomurongo mbali asi nga ka lyate mo mosirongo oso. Ngomu fa, yimpu yeni tayi lihanene nye mwa za mburundu omo. 30Ame kwa mu tumbwidilire asi mu ka kare mo, nye one nagumwe si nga za mo, ntudi oKarebu naJosuwa ntani. 31One kwa tanta asi, vana veni ngava va kwata upika, nye ame ngani va twara mosirongo esi mwa nyoka, si kare sawo. 32One ko tomu fire moomu momburundu. 33Vana veni ngava kara vasita wononzwi momburundu ezi nomvhura nomurongo ne, ngava hepere uhalimburukwi weni dogoro tomu limanesa po. 34Ngomu simba udigu wonzo zeni nomvhura nomurongo ne, mvhura zimwe mwankenye ezuva eli mwa ka nenga sirongo. Yiponye nomu tunda mu dive asi nani yidona kuvyuka nge ame! 35Tani mu gana asi ngani yi mu rugana eyi one vantu wovadona, one ava mwa lipongaika asi mu vyuke nge. Momburundu omu yimo ngomu fira namuvenye omu. Nyame nina kuyitanta ame Hompa.’ ”
36-37Vagara ava ga tumine Mosesa, va ka nenge sirongo, ava va ka retere mutoto gomudona, ogu gwa ninkisire vantu va tangune va vyuke Hompa, yiponye ga va zugumine uvera, tava fu. 38Ponondadi murongo nambali oJosuwa naKarebu velike va tupikire po.
Ekambadaro lyomuhowo mokugusa sirongo
(Deut 1:41-46)
39Mosesa apa ga mene kutantera Vaisraeli nayinye eyi ga tente Hompa, vena makura tava lili unene. 40Eyi kwa sa, tava meneka ngurangura, va ronde sirongo sonondundu, tava tanta asi: “Ose ntaantani tuna wapere kuza kevega eli ga tu tantera Hompa. Ose tuna yi diva asi twa zona.”
41Nye Mosesa ta tanta asi: “Ano one eyi muna kudilira kulimburukwa kwaHompa nani yinke nye no? Kapi ngayi mu tompoka. 42Mwa ha za ko. Hompa kapisi neni hena ana kara, nonkore deni ngadi ka mu funda nawa‐nawa. 43Nsene Vaamareki noVakanani ngomu livyuka nawo, moyirwa ngomu fira. Hompa kapi nga kara neni, morwa mwa nyoka kukwama yendi.”
44Nye awo kuna kusininika ngorooro kuronda kosirongo sonondundu, nampili Sikesa saHompa sEgwanekero naMosesa nage si kapi ana tundu mo mokamba. 45Ano Vaamareki noVakanani, ava va tungire ko, tava di va gwana, tava va toona, makura tava di va rapatesa dogoro koHorama.
© Egwanekerobibeli Lyanamibia 1987, 2003
© Bible Society of Namibia 1987, 2003